Josua 6:21-26

²¹Augwaligo te tigidali we bidi me, te gesi we bidi me, te monu dabe, mosi dabe me, te bulmakau dabe me, sipsip, donki me, te nai dabe dali augwaligo te moni hwą bainatgo ela silai.

²²Tialima, hasia bolo Josuago te buluba sa asela suagasali bidi sibolo te po wai dao, “Dage si te penani wego be tomoba pelama, tama aga dali, te aga hani bage dali, augwali te selasa asama, te duga si dąų wali po tiwai gilama yao,” te po wai.

²³Tialima, te bidi si te be tomoba pelama, tama Rahap dali, te aga aya ida, me ama dede, me te tigidali hani wai puluba, me te augwa sę olo ebo bidi dabe, te augwali selasa aselama, tama augwali sigo te bage augwali te Israel dabe augwali bidibo pesage pąde tagalama, bidaluai.

²⁴Tama nosali te Israel dabe augwaligo sia nogolama, tama te hanu me te tomode elaluali nai tigidali te siago dai. Tiali goli, hasiabolo te Israel dabego te gol, me silva, me bras, me ain, tego nigali te nai dabe augwaligo selama, tama deli madi sisinama, te Genuai Bidigo mone mubo be tomoba muai dao.

²⁵Tiali goli, Josuago te Rahap me te aga hani bage tigidali bidalumainu sula tagalai, magi baso meni, agai te bidi si Josuago te Jeriko tǫba sa asobo bidi tagala palali sogo, agai te bidi si geme dualai. Tama te we Rahapgo wąį hani dabe te Israelde bidada asali, te megi e po asębo sogo me bidibo dao.

²⁶Tialima, Josuago bomai po te we bidi augwalibolo weyu, te tiwai po wai, “Te bidi me deligo e hanu Jeriko ma nigibaso da, teda Genuai Bidigo te bidi dali dwai sę yaibao,” wai. “Tama gasa bidi mego te hanu genuai obo dabe ma nigibaso da, teda aga ogwa gomunai bidi te isaibao. Ma, te tomoba pabo genuai sunumi ma nigibo bidi, te bidigo sabi ogwa bidi te isaibao,” te po wai, Josuago.