1“Manaŋgopieŋ, no dameŋ ira Juda mâreŋko â Jerusalem haeo ʒârâ ʒâpâ fokac i bârâriepemu.
2Ehuc ŋicne ŋicne hetumaŋ‐joparâ Wofuŋte mumutara wâneŋko bacjopa hupemu. Ira Israe biŋefâc‐nane jaŋere erâ dâŋgieo râec‐jopapemu. Jaŋe ŋicne ŋicne jaŋere ŋondeŋko bâtâtiec‐jopambiŋ, ehuc mâreŋ‐nane bâtâc bambiŋte iŋuc ejarepemu.
3Jaŋe ŋicfâc‐nane jaŋere erâ qaŋgec qambiŋ, erâ motec moc râepie sasec ŋokac kitâcnewec, â naru moc râepie waiŋ opâ kitâcneme nâmbiŋ.
4“Tiro â Sidoŋ â Filisa mâreŋ rune ŋoŋe no wemo enarezo muŋgopieŋ? Wiac eŋarepo irec okacne bazu‐nareniŋte muŋgopieŋ me? Moc bazu‐narezo muniŋmuo ine bâruŋ jaha bârisie‐ŋarepe ŋaŋacne faio feocmu.
5Ŋoŋe hâcne wiac‐nane furi sâko, siliwa â gol i fiuc rorâ nemu ufuŋ‐ŋeŋicko bafembiŋ.
6Ŋoŋe Juda â Jerusalem ŋic ŋokac jaŋacne hae mâreŋkonec rocjoparâ taicko râec‐jopahuc moneŋte erâ Grikŋic qikiŋne‐jarembiŋ.
7Manaŋgopieŋ, ʒi ine moneŋte erâ taicko râec‐jopambiŋkonec ejarepe risie warenʒepieŋ, ehame no irec okacne bazu‐ŋarepe fai‐ŋeŋicko fezejec.
8Ehuc noni otâ ŋokâfâc‐ŋeŋic Judaŋic jaŋere meo râec‐jopape feniŋmu, eme jaŋe ŋicguru moc mâreŋ ʒoricko juŋgopieŋ, Sebaŋic hâcne, jaŋerao râec‐jopahuc furi‐jeŋic roniŋmu, Wofuŋzi iŋuc muwec hâcne.
9“Ŋicne ŋicne jaŋere ŋondeŋko dâŋ ʒiŋuc musokaniŋ: ‘Ajoc, ʒika qazore ʒawieniŋ, ŋic tâpirihec esoc qafeŋ ejareniŋ. Ʒikaŋic ʒeŋgoma hefârec‐jopapie warenʒepieŋ.
10Ŋoŋe kinoŋ‐ŋeŋic bâtikiepie ʒika fuazejec, â sâqe‐ŋeŋiczi damu ezejec; ehame ŋic dodocnezi ʒiŋuc muzejec: “No ŋic qac momori jukopac.”
11Ŋic rârec rârec juraŋgopieŋ ŋoŋe bâruŋ jaha fisi‐fârerâ wâneŋko tumaŋneniŋ.’” O Wofuŋ, go momorifâcge jowac‐jopatec ijaha wahanʒepieŋ.
12Wofuŋzi kecʒiŋuc muwec: “Ŋicne ŋicne jaŋe faharerâ Wofuŋte mumutara wâneŋko fisinʒepieŋ, eme no ira hâcne ŋicguru rârec rârec juraŋgopieŋ jaŋere dâŋ mutarapemu.
13Qa roro dameŋ maickekacte sâqe mictara roniŋ, â waiŋ hândâŋ katapazi fusucmakacte fe âte pisickeniŋ. Hehesic‐jeŋic bocjaha izi hae mâreŋ sâcke‐fârekac hâcne.”
14Wofuŋte dameŋ maickekacte mumutara wâneŋko ŋic guru dindiŋzi guru sâko fisiŋgopieŋ.
15Mosa â ʒoaŋ jahe gâpârekopirec, erâ bâpiŋ tatamaczi gâkowakac.
16Wofuŋ e Zioŋko owackeocmu, â marac fânâŋ‐ticne Jerusalem haeo fuame sambâŋ â mâreŋ jahe ɋiɋiteckenicmu, ehame Wofuŋ e Israe gurufâc‐ticne jaŋere dapeŋ â huec sanaŋ eocmu.
17“Iŋuc fuame ʒiŋuc mana taranʒepieŋ: No Wofuŋ Anutu‐ŋeŋic jukopac, ehuc Zioŋko tiri tiki‐naneo ŋec juc eekopac. Eme Jerusalem i tiri hae erâ ŋeha ŋic jabanezi mocwâc sicne fotâc mi enʒepieŋ.
18“Eme dameŋ ira waiŋ mâriri sâko fuaocmu, erâ bulimakao jaŋe mâreŋ facne sâcke‐fâreniŋmu. Juda mâreŋko opâwâc forakac ira opâ fifisine erâ foocmu, erâ Wofuŋte ufuŋkonec opâ ʒâŋe moc fisihuc Sitim wâneŋ bâgunuckeocmu.
19“Aigita ŋic jaŋe Judaŋic jaŋerao sindaŋ bâfuahuc mâreŋ‐jeŋicko ŋic bahacmâc jaŋere soc hoŋkembiŋte mâreŋ‐jeŋic i tuhutac fuazejec, â Edom mâreŋ i niniŋ siarereŋ fuarâ fozejec.
20Juda mâreŋ â Jerusalem hae ira ine ŋic jaŋe mimiŋzi ɋâric jurahuc junʒepieŋ.
21Soc hoŋkembiŋ jaŋe moc mi akic‐jopahuc kiŋjeŋic batarapemu, Wofuŋ no Zioŋko ŋec juc eekopac hâcne.”
