Genesis 9

1

2

3

4

6

7

8

9

11

12

13

14

15

16

17

18

19

21

22

25

26

28

35

37

39

40

41

42

45

46

48

49

50

¹Ma God Noah natunatuna maiteni i viaiaini ma i riwei i pa, “Ona vinatuna ma ona vimaḡaimi da dobu ona vioai.

²Ana kauei da ḡamoḡamo ḡaeḡaei ma ḡamoḡamo tetetei, iana ma kiu, anatapui ina rovoemi. Ma au urami ana terei da ona vibadei.

³Aiwai anatapui lawalawai ami aniam. Modu anoi ma ai uana a veremi, wate marina aiwai anatapuna a vereveremi ami aniam.

⁴—Wate vioa taratarana eḡa ona ani, aubaina tara au orana lawana e mamae, ona voterei da tarana ina toi tawanana ma muriai ona ani.

⁵Ma mepa da ḡamoḡamo rava i viraḡeni. Tau ana raubiwa, wate nanare rava, rava turana i viraḡeni. Tau ana raubiwa.

⁶Tau rava a kauei me tau inanau nanare, ma lamna aubaina Rava aiai i viraḡena, rava ḡelauna tauna ina viraḡeni.

⁷Ma tam natunatum ina maḡa da am epaepaia dobu ina maena-pai.”

⁸Ma God Noah natunatuna maiteni i riwei i pa,

⁹“Ona rautaniḡana wei marina, Tau au parivainuaḡana bagibagina taumi ami epaepaia maiteni a kaukauei.

¹⁰Ma ḡamoḡamo lawalawaii anatapuna, kiu ma ḡamoḡamo numei ma moduei ma anatapui wagei i opuopu, ma ḡamoḡamo anatapui muriai au dobu ina mae.

¹¹Wei riwanei au parivainuaḡana bagibagina taumi maiteni a terei da eḡa melanai ututuva ḡelauna ana paritawanana-meleiai au dobu da purapura lawalawaii ina vipupui.”

¹²Ma God i riwa, “Parivainuaḡana bagibagina a kaukauei taumi ma anatapui lawalawai maiteni anatapui muriai e nenei. Wei parivainuaḡana matairana wenanare:

¹³Warilolo au apau ana terei da ina vimataira da tau au parivainuaḡana bagibagina a terei tau ma taumi ma anatapui lawalawai au dobu maemaei.

¹⁴Maranai mara e ḡuvaḡuvai ma warilolo au apau e eḡaeḡa,

¹⁵lamna ina vieḡeu da au parivainuaḡana bagibagina tau ma taumi ma anatapui lawalawai au dobu. Ma eḡa melanai ututuva lawana ina vipupui.”