Jenesis 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Odocob Aisak uqa Jekob utadocob hocob eeldudu je gagadic madon, “Hina Kenandec caja cain ogaun.

²Cajimeg Mesopotemia hina asin Betuel uqana guc ono nuimeg hina memen Leban uqa ategul eundec oso hinana cajanu oga.

³Anut Gagadicca Bahic hina eelheiale. Odimei uqa odocob hinana sihul eu mati bahic caligian. Hinana sihul hatuhatu mati bahic caloqagan.

⁴Uqa Ebraham eeldon eu odiwe hinaca hinana sihulca eeladigian. Euqa maha i Anut uqa Ebraham uton eu hina biliga eu ogan,” don.

⁵Odocob Aisak Jekob suldocob uqa Lebanca Mesopotemia onoca nuen. Leban uqa Betuel melah. Ale Aram dana. Leban uqa Rebeka cebinag. Rebeka uqa Jekob Isoca anala.

⁶Aria Iso uqa Aisak Jekob eeldudu je eu madumei caja oso ocnu suldocob Mesopotemia nuen don. Aisak uqa je odi Jekob madon, “Hina Kenandec caja oso cain ogaun,” ec madodon Iso uqa don.

⁷Jekob uqa memeg anagca conola toodumei Mesopotemia nuen euha Iso uqa don.

⁸Odocob Iso uqa memeg Aisak Kenandec caja ocnu waug qee nijel eu fen.

⁹Eunu uqa Ebraham melah Ismalca nuimei caja haun oso, ijan Malahat, on. Malahat uqa Nebaiot cebinag. Euqa uqa caja casac cedalen eu qee ititacalel.

¹⁰Aria Jekob uqa Biasiba culimei Haran isec nuen.

¹¹Uqa nunuen cam casi leceb cudun osona witic meceb us nijigiannu bilen. Odocob uqa eunadec meen oso umei ilona tet qumei cosoli nijen.

¹²Odocob uqa us ninijei bebelen. Uqa bebelii edi fen. Wadowad oso naha eu mahana qudoc naha eu ti sao qududoc fen. Wadowad euna Anutna ensel age wadowad eu tobi toni eegin meciaden.

¹³Oodon eu uqa Tibud cemenug tatawen fen. Odocob uqa madon, “Ija Tibud, ija Ebraham Aisakca alena Anut. Maha hina nijiga eu ija hinaca hinana sihulca adigen.

¹⁴Hinana sihul euha age mati bahic caloqagan. Age maha bobos cinigwe caloqagan. Odimeig maha hagen cunug ihoc loqagan. Hinaca hinana sihulca agenu dana sihul cunug mahana biluqagan eu eeladec oqagan.

¹⁵Aria faga. Ana nuegan eu ija hinaca belewan. Bebeleu ija cofhigen. Euha ija maha ina ceseli ahu mihigen. Ija hina qee culihigaun. Ija hinaca bibilig li je cunug mahiga eu odigen,” don.

¹⁶Odocob Jekob us nijecnadec seli cajimei maden, “Mele bahic, Tibud uqa cudun ina bilia eu ija qee dolom,” en.

¹⁷Odimei uqa cucuii maden, “Cain. Cudun i cucuianca bahic. Mele bahic i Anutna jo. I sao cebec,” en.

¹⁸Eunu Jekob uqa qasil bahic cajimei meen uqa tet qu nijen eu umei dahig biligiannu gadac cehen. Odimei Anut utecnu mool meen eu tatac basecdon.

¹⁹Odocob uqa cudun eu ijan Betel qon. Weleca taun oso cemenug nijoloi eu ijan Lus.

²⁰Odocob Jekob uqa Anut amegna je cagumei edi madon, “O Tibud, hinaca belimeu ija jicna cofteteg sab jecnuca lotoc tacecnuca itiga.

²¹Odimeg haun coftetem ija ceseli nui ija meina jona caligen. Hina odi odifeg hina ijana Anut bilegan.

²²Meen i ija cehiga eu Anutnu cuha fecnu cudun caligian. Ceteteh cunug hina itegan eu ija am 10na ila mimig am osahic eundec ceseli ihigen,” don.