Genesis 22

1

2

3

4

6

7

8

9

11

12

13

14

15

16

17

18

19

21

22

25

26

28

35

37

39

40

41

42

45

46

48

49

50

¹Madeḡa maḡamaḡa i kwa ma muriai God Abraham ana tumaḡana i raudadani. God i riwa i pa, “Abraham!” Abraham i paribelei i pa, “Tau weka!”

²Ma God i riwa i pa, “Natum tagotago Isaac nuanuam pouna, ma taravaini ma ona nae au dobu Moriah. Ma ola ana viatataem, kampa natum ma puloei aniamapu.”

³Mara i tom ma ubaubanai boiboḡi, Abraham i vomairi, ai i edari pulo apunana aubaina ma ana donki i vokaukauei. Ma ana taunola ruaḡa ma natuna Isaac i taravaini ma anatapui i nae gabu God i ririweiana kampa.

⁴Taui au pom tonuḡa i babara ma Abraham i taepai ma gabu aueia i ʼnanai.

⁵Ana taunola i riwei i pa, “Weka ona mae. Donki ona paini. Tau natu maiteni ana nae nore ma God ana viborumei. Ma airuaḡa ana nememei awarimi.”

⁶Ma Abraham ai i tavana Isaac i viavarai. Tauna naipi ma ai mutuara i voai ma i negogona.

⁷Taui i nenae ma Isaac i riwa i pa, “Amau!” Abraham i riwa, “Ee, ma babani natu!” Isaac i riwa, “Ai ma ai mutuara awarita wate pulo aubaina sipu natuna mepa?”

⁸Abraham i paribelei i pa, “Natu, God sipu ina vereta pulo aubaina.” Ma airuaḡa i babara nae.

⁹Maranai gabu God i ririweiana i ḡeta, kampa aniamapu ḡaimei i voai ma ai i vatari. Ma natuna Isaac urana ma aena i raḡini ma aniamapu au tepana, ai i vatavataria kampa i vimataveni.

¹⁰Abraham urana i viloloi da naipi i vaia da natuna ita viraḡeni.

¹¹Wate lamna maranaina Bada ana anela marei i riwa, “Abraham, Abraham!” Abraham i paribelei, “Tau weka!”

¹²Ma Bada ana anela i riwa, “Eḡa natum ma viraḡeni! Eḡa aiwai apoapoena awarina ma kauei! Tam natum tagotago eḡa uta nuanei ma marina a aramanei da tam anina God e vivivirei.”

¹³Abraham i taepai ma sipu orotona i ʼnanai, donana ai raḡaraḡai potopotona au orana i tapaiei. Ma i nae ma sipu i viraḡeni ma sia taputapuna i apui ana pulo God awarina, natuna epaiana.

¹⁴Ma lamna aubaina wei dobuna i ḡorei, “Bada ina verena.” Lamna marana da marina rava e ririwa, “Bada ana au ola ina verena.”

¹⁵Ma Bada ana anela marei Abraham i ḡorei

¹⁶“Bada i riwa, ‘Tam u voteleteleu ma natum tagotago eḡa uta nuanei. Tau wavauei a paripari-vainuaḡanim da

¹⁷anina ana viaiainim ma am epaepaia ana vimaḡai me ubona au mara ma bubu au gera. Taui ai ḡavia ina vovaiubai ma ai melagai ina vaia.

¹⁸Ma am epaepaia wavaiei dam anatapui au dobu ana viaiaini. Tam u voteleteleu aubaina wei ana kauei.”

¹⁹Ma Abraham natuna maiteni i nae me ana taunola awari ma anatapui i nae me au Beersheba. Ma kampa i mae.