John 17

1

2

3

4

5

6

7

8

9

10

11

12

13

14

15

16

17

18

19

20

21

¹Murina Jesus te bosa sokoa eni, agaia te rei dato i kokou me ghaghua, “Mama, na bongi te sara mai tua. Ko ladavaghiniu inau, na Dalemu, mi nau ku ladavaghini oligho ghua ighoe.

²Ighoe to vaheu tua na maana vuvungadira na lei tinoni soko, keri ge inau ku vahera na vola maurihali rahei to vaheu tua.

³Ma eni na vola maurihali, na ghilalaamu ighoe, asakai na God utuni sughua vamua, mana ghilalaagu Jesus Christ, to niu vetena mai.

⁴Inau tu ladavaghinigho tua tana maramana mu ghoi sokoa tua na lutu to vaheu mai ge ku lutua.

⁵Tamagu, ko ladavaghiniu tana matamu taeni, na lada te vagha toro loghoa inaghona na goniana na maramana.

⁶“Inau tu ladavaghinigho vanira tua rahei to vaheu mai tana maramana eni. Agaira ke ra nimua na vure, to vaheu mai, ma gaira tara kabu taonia nimua na bosa.

⁷Mi taeni agaira tara ghilala na lei totobo udolu to vaheu, te butu mai tamua.

⁸Inau tu tarai sokora nia nimua na rongorongo to vaheu, ma gaira tara lavipangotia. Agaira tara ghilala te utuni inau tu butu mai tamua, mara taluutunia ghua to niu vetena mai.

⁹“Inau tu kokoeliulivutira. Mi nau tu mua kokoeliulivutira na vure tana maramana, ma gaira vamua to vaheu mai, na pukuna gaira ra nimua.

¹⁰Na lei tinoni tu loghora ke, ra nimua, mana lei tinoni to loghoi ighoe ke ra nigua, ma gaira tara tatea nigua na lada.

¹¹Mi taeni inau tu dutu ni sania tua na maramana, mi nau ku mai righigho, ma gaira kara ghahara mua so tana maramana. Mama to tabu, ko pilupungisira nia na maana ni ahamu, na aha to vaheu, keri ge kara sakai sonikolu te vagha ighoe mi nau toro sakai vamua.

¹²Tana bona tu ghahau kolura, inau tu pilu pungisira nia na maana ni ahamu, na aha to vaheu. Inau tu righitaonira, me mua sivi siki sakai tadira, sakai vamua na tinoni te manana sughua ge ke sivi, keri ge na Gegere Tabu ke kale utuni.

¹³“Mi taeni inau tu dutu ni mai righigho, mu bosai na lei totobo raini tana bona tu ghahau mua kolura tana maramana, keri ge kara loghoa nigua na togotogo tana tobadira ke au vule vaa.

¹⁴Inau tu taraira nia nimua na rongorongo, mana lei vure tana maramana tara nira sika, na pukuna tara mua taonighi na lei nilabu dika ni maramana, te vagha ghua inau tu mua taonighi.

¹⁵Inau tu mua nongigho ge ko hola kehara tana maramana, mu nongigho ge ko pilupungisira ta Satan.

¹⁶Te vagha inau tu mua nina na maramana, agaira ghua tara mua nina na maramana.

¹⁷Na bosamu te utuni, keri ge ko vamarabura ra nimua tana utuni.

¹⁸Te vagha inau to niu vetena mai tana maramana, inau tu nira vetena gatu.

¹⁹Inau tu vahegho na volagu udolu ge ku hangara, keri ge gaira ghua kara vahegho utuni na voladira.

²⁰“Inau tu mua kokoeliulivutira vamua gaira na vaovarongo, ma gaira ghua arahei soko kara taluutuniu, na pukuna didira na rongorongo.

²¹Inau tu kokoeliulivutira ge gaira udolu kara sakai vamua. Mama, te vagha ighoe itagua inau, mi nau itamua ighoe, ko nera ge kara sakai sonikolu itatada, ge rana vure tana maramana kara taluutuni ighoe to niu vetena mai.

²²Inau tu vahera na vata ni lada to vaheu, keri ge kara sakai vamua, te vagha ighoe mi nau toro sakaisonikolu.

²³Inau itadira mi ghoe itagua inau, ge kara puku ni sakai sonikolu itatada. Na pukuna keri ge na vure tana maramana kara ghilala to niu vetena mai, mo to dolovira te vagha to doloviu inau.

²⁴“Mama, inau tu liodira gaira to vaheu, ge kara kabu kolu itagua ivei ku ghahau inau, keri ge kara righia dida na ladagu. To vaheu, na pukuna ighoe to doloviu tua inaghona na goniana na maramana.

²⁵Mama puku ni uto, na vure tana maramana tara mua ghilalagho. Mi nau tu ghilalagho, ma gaira raini tara taoniu tara ghilala to niu vetena mai.

²⁶Inau tu taraira ge ra ghilalagho, mi nau ku tona haliu so na neana te vagha, keri ge na dolo to loghoa vaniu ke ghaha itadira, mi nau ghua itadira.”