1Isaac Jacob i kwatuei, i viaiaini ma i riwei i pa, “Eḡa au Canaan awam ma vaia,
2wate ma vomairi ma ma nelaḡilaḡina au Padan-Aram, ḡoḡam Bethuel ana au dam ma kampa avum Leban natunatuna waivinei e mamae, kampa awam ma vaia.
3Ma God Vivirewapana Kaukauana am tavine ina viaiaini ma ina viuaim ma natunatum ina vimaḡai ma tam dam borui ḡaeḡaei ina viamanem.
4Ma tam am epaepaia maiteni ina viaiainim me Abraham i viaiaini nanare, da dobu marina e mamae-gubai, God Abraham i verevereia tam ma vibuderiei.”
10Jacob Beersheba i netawanei ma i nenae au Haran.
11Madeḡa i neulai ma gabu au tagogi, i ḡeta ma i rauvirai da i matave ma ḡaima tagogi i vaia ma i viunutanei.
12Ma i rauboni da tete i ʼnanai, karena au dobu ma damona au mara ma God ana anela i ḡeḡae ma i ḡaiḡaira.
13Ma bada, au ririvana i maimairi ma i riwa i pa, “Tau bada, Abraham ma Isaac ai God, dobu e matamatave lana tam ma am epaepaia ana veremi.
14Ma am dam ana vimaḡai da me doa pokauna ma ai parata ana viratai au lavaratei, rauanaḡei ma karuwabuei. Ma am epaepaia maiteni taumiei rava anatapui au dobu ana viaiaini.
15Ma notai da tau au ririvam a mamae ma ana painim am au vaḡai. Ma ana neiana-meleiaim wei au dobuna. Eḡa ana voterem da aiwai a parivainuaḡanim ana kauei.”
16Jacob i matave vomairi ma i riwa i pa, “Bada anina weka e mamae ma tau eḡa ata aramanei!”
17Jacob i rovo kaua ma i riwa i pa, “Wei dobuna i vinirovorovo ḡaḡa! Wei anina God ana numa, Mara ana metaeta.”
18Ubaubanai boiboḡi Jacob i vomairi ma ḡaima i viviunutaneia i vaia ma i vitura-mairini da ita vimataira. Ma Olive monamonana i buloi ḡaima au tepana da i vovivirei God aubaina.
19Dobuna i ḡorei Bethel (Melagaina au naona i ḡoreḡorei Luz).
20Ma Jacob, Bada awarina i parivainuaḡana, “Mepa da tam au ririvau ma mae ma ma inana vaiteteu au vaḡai, lam ma gara ma vereu.
21Ma lawalawaiu ana nememei amau awarina, lamna maranaina Tam tau au God.
22Ma wei matairana a tereterei, weka ana viborumem, Ma aiwai u verevereu ana gimai da ḡuta 10 ma ḡuta tagogi ana veremelem.”
