Text copied!
CopyCompare
Bible Ni Thothup - Genesis

Genesis 12

Help us?
Click on verse(s) to share them!
1Me ga’ar SOMOL ngak Abram, “Mpag e nam rom, nge girdi’ rom, nge tabinaw rok e chitamam ngam man nga ba nam ni bay fin gu dag ngom.
2Bay gu gagiyeg nge yib owchem ni pire’ ni pire’, ni yad e bay ra manged girdi’en ba nam nib ga’. Bay gu fal’eg wa’atham mu gu gagiyeg nge gilbuguwan fithingam, me fel’ wa’athan e girdi’ ni bocham.
3Gu ra fal’eg wa’athan e pi’in yad ra fal’eg wa’atham, ma gu ra bucheg wa’athan e pi’in yad ra yibilayem ni nge kireb wa’atham. Urngin e nam nu fayleng e bay i fel’ wa’athrad ni bocham.”
4Nap’an ni gaman medlip i ragag nge lal e duw yangren Abram, me chuw ko fare binaw nu Haran, ni bod rogon ni yog SOMOL ngak ni nge rin’; me un Lot ngak.
5Me fek Abram Sarai ni le’engin, nge Lot ni fak be’ nib mo’on ni walagen, nge urngin ban’en ni immoy rorad nge urngin e sib ni yag ngorad u Haran, ma aram miyad yan ni yad be nameg e nam nu Kanaan. Fa’anra tawgad nga Kanaan,
6me milekag Abram nge yib i mada’ ko fa gin’en ni bay fare ke gek’iy ni oak riy u Moreh u lan e binaw nu Shekem. (Re ngiyal’ i n’em e ka be par e girdi’ ni kanog e Kanaanite ngorad u lan e re nam nem.)
7Me m’ug SOMOL ngak Abram me ga’ar ngak, “Irera’ fare nam ni bay gu pi’ ngak e pi’in ni owchem.” Me ubung Abram ba altar u rom ni fan ngak SOMOL nike yib i m’ug ngak.
8Tomuren e binem, me yan u rom ngalan e yimuch ko fare burey ni bay ko ngek ko binaw nu Bethel, me n’uf e pi tent rok u thilin yu Bethel ngu Ai, ni ba’ yu Bethel ko ngal ma bay yu Ai ko ngek. Miki ubung reb e altar u rom nge tayfan SOMOL me meybil ngak.
9Ma aram me yan u bang nga bang ni be sor i yan ko yimuch nu Kanaan.
10Machane bay ba uyngol u Kanaan nrib gel, ma aram me yan Abram u rom ngalan e yimuch nge mada’ nga Egypt, me par u rom boch ngiyal’.
11Nap’an nike yan ni nge th’ab e mathil ngalan yu Egypt, me ga’ar ngak Sarai ni le’engin, “Mu tiyilim ngog, gab pidorang.
12Ra guyem e girdi’ nu Egypt, mra lungurad, Re pin nem e le’engin Abram. Ma aram e yad ra thang e fan rog ni fan e ngar feked gur.
13Wenig ngom, mog ngorad ni gur be’ ni bpin ni walageg; ma aram e dab ra thanged e pogofan rog miyad ayuwegneg ni bfel’ ni bochan e walageg gur.”
14Fa’ani th’ab e mathil nge yan ngalan yu Egypt, me guy yu Egypt nib pidorang e bpin rok.
15Pi’in nib tolang ni yad bay nga tan pa’ Farao e ra guyed miyad weliy ngak Farao rogon feni pidorang e re pin nem, mi ni fek i yan nga tafen Farao.
16Ma bochan e re pin nem, mi i ayuweg Farao Abram ni bfel’ me pi’ ngak yu ran’ i saf nge kaming, nge garbaw, nge dongki, nge bogi ni’ ni sib, nge kamel.
17Me pi’ SOMOL e liliy nib gel nge yib ngak Farao nge girdi’ ni be par u tafen, ni bochan e ke fek Farao Sarai ke yan i tay nga tafen.
18Me l’oeg Farao be’ nge yan i pining Abram nge yib ngak, me fith ngak Abram ni ga’ar, “Ba mang e kam rin’ ngog? Mangfan nda mog ngog ni Sarai e bpin rom?

19Mangfan ni lungum e be’ ni bpin ni walagem, kug fek ni nge mang bpin rog? Ba’aray le’engim; mfek ngam chuwgow!”
20Me yog Farao ngak bogi pumo’on ni ngar uned ngak Abram nge bpin rok nge urngin e tin bay rok ngar ted Abram nga wuru’ e nam.