Zozuwe 6:21-26

²¹Ti taai zu nuɓusɛiti pɛ suwuɠaaleʋeni, zunuiti ta anzanuiti, nu niinɛiti ta nu ʋɔlɔiti. Anɛɛ nikɛiti pɛ ka ti ti zuwuɠaaleʋeni, ta baalagiti, ta soovalegiti.

²²Zozuwe ɠɛni zunu felegɔiti ma, niiti ti zooi zuʋɛtɛni: «À li koloɠolo anzanui ná-pɛlɛi wu, wo anzanui naa ɠula, ta nɔnɔiti kpein, eɠɛʋelei wo minazeɠeni la bɛ, wo ɠona.»

²³Zunu felegɔiti ti liini zou zuʋɛtɛ fai ma, naati ti liini, ti Laɠaɓe ɠula, ta kɛɛɠɛ, ta dee, ta kɛɛɠɛleaiti, ta nɔnɔiti kpein, ti ná-nuiti pɛ kula. Ti ɓaa ti maazu, ti ti ʋu Izelayɛle nuiti puuzuʋɛ ʋoluʋɛ.

²⁴Ti taai ɠalani, ta nii kpein é ɠɛni ná. Kɛni walii, ta zanugi, ta kɔlu ɓɔi sɔɔlaiti, ta kɔlu zɔɔlaiti, ti naati puuni Ɠɔoɠɔ GALAGI ná-naavolo makɛsuʋɛ.

²⁵Zozuwe koloɠolo anzanui Laɠaɓe yɛnvui makɛni, ta ná-pɛlɛyeɠei, ta niiti kpein ti ɠɛni ga nɔnɔ. É zeini Izelayɛle nuiti saama eyɛsu zaaɠaza. Mazɔlɔɔ é keelaiti dɔɔɠuni ga pagɔ, niiti Zozuwe ti leʋeni Zeeliko ʋɛtɛ fai ma.

²⁶Naama ziɛgi zu, Zozuwe niima ɠonai woni, é ɠɛ ma: «Naama zunui ɠa ga foovoo nu Ɠɔoɠɔ GALAGI ɠaazu, nii a wuzeɠe, é ɠɛ é Zeeliko taai lo ʋolu. Ná-doun zunu mɔungi yɛnvui ɠa a yɛ buulaagi ma yeɠei wɔɔ vai zu. Ná-doun zunu ɠaaɓelagi yɛnvui ɠa a yɛ kpogiti too vai zu.»