1Ba’aray e pi cha’ ni owchen Shem, Ham, nge Jafeth ni pifak Noah ni pumo’on. Ra fakyed boch e bitir ni pumo’on u tomuren fare sugbur ni tharey e fayleng.
2Pi pumo’on ni pifak Jafeth e Gomer, Mogog, Madai, Javan, Tubal, Meshek nge Tiras e yad e pi chitamngin e pi ganong ntunguy fithingirad ngay.
3Pi pumo’on ni pifak Gomer e yad e girdi’ ni owchen fa yuke girdi’ nu Ashkenaz, Rifath ngu Togarmah.
4Ma pi pumo’on ni pifak Javan e yad e girdi’ ni owchen fa yuke girdi’ nu Elishah, Spain, Syprus ngu Rhodes;
5yad e pi chitamngin urngin e girdi’ ni yad be par u dap’el’ay nge daken e pidonguch. Yad e pi’in owchen Jafeth, nra bagayad ma nam rok nge ganong rok nge birok e thin.
6Pifak Ham ni pumo’on e Kash, Egypt, Lybia nge Kanaan, irera’ e pi ngachal nni tunguy ko pi ganong ni yib ni owcharad.
7Pi’in owchen Kash e yad e girdi’ nu Seba, Havilah, Sabtah, Raamah ngu Sabteka. Pi’in owchen Raamah e yad e girdi’ nu Sheba ngu Dedan.
8Min gargeleg be’ nib pagel ni fak Kush ni Nimrod fithingan me yan i par ni ir e bin th’abi som’on e girdi’ u fayleng nib falu’ ni i mael ngi i kol boch e nam.
9Bochan e fal’egwa’ath rok SOMOL ngak, me par nri kub cheag ko mokol gamanman, aram fan ni tabanathin u langan e girdi’ ni yad ma ga’ar, “I SOMOL e nge ayuwegnem ngam mang be’ nib cheag ko mokol gamanman ni bod Nimrod!”
10Mu’un yu Babylon ko gin ni i gagiyegnag ni som’on nge yu Erek ngu Akkad. Dalip yang i n’ey e bay u lan yu Babylonia.
11Me chuw u rom nge yan nga Assyria me yan i ngongliy e binaw nu Niniveh, Rehoboth Ir, Kalah,
12ngu Resen ni bay u thilin yu Niniveh nge yu Kalah ni ireram fare binaw nib gilbugwan.
13Pi’in owchen Egypt e yad e girdi’ nu Lydia, Anam, Lehab, Naphtuh,
14Pathrus, Kasluh, ngu Crete, ni yad e sum owchen e Filistine rorad.
15I Kanaan e chitamngin Sidon ni ir e bin nganni’ i fak, nge Heth,
16Jebusites, Amorites, Girgashites,
17Hivites, Arkites, Sinites,
18Arvadites, Zemarites nge Hamathites. Pi ganong rok Kanaan ney e garer i yan
19ngranod ra tawgad ko yimuch u Sidon i yan nga Gerar nge mada’ nga Gaza, ma ku’ur garergad i yan ngalan e ngek nga Sodom ngu Gomorrah ngu Admah ngu Zeboiim nge mada’ nga Lasha.
20Irera’ e pi’in owchen Ham nra bagyad ma nam rok nge ganong rok nge birok e thin.
21Shem ni nganni’ rok Jafeth ni walagen, e ir e chitamngin urngin e Hebrew.
22Ma pifak Shem ni pumo’on e Elam, Ashur, Arpakshad, Lud nge Aram.
23Ma pi’in owchen Aram e yad piyu Uz, Hul, Gether, ngu Meshek.
24Mi Arpakshad e ir e chitamngin Shelah ni chitamngin Eber.
25L’agruw e pagel ni fak Eber: Reb e ni tunguy Peleg ngak ni bochan e ngiyal’nem e yibe ki’eg e girdi’ u fayleng; ma bagyow e ni tunguy fithingan ni Joktan.
26Ma pi’in owchen Joktan e yad e girdi’ nu Almodad, Shelef, Hazarmaveth, Jerah,
27Hadoram, Uzal, Diklah,
28Obal, Abimael, Sheba,
29Ofir, Havilah, ngu Jobab. Yad urngin nrabad rok Joktan.
30Nam ni ur pired riy e yan u Mesha nge yan i mada’ nga Sefar ni bay u fithik’ e burey u lan e ngek.
31Irera’ e pi’in owchen Shem nra bagyad ma nam rok nge ganong rok nge birok e thin.
32Pi girdi’ ney e yad e pi’in owchen Noah nra bagyad ma rogon tha’an nib ul ul i yib nge nam rok. Ma urngin e girdi’ u fayleng e yib rok pifak Noah u tomuren ni tharey e ran e fayleng.
