Josue 6:21-26

²¹Maʌ̃ purud̶ebema umaquĩrãrãda, wẽrãrãda, warrarãda, drõãrã sid̶a necoba jũma quenasid̶aa. Ãdji pacada, ovejada, burro sid̶a jũma quenasid̶aa.

²²Maʌ̃ne Josueba Canaaʌ̃ drua acʌd̶e diabued̶a ẽberãrãa nãwã jarasia: –Wẽrã aud̶ua b̶ʌ Rahá diguid̶aa wãnaped̶a idjira, idji ded̶e duanʌ sid̶a ẽdrʌ enenadua. Bãrãba idjía wãrãneba jaraped̶ad̶ara od̶e wãnadua.–

²³Ara maʌ̃da Rahá diguid̶aa wãnaped̶a dji zezada, dji papada, dji djabarãda, dji djabawẽrãda, jũma ãdji ẽberãrã sid̶a dajadaa enesid̶aa. Maʌ̃be israelerã duanʌmaʌba jĩga b̶ʌd̶e wãsid̶aa.

²⁴Maʌ̃misa waabema israelerãba Jerico purura ab̶ed̶a jũma babuesid̶aa. Baribʌrʌ paratada, oroda, bronce od̶ada, jiorro od̶a sid̶a Ãcõrẽa diad̶a wagabadad̶e b̶ʌsid̶aa.

²⁵Josueba wẽrã aud̶ua b̶ʌ Rahára, idji ẽberãrã sid̶a zocai b̶ʌsia, maʌ̃ wẽrãba idjia Jerico chupea acʌd̶e diabued̶ara mẽrãna bẽrã. Rahá ẽberãrãra wad̶ibid̶a israelerã tãẽna panʌa.

²⁶Mãwãnacarea Josueba wãrãneba nãwã jarasia: Ab̶aʌba naʌ̃ Jerico puru wayacusa oi carea jʌwa b̶ʌibʌrʌ, maʌ̃ ẽberãra Ãcõrẽba biẽ́ b̶ʌya. Dji mõgara jũrã ca b̶ad̶a wayacusa obʌrʌd̶e idji warra iwinada beuya. Dji ed̶a wãbada pãrãbʌrʌd̶e idji warra tẽãbemada beuya. Mãwã idji warrarãra jũma quininia.