1Alla kumara ka baraka don Nuhan ni a dencɛilu rɔ. A ka a fɔ alu yɛ ko: «Ai ye jiri ka siyaya duukolo fan bɛɛ rɔ ka a fa.
2Nimafen bɛɛ ri silan ai yɛ kosɛbɛ. Waa rɔ soboilu wo, so kɔndɔ kolofenilu wo, kɔnɔilu wo, jɛɛilu wo, ni nimafen misɛn mɛnilu ye taamala duu ma, wo bɛɛ ri silan ai yɛ. Alu bɛɛ ri kɛ ai la fanka kɔrɔ.
3Nimafen bɛɛ ri kɛ balo ri ai yɛ. N ka suman di ai ma ɲa mɛn ma, n ye nimafenilu fanan dila ai ma ɲa kelen wo le ma.
4Kɔni ai kana sobo ni a jeli damun muumɛ! Baa a nimaya ye a jeli le rɔ.
5Ni sobo do ka mɔɔ jeli labɔ ka a faa, sobo wo ka kan ka faa. Ni mɔɔ do ka a mɔɔɲɔɔn faa, wo fanan di faa.
6Nde Alla ka mɔɔ dan ka a kɛ n jɛrɛ munuɲa le ri. Wo rɔ, mɔɔ mɔɔ wa a mɔɔɲɔɔn jeli labɔ ka a faa, mɔɔ ri wo fanan jeli labɔ ka a faa.
7Nba, ai kɔnin, ai ye jiri ka siyaya. Ai ye sɛrɛya ka siyaya duukolo fan bɛɛ rɔ ka a fa.»
8Alla ka a fɔ Nuhan ni a dencɛilu yɛ ko:
9«Sisen teriya ri tɔ nde ni aile tɛma, a ni ai bɔnsɔn mɛn ye nala ai kɔ
10a ni duukolo nimafen, mɛn bɛɛ tɛrɛ ai kun, fen fen bɔra ai fɛ kulunba kɔndɔ, kɔnɔilu wo, so kɔndɔ kolofenilu wo, waa rɔ soboilu wo.
11Teriya ɲin ye tɔla n ni duukolo nimafen bɛɛ tɛma. Ji dunba tɛ nimafen bɛɛ halaki butun. Ji dunba tɛ kɛ butun ka duukolo bɛɛ tiɲan.»
12Alla ka a fɔ ikɔ ko: «N ye teriya mɛn tala ai yɛ a ni ai bɔnsɔn bɛɛ ni nimafen bɛɛ fo habadan, wo tɔɔmasere le ɲin di.
13N di nincinankan labɔ san fɛ bandafin kɔrɔ. Nincinankan wo le n na teriya tɔɔmasere le ri, n ye teriya mɛn tala dunuɲa bɛɛ yɛ.
14Tuma tuma, ni n ka bandafin nadɛn duukolo kun na, ni nincinankan fanan bɔra,
15wo rɔ, n di n hankili bila n na teriya rɔ, n ka mɛn ta ai ni nimafen su bɛɛ yɛ. N tɛ ji siyaya ka a kɛ ji dunba ri butun ka nimafen bɛɛ halaki.
16Nincinankan wa bɔ bandafin kɔrɔ, n di wo yen ka n hankili bila n na teriya banbali rɔ, n ka mɛn ta duukolo nimafen su bɛɛ yɛ.»
17Alla ka a fɔ Nuhan yɛ ko: «N da teriya mɛn ta duukolo nimafen bɛɛ yɛ, wo tɔɔmasere le wo ri.»
18Nba, Nuhan dencɛ mɛnilu bɔra a fɛ kulunba kɔndɔ, woilu le tɛrɛ Sɛmu ni Kamu ni Jafɛti ri. Nuhan dencɛ sawa le woilu ri. Woilu le bɔnsɔn jɛnsɛnda ka se duukolo fan bɛɛ rɔ. Wo rɔ, Kanaan fa le tɛrɛ Kamu ri.
20Nba, Nuhan ka sɛnɛ damira. Ale le fɔlɔ ka rɛsɛn fɛ sɛnɛ.
21Lon do rɔ, Nuhan ka rɛsɛnji do min ka a ɲa laminin. A fari makolon lani tɛrɛ a la faaninbon kɔndɔ.
22Kanaan fa Kamu ka a fa Nuhan fari makolon yen, ka wa wo fɔ a badenma fila yɛ lu ma.
23Sɛmu ni Jafɛti ka durukiba ta ka a la alu kamannakun kan ka don alu kɔnkɔma alu fa la faaninbon na ka alu fa sutura. Alu ma sɔn alu ɲa yen na alu fa kan, kosa alu kana a fari makolon yen fewu.
24Nba, rɛsɛnji ka Nuhan bila tumana mɛn na, a dencɛ doomani Kamu ka ko mɛn kɛ a la, wo fɔra a yɛ.
25Wo rɔ, Nuhan kan ko: «Alla ma tɔrɔya lara Kamu dencɛ Kanaan kan. Ka a kɛ a kɔrɔcɛilu la jɔntajɔn di, Alla ma wo kɛra.»
26Nuhan kan ko: «N di Allabatala tando, Sɛmu Maari Alla kɔnin. Alla ma Kanaan kɛ Sɛmu la jɔn di, Alla ma wo kɛra.
27Alla ma Jafɛti bonyara, Ka a bɔnsɔn sii Sɛmu bɔnsɔn fɛ, Alla ma wo kɛra. Alla ma Kanaan kɛ alu la jɔn di, Alla ma wo kɛra.»
28Nba, ji dunba tamin kɔ, Nuhan ka san kɛmɛ sawa ni san biloolu le kɛ.
29A si bɛɛ ladɛnni kɛra san kɛmɛ kɔnɔndɔ ni san biloolu le ri. Wo bɛɛ taminni, a sara.
