Joel 3

1

2

3

¹Be ga’ar SOMOL, “Re ngiyal’ i n’em e bay gu fulweg e fla’ab rok yu Judah nge yu Israel nga rogon.

²Ma bay gu kunuy urngin e nam, nggu fekrad ko Loway ko Pufthin. Nu rom e bay gu pufthin nagrad riy ni bochan urngin e tin kar rin’ed ko girdi’ rog. Kar wereged piyu Israel u lan e pi nam i yan ma kar th’eth’abed kar f’oethed yu Israel, ni gag e nam rog.

³Ra girengiyed e pow riy ni ir e nge duwgiliy ko mini’ rorad e nge fek e pi’in kan kolrad. Kar pi’ed nchuway’ e pagel nge rugod ni ngar manged sib ni fan e ngar chuw’iyed e wayin nge ppin ni yad ma falchuway’ ngorad.

⁴“Gimed yu Tyre, nge yu Sidon, nge yu Filistia ni ga’ngin, mang e gimed be guy rogon ni ngam rin’ed ngog? Mogned, gimed be guy rogon ni ngam fulweged taban ban’en ngog? Fa’anra er rogon ni gimed be leamnag, ma bay gu fulweg taban ngomed ni papey!

⁵Kam feked e silber nge gol rog nge tirog ban’en nib tolang puluwon kam marod mu ted ngalan fapi tempel romed.

⁶Kam feked e girdi’ nu Judah ngu Jerusalem nga orel ko nam rorad kam pi’ed yad nchuway’ ngak piyu Greece.

⁷Bay gu chuwegrad e chiney ko yungi n’en ni kam pi’ed yad ngay nchuway’. Bay gu rin’ ngomed e tin ni kam rin’ed ngorad.

⁸Bay gu pag pifakmed ni pagel nge ppin nga ni pi’rad nchuway’ ngak piyu Judah. Piyu Judah e bay ra pi’ed nchuway’ ngak fapi girdi’ ni kanog e Sabean ngorad, ni yad mmal’af nga orel. I gag SOMOL e kugog e pi thin ney.

⁹“Mogned e pi thin ni ba’aray ngak e pi nam ni nge lungumed: ‘Mfal’eged rogomed ko mael, mu pininged e pi’in ni falu’ ko mael, mu kunuyed urngin e salthaw ngam marod!

¹⁰Mu pirdi’iyed e kuwa romed ngam ngongliyed ni saydon, nge yar ni gimed ma th’ab pa’ngin e gek’iy ngay nge mang sarey. Mus ko pi’in me’waer ma dabisiy ni nge un ko cham.

¹¹Mu gurgad ngambad, gimed urngin e pi nam ni gimed ba chugur, mu’ulung gad ngalan fare loway.’” SOMOL, mu fek i yib fare raba’ i salthaw rom nib gel!

¹²“Pi nam e thingar ra fal’eged rogorad ngarbad ngalan e Loway ko Pufthin. I Gag SOMOL e bay gu par u rom nggu pufthinnag gubin e pi nam nib liyeg yu Israel.

¹³Ri yad ba kireb; mu th’abedrad nga but’ ni bod e grain ko ngiyal’ nike el ni ngan th’ab; mu pirdi’iyed yad ni bod rogon e grape ni yima pirdi’iy ko gin yima udiy e grape riy kan uduy ke map’ e wayin riy nga but’.”

¹⁴Bokum e biyu’ e biyu’ e bay u lan fare Loway ko Pufthin. Ireram e re gin’en ndabki n’uw nap’an me taw fare rran rok SOMOL ngay.

¹⁵Bayi lumor e yal’ nge pul, ma dabki mat ra’en e t’uf.

¹⁶SOMOL e bayi tolul u daken e Burey ni Zion; bay yan lungun u Jerusalem ni bod lingan e dirra’; me rur e but’ nge lanelang. Machane bayi n’uf SOMOL e girdi’ rok.

¹⁷“Gimed piyu Israel, e aram e bay mu nanged ni Gag e SOMOL ni Got romed. Gu be par u Zion, u daken e burey rog nib thothup. Jerusalem e bayi par nib binaw nib thothup; ma girdi’ nu bang e dabkiyag ni ngar koled yu Jerusalem bayay.

¹⁸Yungi milay’ ni grapes e bayi peth u daken e pi burey e re ngiyal’ i n’em; ma gubin yang e flang ni bay ni pir’eg e garbaw riy; ma re ngiyal’ i n’em e bay e ran ni pire’ nra gaman yu Judah riy ni polo’. Ra yib ba lul’ u Tempel rok SOMOL, nge taren nag e Loway ni Akacia.

¹⁹“Bayi par yu Egypt ni bod bangi ted ni desert, ma yu Edom e ke kireb ndakuriy ban’en ni bfel’ ngay, ni bochan e rchamgad ko nam nu Judah ngar li’ed e girdi’ riy, ni dariy ban’en ni kar bucheged.

²⁰Bay gu falbeyen e pi’in kan thang e pogofan rorad; dabiyag ni gu pag e pi’in kireb e rok ndab gu gechig nagrad. Ma yu Judah nge yu Jerusalem e bay i par e girdi’ riy ndariy n’umngin nap’an, me Gag fare SOMOL e bay gu par u daken e Burey ni Zion.”