Text copied!
CopyCompare
Tí Nuevo Testamento cuènte Inchéni Jesucristo Cʼóna Nquìva - SAN JUAN

SAN JUAN 14

Help us?
Click on verse(s) to share them!
1’Tóxakuanhyará jahará. Títekáonrá Dios la ko kja̱xin títekáonrá tí janhan.
2Nto̱e Tꞌaná nchónhya nchia siín tsꞌejóni. A̱ ntá tí xi̱kahya chrókꞌuixin la xi̱kahya chrótjo̱nka̱rá. Méxra̱ sátsjiyá si̱ntayóxian tí chrókꞌuejóni.
3A̱ ntá tí sátsjiyá si̱ntayóxian, ntá tió tsjixin ntá tsꞌinka ínaá, ntá sátsji̱ni kíxin jahará kja̱xin chrókꞌuejorá ntiha tí tsjakꞌé janhan.
4Jahará la ó nohará nketí sátsjiyá la ko ó nohará tí nti̱a a ―ichro chꞌán.
5Ntá kjuáte̱he chꞌín Tomás ntáchro chꞌán kíxin: ―Ìnchéni, noehyani nketí sátsjia jaha. ¿A̱ ntá nkexrí chrókónoheni tí nti̱a a? ―ichro chꞌán.
6Ntá kjuáte̱he chꞌín Jesús ntáchro chꞌán kíxin: ―Janhan mé tí nti̱a la ko janhan mé tí tan chaxín la ko janhan mé tsjánjuan tí kjuachón. Jehó tí nkexro tsitekaon tí janhan mé jína tsjiji tí tjen Tꞌaná.
7Tí chrókjuátso̱anrá tí janhan ntá xi̱kaha chrókjuátso̱anrá Tꞌaná kja̱xin. Na ntá ó choxínrá chꞌán jie la ko ó tjejókomárá chꞌán ―ichro chꞌán.
8Ntá ntáchro chꞌín Felipe kíxin: ―Ìnchéni, ti̱to̱héni kíxin tsochóxinni Itꞌá. Táhó mé tjinkaonni ―ichro chꞌán.
9Ntá kjuáte̱he chꞌín Jesús ntáchro chꞌán kíxin: ―Felipe, ósé tjejóni, ¿a̱ ntá na̱xa̱ tjátso̱anhya tí janhan ní? A̱ ntá xi̱kaha tí tꞌikonrá tí janhan na mé xi̱kaha chrókꞌuíkonrá Tꞌaná. ¿Nkekuènté tjanchàna kíxin chrókui̱to̱ha̱ chrókꞌuikonrá tí Tꞌaná?
10¿Á títekákonhya jaha kíxin janhan jnkoko̱á tjéki̱an Tꞌaná, la ko Tꞌaná tjen tí tjén janhan? Tí nkehe níxja janhan la jehya kuènta̱na. Náhí. Tꞌaná tjéki̱an janhan mé tjechꞌe chꞌán tí xra̱ kuènte chꞌán.
11Títekáonrá kíxin jnkoko̱a tjéki̱an Tꞌáná, a̱ ntá Tꞌaná itjen tí tjén janhan. Kjónté kuítekákonhyará xi̱kaha la chrókuítekáonrá kíxin tí kjuaxroan jié kjuáko̱xia̱n kꞌuíkonrá.
12Ijnko nkehe chaxín tjo̱nka̱rá kíxin tí chaxín tsítekáonrá tí janhan ntá kja̱xinrá tsjachará si̱chꞌerá xra̱ yóhe̱ tjétꞌa̱ la ko kja̱xin ixra̱ a̱ntsí jié tsjachará si̱chꞌerá kíxin janhan la ó sátsjiyá tí tjen Tꞌaná.
13Kaín nkehe tsjanchatóxixínrá tí ni̱na na mé tsjánjuan kíxin xi̱kaha tsjáko̱xia̱n tí kjuachaxin kuènte Tꞌaná.
14Tí chrén nkehe tsjanchatóxixínrá ni̱na la janhan la tsjánjuan.
15’Tí chaxín tjuèhérá tí janhan ntá chrókjui̱nchexiteyéhérá tí nkehe kuétua̱nhanrá.
16Ntá tsoxrja̱nnóa̱ha̱ Tꞌaná kíxin tsochrꞌán chꞌán Ncha̱kuen chꞌán kíxin tsjinki̱tsa tí jahará la ko sinchechéhe̱ a̱sánrá la mé tsꞌejokoará jnkochríxín.
17Jehe chꞌán mé Ncha̱kuen chaxín. Tí sín chjasintajni xitjahya tsꞌáyéhe̱ sín chꞌán kíxin tꞌikonhya sín chꞌán la ko chónhya sín chꞌán. Kjánchó jahará ó choxínrá chꞌán kíxin tjejokoará chꞌán la ko tsꞌejokoará chꞌán jnkochríxín.
18Janhan na tsi̱to̱áhyará nòerá jahórá, na mé tsokjan ínaá kíxin tsꞌejóni.

19A̱ ntá séhya ntá tí sín chjasintajni tsꞌikonhya sin tí janhan ínaá. Kjánchó jahará mé tsꞌikonrá tí janhan. Ntá kja̱xinrá tsꞌejochónrá kíxin janhan na tjéchua̱n.
20A̱ ntá tí ya̱on a chrókónohará kíxin Tꞌaná la ko janhan jnkoko̱á tjéki̱an la ko kja̱xin jahará la ko janhan jnkoko̱á tjejóni.
21Tí nkexro nohe tí nkehe této̱an la ko sinchexiteyéhe̱ sín mé xi̱kaha tsja̱ko̱xi̱n sín kíxin chaxín tjuèhe sín tí janhan. A̱ ntá tí tjuèhe sín tí janhan ntá Tꞌaná mé tsotjuèhe tí jehe sín la ko kja̱xin janhan tsotjua̱ha̱ sín la ko tsjáko̱xia̱n nkexrí tjén janhan ―ichro chꞌín Jesús.
22A̱ ntá tí chꞌín Judas, jehya tí chꞌín Iscariote tíha, na mé kjuanchankí chꞌán kíxin: ―Ìnchéni, ¿nkekuènté jehóni tjákoxian, a̱ ntá tjáko̱éxinhya tí chojni chjasintajni? ―ichro chꞌán.
23Ntá kjuáte̱he chꞌín Jesús ntáchro chꞌán kíxin: ―Tí nkexro tjuèhe tí janhan mé sinchexiteyéhe̱ tí nkehe této̱an. La ko Tꞌaná mé tsotjuèhe tí jehe sín la ntá Tꞌaná la ko janhan tsꞌejókoni sín.
24A̱ ntá tí sín tjuèhya tí janhan la mé nchexiteyèhya sín tí nkehe tjàkua. A̱ ntá tí nkehe tjàkua tjejotinhínrá la jehya kuènta̱na. Náhí. Kuènte Tꞌaná tí nkexro kꞌue̱tua̱nna kꞌuinka.
25’Na̱xa̱ tjejóni la tjétjo̱nka̱rá kaín tíhi.
26A̱ ntá Ncha̱kuen Tꞌaná tsochrꞌán chꞌán kjuachaxin ni̱na mé tsjinki̱tsa tí jahará la ko sinchechéhe̱ a̱sánrá la ko tsja̱ko̱hará kaín nkehe la ko sinchexraxinkaonrá kaín nkehe xrja̱nka.
27’Kjuaxróxin tsi̱to̱ha̱ la ko kjuaxróxin kuènta̱na tso̱tja̱hárá. Jehya éxí tí kjuaxróxin chrókjuanjon tí sín chjasintajni. Náhí. Chrókóxakuenhya a̱sánrá la ko chróchrakonhyará.
28Ó kuínhínrá ntáxrja̱n kíxin sátsjiyá la ko tsokjan janhan tsꞌejóni ínaá. Tí chaxín tjuèhérá tí janhan ntá chrókócháhará tí kuínhínrá kíxin sátsjiyá tí tjen Tꞌaná kíxin a̱ntsí tꞌe̱to̱an chꞌán la kánhyó této̱an janhan.
29Senó tjétjo̱nka̱rá tíhi kíxin tió tso̱nhen tíha la tsꞌikonrá ntá tsítekáonrá jahará.
30’Ntá jie la í séhya tsonixja̱hará kíxin tí jie itsi tí chꞌín Tsochren, mé tí nkexro tꞌe̱tue̱nhen tí sín chjasintajni. A̱ ntá jehe chꞌán la ninkehó tꞌe̱tua̱nnahya tí janhan.
31Kjánchó tꞌichjánxi̱n kíxin xi̱kaha tso̱nhen ntá tí sín chjasintajni mé tso̱nohe sín kíxin tjua̱ha̱ Tꞌaná la ko nchexiteyáha̱ tí nkehe kꞌue̱tua̱nna chꞌán. Ntá jie tꞌinkatjenrá sátsjixínni ntihi.