Genesis 17

1

2

3

4

6

7

8

9

11

12

13

14

15

16

17

18

19

21

22

25

26

28

35

37

39

40

41

42

45

46

48

49

50

¹Maranai Abram ana madeḡa 99 ma Bada i vieḡana-melei Abram awarina ma i riwei i pa, “Tau God Vivirewapana Kaukauana. Au naou ma babara ma kaua aiaina ava ma kauei

²da nanare au Parivainuaḡana bagibagina ana vovai-virewapani tau ma tam awarita ma am dam ana vimaḡa-guratei.”

³Ma Abram i mae-ḡaira au doa ma i raudune. Ma God Abram i riwei i pa,

⁴“Tau au navanava au parivainuaḡana bagibagina tam maiteni wenanare: Ana kauei, da dam patarana maḡamaḡaui tam ina viamanem.

⁵Ma marina wavam Abram, ana terevirai da Abraham; aubaina marina ana kauei da dam patarana maḡamaḡaui ina viamanem.

⁶Ma ana kauei da am epaepaia ina maḡa ma am damei gulau maḡamaḡaui ina nei.

⁷Au parivainuaḡana bagibagina ana vovai-virewapani, tau ma tam ma am epaepaia muriai e nenei da tau am God ma taui ai God.

⁸Canaan dobuna taputapuna marina e mamae-gubai, tam am epaepaia maiteni ana vere-nonoemi aubaimi ma tau, taui ai God.”

⁹Ma God Abraham i riwei i pa, “Ma au parivainuaḡana bagibagina, tam ma am epaepaia maiteni ona voteletelei.

¹⁰Wei taumi ami au navanava parivainuaḡana bagibagina ona voteletelei, ami nelara anatapui inii ina bori.

¹¹Ma taumi inimi ona bori, lamna ata parivainuaḡana matairana.

¹²Roaroa melamelai nelarai i tupua ma au pom 8 au murina inii ona bori. Wei kauana ona kauei, natunatumi nelarai ma ami taunola natunatui nelarai ma nelara anatapui am au numa e vivitaunola.

¹³Riwa kaua, maranai roaroa nelarai i tupua am au dam bo maranai taunola o gimarai, taui au mataira lamna inii ona bori. Lamna au parivainuaḡana matairana au tupuami ina mae-nonoa.

¹⁴Wate aiai orotona nai matairana eḡa au tupuana, lamna au parivainuaḡana bagibagina i viaigai ma lamna aubaina tauna ina viravaḡela.”

¹⁵God Abraham i riwei i pa, “Awam eḡa ma ḡorei Sarai, wate ma ḡorei Sarah.

¹⁶Tau ana viaiaini ma natum orotona ina vitupui. Anina ma ana viaiaini da ina vidam ḡaeḡae aloi. Ma dam ai gulau maḡamaḡaui taunei ina opu.”

¹⁷Abraham i mae-peu ma i raudune ma i mutu-kaka ma au nuanuana i pa, “Amapo oroto ana madeḡa 100 ma ina vinatuna bo? Ma Sarah ana madeḡa 90 ma ina vinatuna bo?”

¹⁸Ma Abraham God i riwei i pa, “Ma Ishmael menanare, uta viaiaini bo eḡa?”

¹⁹Wate God i riwa i pa, “Eḡa! Awam Sarah natum orotona ina vitupui ma ma viwavai Isaac. Au parivainuaḡana bagibagina tauna awarina ma ana epaepaia awarii ina mae-nonoa.

²⁰Ma Ishmael aubaina, am nuabola a nonori. Ana viaiaini ma natunatuna ana vimaḡai ma ana epaepaia ana vituai. Tauna dam 12 ai babada amai ma ana epaepaia ai dam ana vimaḡai.

²¹Wate au parivainuaḡana bagibagina ana kauei Isaac maiteni. Ma wei marana nanare, madeḡa ḡelauna Sarah, Isaac ina vinatunei.”