Hwan 6

1

2

3

4

5

6

7

8

9

10

11

12

13

14

15

16

17

18

19

20

21

¹A sangaw ta mittan a itta ha i Hesus ta iten Galileya, a sa umange kid na ituldu na kiden ta dammang na alugen. Intu hala ya alug na Tiberyas.

²A dumadagdag hapa ya pake addu na tolay tekid, te ikayat da itan ya pakapangwa ni Hesus am pagmappyan na ya nagtatākit kiden.

³A ta datang nig Hesus ta dammang a gimon kid ta bagetayen, a sangaw nagibannag kid.

⁴Tanagay na hapa ya araw na Simana na Hudyo kiden am mangan kid ta panadamdaman da ta araw na nepangilillik na Namaratu ta gingginafu da kiden.

⁵A ta nepaglipay ni Hesus a naita na ya awan bababang na tolay nga dumadagdag tekid, te umabikan kid na tentu. A ya uhohug na te Felipe a “Felipe, mappya ta mangan ya tolay kiden nga dumagdag tekitam, ammi anu hud ya ialap tam ta kanan da?” kunna tentu.

⁶Ammi pangparuba na yen te Felipe, te dana nanonot na ya kwan na.

⁷A ya tabbag ni Felipe hapa a “Maski am itta mina tekitam ya pirak na matandanan ta lugar na annam na hulan a makalannat hud ya igatang na ta kanan petta makakakkap mina ya tagtakday tekid?” kunna.

⁸A i Andres hapa nga kabagis ni Pedru a nebar na te Hesus ya takday babagu nga nehulun ta tolay kiden.

⁹“Itta hala ya balun na babagu in ta lima na pan ikid na duwa na ikan, ammi makalannat hud yen kid ta kaddu na tolay kidin?” kunna.

¹⁰“A pagtuttudan muy mantu ya tolay kidin,” kun ni Hesus. A gafu ta kakaddatan hapa ye-yen na lugar a gituttudan kid na. A ya bilang na lalaki kiden la a itta de lima ribu kid.

¹¹A sangaw ginawat ni Hesus ya pan na babagu en, kapye na nepakimallak. A sangaw nepesaned na ta tolay kiden gituttudan, kumanen hapa ta ikan kiden. A sa nakakakan kid ta kaddu na nekayat da.

¹²A tekiden nabattug a “Uknudan muy ya nagadgadwa kiden nga nahuna, petta aweda makenga,” kun ni Hesus ta ituldu na kiden.

¹³A inuknud da kid, a pinannu da ya mafulu duwa na la-ba ta nehuna na nagkakan kiden ta lima kiden pan.

¹⁴A gafu ta naita na tolay kiden ya pakapangwa ni Hesus ta nepagpakaddu na ta pan kiden a “Talaga ta ye-yan na tolay ya kinan da en nga paguhohugan na Namaratu nga ange kan ta lutakin,” kun na kadwan kiden tekid.

¹⁵A narikna ni Hesus ta tanagay enda gafutan, petta pagbalinan da ta ari da, a yen ta nagtugutan na kid, a nagtoli tatakday ta utun na bagetayen.

¹⁶A sangaw ta marimat a imunnan ya ituldu na kiden nga dumagut ta alugen.

¹⁷A ta datang da ta barangay da en a gimon kid hapa, te gumanwat kid na dimakit, te dumatang kid na ta ili na Kapernayum. Ammi tentu en nagsugiram a awena para la dumatang ni Hesus tekid.

¹⁸A sangaw gafu ta nagsikan na ya paddaden a namegafun magpalung ya danumen, a magtagwan kid na mantu petta makatangngan kid ta alugen.

¹⁹A tekid na nakatagwan abat ta lima ono annam na kilumetru a neitan da ya magpapa-yat ta danumen, te umab-abikan ta barangay da en, a pake nakatalaw kid na hapa.

²⁰Ammi intu hala i Hesus, a nagayag hapa tekid, “Awemuy la magtalaw, te iyakin yan,” kunna.

²¹A gafu ta intu a mayat kid na mangitakay tentu. A tentun nakatakay a alistu kid na nakadatang ta lutaken nga datangan da.

²²A ya tolay kiden nga pinakan ni Hesus a itta kid para la ta dammang na alugen. A ta pagtalib na araw a dumatang hapa ya kadwan kiden barangay nga taga Tiberyas ta nanganan na tolay kiden ta pan kiden nga nepakimallak ni Hesus. A ta nepakkamu na tolay kiden ta awan na i Hesusen, a amu da ta awena nehulun ta ituldu na kiden, te ikid la ya nakalugan ta barangay, a tatakday la ya barangay da.

²⁴A gafu ta awan ig Hesus ikid na ituldu na kiden a naglalugan kid na ta barangay kiden nga bagu dumatang, te umange kid hapa ta ili na Kapernayum, te enda apagan i Hesus.

²⁵A ta datang da ta dammangen a naapagan da hala, a binaran da; “Mistro, kanu hud ya datang mu ta isin?” kunda tentu.

²⁶A ya uhohug na en tekid a “Kakurugan hala ya ibar ku tekamuy ta nagbannag kam nga mangapag teyak gafu ta nabattug kam ta nepakakan muy ta pan kiden, ammi maski am naita muy ya pakapangwak a awemuy para la maawatan ya naita muy.

²⁷Intu para apagan muy teyak ya kanan nga mewarad sangaw ta lutak, ammi bakkan mina ta yen ya pagbannagan muy, te ya awanen mewarad mina nga magnayun mangtolay tekamuy, te ye-yen na kanan ya iatad ku tekamuy, te iyak hala ya Tolayen Taga Langit nga pinasinapan ni Damakewan Namaratu ta pakapangwa na en,” kunna.

²⁸“A am mappya ta yen ya pagbannagan mi a anu mantu ya patarabaku na Namaratu tekami petta maatadan kami ta magnayun na pagtolayan nga kinam?” kunda hapa.

²⁹“Awan ta patarabaku na Namaratu tekamuy am bakkan la ta pangurug muy ta dinob na en, petta intu la ya ikatalak muy,” kunna ha ni Hesus.

³⁰A gafu ta uhohug na en tekid a nangibar kid na ta pakaitan. “Mappya mantu ta mamadday ka ta pakaitan mi ta pakapangwam. Anu hud ya makkwam nga megitta ta iningwa ni mina Moses, petta itta ya pangurugan mi teko.

³¹Te ya uhohug na Bibliya en a ‘Inatadan na kid ta kanan nga nagafu ta langit,’ kunna. A intu hala ya ‘Mana en’ nga nagtolayan na gingginafu tam kiden ta kalafukanen,” kunda.

³²A ya uhohug ni Hesus tekid hapa a “Kustu hala ya ibar ku tekamuy ta bakkan haman te mina Moses ya nangatad ta kanan nga nagafu ta langit am awa Damakewan. A ta ayanin intu hapa la ya mangatad ta kakurugan na kanan nga nagafu ta langit.

³³Te ya kanan nga iatad na Namaratu ewan a intu hala ya taga langitewan nga umakban ta lutakin, a yen ya mangatad ta magnayun na angat ta ngamin tolay ta paglelehutin,” kunna.

³⁴“Mappya mantu, Ser, ta ye-yen na kanan ya kanayun iatad mu tekami,” kunda tentu.

³⁵A ya uhohug ni Hesus ta nagadang kiden tentu a “Iyak hapa la ya kanan nga mangtolay. A ya ange mantu teyak petta mangan a awenan sangaw mabisin. A am ikatalak nak a awenan sangaw gimtang.

³⁶Ammi nebar ku paen tekamuy ta maski am naita muy ya tarabakuk a awedak haman ikatalak.

³⁷Ammi ya ngamin kiden iatad ni Damakewan ta kwak a yen kid sangaw ya magdulot teyak. A maski am inya sangaw ya ange teyak awek sangaw patugutan.

³⁸Te yen ta nagtugutak ta langitewan nga dumagut ta isin petta idulot ku la ya ikayat na nangidoben teyak, te bakkan ta ikayat kin ya tarabakun ku.

³⁹A uray na hapa ta awan sangaw ta mawakay ku ta ngamin kiden neatad na ta kwak, te tolayan ku kid ta pagaddetan na arawin yan.

⁴⁰Te ya uray ni Damakewan ta ngamin kiden mangnonot ta Anak na en ikid na mangikatalak tentu a maatadan kid sangaw ta magnayun na angat, te tolayan ku kid sangaw ta pagaddetan na arawin yan,” kunna.

⁴¹A gafu ta ‘Iyak ya kanan nga nagafu ta langitewan,’ kunna a yen ta linibakan na Hudyo kiden.

⁴²“Bakkan hud te Hesus yan nga anak ni Hose en? Amu tam haman ya dama na ikid na hina na, a had kukunna mantu nagafu ta langit?” kunda.

⁴³Ammi ya uhohug ni Hesus tekid a “Awemuy mina liblibakan ya inuhohug ken,

⁴⁴te nonotan muy mina ta awan ta makaange teyak am awena gamidan ni Damakewan nga nangidob teyak. A iyak hapa sangaw ya mangtolay tentu ta pagaddetan na arawin yan.

⁴⁵A dana nesurat hala yen ta lebru na pinaguhohug na en, te ya nebar na a ‘Namaratu sangaw ya mangituldu tekid,’ kunna. A ya magdangag ikid na mangitug ta ituldu ni Damakewan a yen kid mantu ya umange teyak.

⁴⁶Ammi maski kunna ten a awan para la ta nakaita te Damakewan am bakkan la ta Anak na en nga nagafu tentu, a iyak la mantu ya nakaita tentu.

⁴⁷“A pake ibar ku ha yan tekamuy, ya mangurug teyak, ittan ya angat na nga magnayun,

⁴⁸te iyak ya kanan nga mangtolay tentu.

⁴⁹Ammi ta kuman na gingginafu muy kiden ta kalafukanen, a maski sigida nangan kid ta Mana en nga nagafu ta langit a aweda hala magnayun ta kinān da en, te sa nagpasi kid hala.

⁵⁰Ammi ya kanan nga magafu ta langit a yen ya mangatad ta magnayun na angat, petta maski am inya ya mangan tentu a awena sangaw pake masi.

⁵¹A iyak hapa la ya kanan nga mangtolay nga nagafu ta langit, a am itta ya mangan ta isin na kanan a matolay sangaw magnayun. A ya kanan nga iatad ku, intu hala ya barikin, petta matolay mina ya ngamin tolay ta paglelehutin,” kunna.

⁵²A gafu ta uhohug ni Hesus a yen ya nagtatapilan na Hudyo kiden, te nagtatabbagan da am had kukunna iatad ya bari na tekid petta kanan da.

⁵³A yen ta nagbida ha i Hesus tekid. “Pake ibar ku tekamuy ta am awemuy mangan ta bari na Tolayin Taga Langit ikid na uminum ta daga na en a awemuy mesipat ta angat na.

⁵⁴Ammi ya mangan ta barik ikid na uminum ta dagak a ittan ya angat na nga magnayun, a iyak sangaw ya mangtolay tentu ta pagaddetan na arawin yan.

⁵⁵Te ya barikin ya kakurugan na kanan, a ya dagak ya kakurugan na inuman.

⁵⁶A ya mangan mantu ta barik ikid na uminum ta dagak a yen ya mesipat teyak, a iyak hapa ya mesipat tentu.

⁵⁷Ya Damakewan nga awan sangaw masi ya nangidob teyak, a matolayak hapa gafu tentu. A kumanen hapa ta manganen teyak, te matolay hapa gafu teyak.

⁵⁸A ya kanan mantu nga bidan ku tekamuy a nagafu hala ta langit, ammi bakkan ta kuman na kanan na gingginafu muy kiden, te maski nangan kid a sa nagpasi kid hala. Ammi ya mangan ta iatad kin nga kanan a matolay hala sangaw nga magnayun,” kunna.

⁵⁹A ye-yen na bida ya nepadangag ni Hesus ta umag na kapilya na Hudyo kiden tentu en nangituldu ta ili na Kapernayum.

⁶⁰A ya tolay kiden nga dumagdag te Hesus ikid na nakadangag ta netuldu na en a addu tekid ya malussaw ta bida na en. “Kuga mazigat ye-yan na bida. Itta hud ya mayat magdangag ta kumanin?” kunda.

⁶¹A maski awan ta nangibar te Hesus a amu na hala ta libakan da ya binida na en tekid, a yen ta naguhohug ha tekid. “Anu? Matampa de ya pangurug muy teyak gafu ta nabidaken tekamuy?

⁶²A anu sangaw ya pangawatan muy ta inuhohug ken am maita dak sangaw nga timullu ta langitewan ta dana nagyanan ken?

⁶³Awan mantu ta iatad na bilsag ku ta kappyanan muy, te intu la mangtolay tekamuy ya Kahalwa na Namaratu. A ya uhohug ku kiden tekamuy ya pagyanan na Kahalwa na en ikid na pangpatolay na ta ngamin kiden mangurug.

⁶⁴Ammi itta ya kadwan tekamuy nga awan mangurug. A yen ta nebar ku tekamuy ta awan sangaw ta makaange teyak am awena uffunan ni Damakewan,” kunna. A yen ya nebar na tekid, te addet ta nepamegafu da en nga dumagdag tentu a dana amu na ya awan kiden mangurug tentu, ikid na am inya sangaw ya mangitalaba tentu.

⁶⁶A gafu ta kumanen a nagtalekud na ya addu na dumagdag kiden tentu, te awedan nakihulun tentu.

⁶⁷Ammi itta la ya mafulu duwa kiden nga sigida itultuldu na. A ya nebar na tekid a “Anu hapa ya uray muy? Ikayat muy hapa de magtugut teyak?” kunna.

⁶⁸A ya tabbag ni Pedru a “A itta hud ya takwan na eyan mi, Afu, petta yen hud ya dagdagan mi? Te iko la ya pakadangagan mi ta uhohug kiden nga mangatad ta magnayun na angat.

⁶⁹A nangurug kamin teko, te amu min ta iko ya kagitta na Namaratu ewan nga nagafu tentu,” kunna.

⁷⁰A ya uhohug ni Hesus tekid ngamin a “Nonotan muy ta iyak hapa la ya nangpili tekamuy petta mafulu duwa kam, ammi amuk ta kahulun ni Satanas ya takday tekamuy,” kunna.

⁷¹A intu binida na i Hudas nga anak ni Simon Iskaryote, te maski nebilang ta mafulu duwa kiden a intu hala sangaw ya mangitalaba te Hesus.