Joel 3

1

2

3

¹KAUN-O eri mahsanih, “Eri, ni ahnsowo I pahn kapwuredohng Suda oh Serusalem ara paiamwahu.

²I pahn kapokonepene tohn wehi kan koaros, oh kahreiraildohng nan Wahun Kopwung. I pahn kapwung irail wasao pwehki mehkoaros me re wiahiongehr nei aramas akan. Irail kasarepeseng mehn Israel akan ong nan sapwen mehn liki kan, oh nehkpeseng wehin Israel, nin limeio.

³Irail koadoaropwehki ma ihs me pahn naineki me lohdi kan. Re pil netikihla kisin pwutak oh serepein kei pwe re en wiahla lidu, pwe re en pwainda lihen netiki paliwararail kan oh wain.

⁴“Mehn Dair oh Saidon, oh mehn Pilisdia kan koaros, dahme kumwail songosong en wiahiong ie? Kumwail men dupukohng ie mehkot? Ma iei, I pahn mwadangete dupukohng kumwail!

⁵Kumwail wahsangehr nei silper oh kohl, iangahki ei kepwe kesempwal kan, walahng nan amwail wasahn kaudok kan.

⁶Kumwail wahsangehr mehn Suda kan, oh mehn Serusalem kan, walahng wasa doh, oh netikinirailla rehn mehn Krihs kan.

⁷Eri, met I pahn kapwureiraildo sang ni wasa kan me kumwail netikinirailla ie. I pahn wiahiong kumwail dahme kumwail wiahiong irail.

⁸I pahn mweidohng mehn Suda kan en pwainda noumwail pwutak oh serepein kan. Re pahn uhd netikinkumwailla wasa doh rehn mehn Sapea kan. Ngehi, KAUN-O, me mahmahsen.”

⁹“Eri, kumwail kalohkihda pakair wet nanpwungen tohn wehi kan: ‘Kumwail onopadahng mahwen; kumwail kapokonepene sounpei kan koaros oh kariswei!

¹⁰Kumwail sukada imwin noumwail mehn deipwel kan oh wiahkihda kedlahs, oh kumwail wiahkihda ketieu noumwail naip en kamwakel kan. Me luwet akan pahn pil uhdahn iang mahwen.

¹¹Kumwail mwadangodo, kumwail wehi kan koaros me kapilpene Suda, kumwail pokonpene nan wahwo.’” Maing KAUN, komw ketikihdo sapwellimomwi karis pwe re en mahweniong irail!

¹²“Tohn wehi kan pahn onopada oh kodohng nan Wahun Kopwung. Iei wasa me ngehi, KAUN-O, pahn kadeikada wehi koaros me kapilpene Suda.

¹³Re me inenen suwed mehlel; kumwail lupukiraildi rasehng wahnsahpw ni ahnsoun rahk; kumwail kamwutirailpene, duwehte kreip eh kin kamwutpene ni wasahn kangid kreip me diradahr lao wain pahn kusieisang loale.”

¹⁴Aramas ngedehrie mihmi nan Wahun Kopwung. Iei wasao me rahnen KAUN-O pahn mwadang pwarodohng.

¹⁵Ketipin oh maram rotorotalahr, oh usu kan solahr linge.

¹⁶KAUN-O ahpw mahsendihdo sang nin Nahna Saion, ni kapitie laud; kapitie peipeido sang Serusalem, rasehng nansapwe, eri, sampah oh pahnlahng kin rerrerki. Ahpw e pahn ketin uhki sapwellime aramas akan.

¹⁷“Eri, kumwail mehn Israel kan, kumwail ahpw pahn ese me ngehi, KAUN-O, amwail Koht. I kin ketiket pohn ei dohl sarawi Saion. Serusalem pahn wiahla kahnimw sarawi ehu; mehn liki kan solahr pahn kak pwurehng kalowehdi.

¹⁸Ni ahnsowo mwetin wain pahn koaduhpwaldi nahna kan; kou tohto pahn dierek pohn dohl kan koaros; pihl pahn rek ong mehn Suda koaros. Piletik pwoat pahn pwilipwilweisang nan Tehnpas Sarawien KAUN-O, piletiko ahpw pahn kin kalamwurih nan Wahun Akasia.

¹⁹“Isip pahn wiahla sapwtehn ehu, oh Edom pahn ohla douluhl, pwehki arail mahweniong wehin Suda oh kemehla towe me soh dipe kan.

²⁰I pahn ikih irail kan me kamakamalahr; I sohte pahn mahkohng me dipan akan. Ahpw Serusalem oh Suda pahn tohnla kohkohlahte, oh ngehi, KAUN-O, pahn ketiket pohn Nahna Saion.”