Joel 3

1

2

3

¹“Alic acgom, êndêŋ taŋ jawaka Juda to Jerusalem sa naŋ, êndêŋ bêc to ŋasawa tônê

²aê oc jakalem tenteŋlatu samob sêpi tageŋ ma jawê êsêac sêsêp gaboaŋ Josapat sêna, gebe jamêtôc êsêac aŋga tônê êtu gêŋ samob, taŋ sêgôm gêdêŋ aêŋoc lau to ŋoc gêŋlênsêm Israelŋa, gebe sêjam êsêac êliŋ-êliŋ sêmoa tenteŋlatu ŋasawa ma sêjac sam aêŋoc nom gêdêŋ tauŋ.

³Êsêac sêpuc kapoac kêtu ŋoc lauŋa ma sêkêŋ ŋapalê gêjô awê mockaiŋo ma sêkêŋ ŋapalêo lau sêjam ôli ŋa wain, taŋ êsêac tauŋ sênôm naŋ.

⁴“Ma amac lau Tirus to Sidon ma Pilistia nêŋ gamêŋŋa samob, aêacnêŋ asageŋ ŋagêdô gêdêŋ tauŋ. Amac abe akêŋ ŋagêjô êndêŋ aê êtu gêŋ teŋŋa me. Embe akêŋ ŋagêjô êndêŋ aê, go janam nêm ŋagêjô ôkwi wacêtap amac taôm môkêmapac sa weŋ tageŋ.

⁵Gebe amac ajaŋgo ŋoc silber to gold su ma ajoŋ ŋoc awamataêjam kêsô nêm lôm gwam gêja.

⁶Ma akêŋ lau Juda to Jerusalem gêdêŋ lau Helen sêjam ôli gebe sejoŋ êsêac sêna e sêmoa jaêc nêŋ gamêŋ ŋamadiŋ.

⁷Alicgac me, galoc tec jaôc êsêacnêŋ ŋalêlôm gebe sêndi aŋga gamêŋ, taŋ amac atulu êsêac sêja naŋ, ma gêŋ amac agôm naŋ, ŋagêjô wacêtap amac taôm môkêmapac sa.

⁸Aê oc jakêŋ latômio to ŋac sêndêŋ lau Juda sênam ôli nasêsêp êsêac lemeŋ, ocgo ac sêkêŋ êsêac sêndêŋ lau Sabea, tê sêŋgôŋ jaêcsêga nê, sênam ôli êsêac. Biŋ tec Apômtau kêsôm.

⁹“Asôm biŋ tonec êtu tapa aŋga lau tenteŋlatu nêŋ gebe ‘Amansaŋ taôm êtu anac siŋŋa. Ajatu lau siŋsêlêc sa. Akêŋ siŋwaga sêmêŋmaŋ samob sêpi tageŋ.

¹⁰Apa nêm sakweŋ ôkwi êtu siŋ to anam lêŋgêc ôkwi êtu kêm. Ŋac ômbôêŋ-ômbôêŋ êsam tau gebe “Aê ŋactêkwa teŋ.”

¹¹Amac tenteŋlatu, taŋ aŋgôŋ agi aêac auc naŋ, andi ŋagaôgeŋ, naakac taôm sa aŋga tônêmaŋ.’” O Apomtau, ôwê nêm lausiŋ sêsêp tônê sêna.

¹²“Tenteŋlatu sêndimaŋ. Ma êsêac sêwê sêna gaboaŋ Josapat gebe aŋga tônê aê oc jaŋgôŋ ma jamêtôc tenteŋlatu samob, taŋ sêŋgôŋ sêjam aucgeŋ naŋ.

¹³Akêŋ bôjaŋ jalô êna gebe kôm ŋanô gêmêc e kêtu masê su. Asô anamaŋ, aka wain, taŋ kêsêp toŋtoŋ e mêŋgêc su naŋ. Ma ŋatêkwi êsêp gasuc e mêŋêc amboac tonaŋ e wain êkêc gebe nêŋ sec gêjam sêga.

¹⁴“Lau totoŋ-totoŋ sêmoa gaboaŋ mêtôcŋa gebe Apômtaunê bêc kêdabiŋgac aŋga gaboaŋ mêtôcŋa.

¹⁵Oc to ajôŋ sêjam kanuc ma utitalata sêgamiŋ ŋawê.”

¹⁶Ma Apômtau awa ŋadindiŋ kêsa aŋga Sion. Apômtau gêmôêc biŋ awa kapôêŋ aŋga Jerusalem ma umboŋ to nom ŋawiwic. Mago Apômtau kêtu nê lau nêŋ lamu teŋ ma lau Israel nêŋ tuŋtêna teŋ eŋ.

¹⁷“Ocgo ajala gebe Apômtau, nêm Anôtô aê, tec gaŋgôŋ ŋoc lôc dabuŋ Sion nec, aê taucgoc. Ma Jerusalem oc êtu gamêŋ dabuŋ ma lau jaba teŋ oc sêsêlêŋ sênac malac êŋgic êtiam atomanô.

¹⁸“Ma êndêŋ bêc tônê wain oc enseleŋ aŋga lôc ma su êsêp aŋga gamêŋ ŋabau ma bu enseleŋ êtôm Judanêŋ bumaŋ samobgeŋ. Ma bumata teŋ êpulu êpi aŋga Apômtaunê andu ma êmalôm gaboaŋ Sitim.

¹⁹“Gamêŋ Aiguptuŋa oc êtu gasaŋ ma gamêŋ Edomŋa oc ŋagêlêŋ êsa êtu gêŋ alôb-alôb, taŋ sêgôm gêdêŋ lau Juda naŋŋa gebe sêkêc biŋ-masiwaganêŋ dec siŋ aŋga nêŋ gamêŋ.

²⁰Ma lau sêŋgôŋ gamêŋ Juda endeŋ tôŋgeŋ ma gôlôac oc sêjô-sêjô tauŋ aŋga Jerusalem ŋapaŋ.

²¹Aê oc jakêŋ ŋagêjô êjô êsêacnêŋ dec ma sêwê-biŋ-ŋakaiŋwaga teŋ êwê sa atom gebe Apômtau oc êŋgôŋ lôc Sion.”