Jon 14

1

2

3

4

5

6

7

8

9

10

11

12

13

14

15

16

17

18

19

20

21

¹Jisas hiykwe hyo ki-wayh me senkin manuw-mekow, “Hmo uron mokwe peie nan kworpakwor kwawk o. Homkwe God se nanpanan kiykiy-ay nok, seyr hane nanpanan kiykiy-ay.

²Hano Aio so a hokwe ampok poya-poya non. Hyo a hokwe ampok kraiar lopa lwak hokwe, hakwe hme senkin liy mesor kow ley. Hakwe pau yier serey makiy-ey, hmo ampok me meio koruay naruok kow ey.

³Seyr ha hmo ampok me meio koruay kow so meyki mon hokwe, hakwe ya ma-le a, hme huonokyaw nok e. Homkwe seyr hane nion le wayr ey, yier ha ma lwak mon.

⁴Homkwe yier, ha ma ley ey so yerki hokwe, homkwe po nonkway.”

⁵Sa Tomas hiykwe Jisas se senkin mesopok, “Hakamay, hromkwe yier, hwon ma ley ey hokwe nonkway pey. Hai, hromkwe yerki hokwe, penkin nonkway o?”

⁶Jisas hiy hye senkin makiy-me, “Hakwe yerki-ar, seyr okar-ok, seyr su lwayr peyow peyow ey. Uwr prueyn Aio so owh mon liy le ley, hano mon ma le hiykwaw.

⁷Homkwe hane nonkway hokwe, homkwe hano Aio se po nak-nonkway. Sawk enekwei ohiy nonaw kokwe homkwe senkin-awaw me wayr ey, homkwe hye papo nonkway, seyr hye papo lira.”

⁸Sa Filip hiykwe Jisas se senkin mesopok, “Hakamay, hunkwe hreme Aio se kwa mesair kow. Hromkwe Aio se lira ankin, suw hremekwe liy-ar.”

⁹Jisas hiy sa senkin lonuayk me, “Filip, mo ha hme nion enekwei meipey hay ma non-wak hokwe, hunkwe hane kiy-nonkway popriy pa pak? Hane posokwaw lira nonkway e, hiy seyr Aio se nak-ira nonkway. Hai, hunkwe senkin panoke mesopok o, hremekwe Aio se me-sair kow e?

¹⁰Hai, ha Aio so mon ma lwak, seyr Aio hiy hano mon ma lwak, hunkwe pankaw nan kiykiy-ay o? Ok, hme ha ma mesor kow somokwe, hano uron arian ko me-aw mesor kow pey. Sawk Aio, hano mon ma lwak hiykiaw hyo mey arian me meio.

¹¹Sawk homkwe ok, ha senkin ma me ke, kwa nanpanan kiykiy-ay. Hakwe Aio so mon lwak, seyr Aio hiykwe hano mon lwak. Homkwe ok, ha senkin ma me seme nanpanan kiykiy-ay pa lwak ankin, sawk homkwe hane kokwe mey, ha ma meio seme hokuaw kwa nanpanan kiykiy-ay.

¹²Hakwe hme okar kiy-mekow, uwr hane posokwaw nanpanan kiykiy-ay e, hiykwe mey, ha ma meio me liy meio. Seyr hiykwe mey kwaresi hay, hano mey sohom mo eir mon ma lwak me liy nak-meio, payhokuaw, hakwe Aio so mon makiy-ey.

¹³Seyr homkwe hano uru non hokwe pay me mesopok e, hakwe liy mon ousne. Suw Aio so uru hokwe seirpey lowk nakie, hyo ney so kueir.

¹⁴Ok-arar, homkwe hano uru non pay me mesopok e, hakwe liy mon ousne.”

¹⁵“Sawk hunkwe hane uron-pi ko-ar lwak ankin, hunkwe hano sow lowpwarowp mo meyki nak-pyay kraipakrai.

¹⁶Sa hakwe Aio se mesopok ley, hiykwe hme kokwe uwr, hme hiymon ey se ka me-ha. Uwr sohokwe hme nion senkin-awaw non-wayr peyow peyow ey.

¹⁷Hiykwe okar-ok me lohruw-a Niohney hiy non. Uwrsa ki ko homkwe hye kokwe liy me-huonok yawriy ley, payhokuaw, homkwe hye liy lira ley, seyr hye liy nonkway ley. Sawk homkwe hye po nonkway, payhokuaw, hiykwe hme nion lwak, seyr hmo uron mon lwak.

¹⁸Enekwei ha ley ankin, hakwe hmekwe ney parhaw me hieyn liy lokriy hain ley. Korey law. Hakwe hmo owh mon ya ma le a.

¹⁹Enekwei peypey korey, uwrsa ki ko lowpwarowp homkwe hane ma-lira lopa. Sawk homkiaw kokwe hane ya ma-lira a, payhokuaw, hakwe su lwayr, hom seyn, su lwayr ey.

²⁰Enekwei sohiy non kokwe homkwe senkin nonkway ey, hakwe Aio so mon lwak. Seyr homkwe hano mon lwak, seyr hakwe hmo mon lwak.

²¹Uwrsa hano ok me posokwaw nakruok e, seyr meyki posokwaw nak-pyay e, homkwe hane uron-pi ko-ar ma lwak hom non. Uwrsa, hane uron-pi ko-ar ma lwak somokwe, hano Aio hiy seyr hme uron-pi ko-ar lwak.”

²²Sa Judas hiykwe mesopok non. Uwr sohokwe Judas Iskariot korey. Hiykwe Jisas se senkin mesopok, “Hakamay, suw penkin so, hwon hunkiaw-ayay hreme-aw ma mesair kow sohokwe, sawk uwrsa ki ko lowpwarowp me kokwe hunkiaw-ayay mesair kow lopa panoke lwak o?”

²³Jisas hiy sa hye senkin makiy-sahre mekow, “Uwr, hane uron-pi ko-ar posokwaw lwak e, hiykwe ok, ha ma hiy-mon sorasor sohom mo meyki nakey. Hano Aio hiykwe seyr hye uron-pi ko-ar lwak, seyr hano Aio o, ha o, hrorkwe hyo owh mon le nok, hye nion lwayr ok.

²⁴Uwr, hane uron-pi ko-ar lwak pa lwak ankin, hiykwe ok, ha ma hiymon sorasor somokwe meyki nakey lopa. Ok, hom ma lonuayk somokwe hano nian korey. Ok somokwe Aio hane ma me-ha so mon le.

²⁵Ha hme nion ma lwak ohokwe, ok lowpwarowp somokwe hakwe hme papo mesor kow.

²⁶Niohney Pekney-weys, hme Hiymon-uwr, Aio hiy hano uru non ma me-ha ey sohokwe, hme kokwe ok lowpwarowp me ya hiy-mon sorasor a. Seyr hiykwe hmekwe ya ma-hiymon nanpanan a, ok paraw ha hme ma mesor kow somokwe.

²⁷Liwak marowhway yor kokwe hakwe hmo owh mon preisia kow hain ey. Hano liwak marowhway yor sohokwe hakwe hme po kow. Hme ha liwak marowhway yor ke ma kow sohokwe, uwrsa ki ko hom ma kow sohiy so liyliy-aw korey. Homkwe uron peie lowk kworpakwor kwawk o, seyr peie hok o.

²⁸Homkwe papo lonuayk, ha senkin ma me hokwe, hakwe pa ley, sa hakwe hmo owh mon ya ma-le a. Homkwe hane uron-pi ko-ar lwak ankin, homkwe ha Aio so owh mon ma ley ohokwe, homkwe kar po nuw-ey. Payhokuaw, hiykwe seirpey, hano eir mon lwak.

²⁹Enekwei sohiy lousne lopa non hokwe, hakwe hme po me-nonkway kow. Sa homkwe God se kokwe enekwei sohiy lousne lowpway non nanpanan kiykiy-ay ey.

³⁰Hakwe hme nion kokwe enekwei meipey liy ma-lohruw ley, payhokuaw, makwey-uwr ki ehe ma hiy-wayr hiykwe pa le. Hiykwe hane liy hiy-anok anok ley.

³¹Sawk uwrsa ki ko hom senkin ka nonkway, hakwe Aio se uron-pi ko-ar lwak. Seyr hakwe mey, Aio hiy hane ma mekow meio sohom mo liy-liy-aw-ar meio. Homkwe kwa le, hrom kwahnaw ley e.”