1Migkaǥi is Nengazen te, “Dutun te timpu te edlikù ku is meupiya he kebpekesavuk diyà te Juda wey Jerusalem,
2edtiǥumen ku is menge etew ziyà te menge nasyun ne ibpetupang ku sikandan diyà te Suǥud ni Jehoshafat. Dutun edhukuman ku sikandan tenged te mibeelan dan diyà te menge Israilihanen, kes menge etew he ǥaked ku. Impeyapat dan diyà te zuma he menge nasyun is menge etew ku, ne mibahin dan is tanè ku.
3Mibahin dan is menge etew ku pinaaǥi te ripa, ne imbelegyè dan he uripen is menge vatà he menge maama wey menge vahi, su ibayad dan is halin te inumen wey menge vahi he ebelegyà te zengeg dan.
4“Sikiyu is menge etew ziyà te Tyre, Sidon, wey te langun he lugar ziyà te Filistia, hengkey heini is mibeelan niw he igkuntra niw kedì? Mibelesan e ve keniyu tenged te mibeelan ku. Emun mibelesan a keniyu, ne ebelesan ku zaan sikiyu tenged te mibeelan niw.
5Su migkuwa niw is mahalen he menge ketiǥeyunan ku, ragkes en is menge pelata wey vulawan, ne mid-uwit niw heini ziyà te menge simbahan niw.
6Mid-uripen niw is menge etew te Juda wey te Jerusalem ne imbelegyè niw ziyà te menge Gerisyahanen, su wey niw sikandan ikepekeziyù diyà te tanè dan.
7Piru midtevangan ku sikandan he mekaawè dan diyà te menge lugar he mibelegyaan niw kandan, ne ebeelan ku ziyà te keniyu is mibeelan niw ziyà te kandan.
8Ibelegyè ku is menge anak niw ziyà te menge etew te Juda, ne ibelegyè dan haazà diyà te menge tig-Saba, he ed-ubpà diyà te meziyù he lugar. Egkehitavù heini, su iyan a, is Nengazen, is migkaǥi kayi.”
9Ibpetuanen heini ziyà te menge nasyun: Pengandam kew para te kebpekidtebek. Hinggata niw is menge sundaru niw te kedsurung.
10Beeli niw he menge ispada is punta te menge eradu niw wey veeli niw he menge vangkew is para te menge igkamet niw. Minsan is menge meǥuyà ne kinahanglan he mebpekidtebek.
11Hendini kew, uvey kew zini, sikiyu is menge etew ziyà te peliǥuy he menge nasyun. Ne tiǥum kew ziyà te Suǥud ni Jehoshafat. Nengazen, ipetupang nu en dutun is menge sundaru nu!
12Migkaǥi is Nengazen te, “Kinahanglan he egkehinggat is menge etew ziyà te peliǥuy he menge nasyun te kedhendiyà te Suǥud ni Jehoshafat, su edhukuman ku sikandan dutun.
13Iring sikandan te edreǥunen he ereg en he egeraven su nelutuan en, etawa iring te paras he ereg en he egkeresen su nepenù en te paras is keresà. Utew en sikandan midtaman he lalung; is menge salè dan iring te wahig te paras he midrepey ziyà te midteǥuan duen.”
14Utew mahabet is menge etew he eguǥurub diyà te Suǥud te Kedhukum, su hapit en egkeuma is andew te kedsilut te Nengazen.
15Ebmerusirem is andew wey is bulan, ne kenè en edsiǥa is menge vituen.
16Eghiniǥer is Nengazen he ebpuun te Zion; edraǥeb is laǥeng din he ebpuun te Jerusalem. Ne tenged kayi egkehuyung is kelibutan wey is langit. Piru melig-en he eputà is Nengazen para te menge Israilihanen he menge etew zin.
17Menge tig-Juda, egketuenan niw he iyan a, is Nengazen he Megbevayè niw, mid-ubpà a ziyà te Zion he segradu he vuvungan ku. Ne egkeuman en maan egkehimu he segradu is Jerusalem; kenè ne heini ed-umanan edsurunga te menge etew ziyà te zuma he menge nasyun.
18Dutun he timpu ebewian ku sikiyu. Ed-uzaren kew te veǥu he vinu he ebpuun diyà te mezakel he menge paras diyà te menge vuvungan. Ed-uzaren kew zaan te ǥatas he ebpuun diyà te mezakel he menge vaka wey menge kambing he ebpemenabtab diyà te menge mibuntud-buntud. Kenà egkemezahan is menge wahig niw. Ne edtudà is serebseb he ebpuun diyà te valey te Nengazen ne egkewehiǥan din is menge zal-ug he zuen duen menge acacia.
19“Is Ehipto egkehimu he mekevulungbulung, ne is Edom egkehimu he disirtu su midsurung dan is menge etew ziyà te Juda; mibpenhimetayan dan is kenà ereg he edhimetayan.
20Piru is Juda wey Jerusalem, ed-ubpaan mulà taman te taman.
21Ibpenimales ku is kebpenhimetayi te menge etew ku; edsilutan ku is mibaal kayi ziyà te kandan. Iyan a, is Nengazen, ed-ubpà diyà te Zion.”
