Text copied!
CopyCompare
Alyawarr Bible - Genesis

Genesis 12

Help us?
Click on verse(s) to share them!
1Akngey angkek Abram-warl, “Apmer nhanyem iwerl-alha ngkwenh-rnem-akert, apmer atharl ngkweng iylparrernem-warl alpemel.
2Atha ngenh arntarnt-arayntem apmer ilenhek, akngerr-anem atha ngenh anthem, akngerram-akngerr irretyek. Ingkerrenhel ngenh iterl-arayntem. Ngkwenh-rnem-angkwarr angka atyenh arlpimpirreyenh, apmer arrpanenh-angkwarr, ingkerrenhel ayenh iterl-arayntetyek-awaty.
3Ingwer-rnem mwerr anayntem ngkweng-itwel, ayeng mwerr arrpemarl ikwer-rnem anayntem. Alakenh-anyem ahern-areny ingkerrenh ngkweng inkwerelhetyek. Ingwer-rnem ngkweng awelhey-angenh, rernemarl apmwangkwarr apenteyenh, atha renh-rnem arntety anthemarl.”
4Abram aherrety 75 anenh, artwa ampwanem, Akngeyelarl ilek apmer ingwer-warl-anem ra alpetyek. Abram Akngeyek awelhek. Anew ikwerenh Sarai ampikw ikwerenh Lot, ampwal ilek-ilek ingkerrenh warrkenh-rnem-then, rernemarl apmer Canaan ikwer-warl alpek.
6Abram ra arwerl ilkwewarl, arwerl arnenty ikwer-warl alhek, ikwerenh-rnem-akert. Abram arwerl arnenty apmer Moreh ikwer-warl alhek, apmer Shechem-itwek. Canaan-areny-rnem arrwekel-antey apmer ikwer-itwek anenh.
7Akngey Abram ikwer aremirrek. Renh ilek, “Atha ngenh apmer nhenh anthetyek, ngkwenh-rnem-akert intem-antey.” Abram ra apwert ilperr-ilperr-anem arrernek Akngey aker tyenkerr anthetyek inkwerelhemel.
8Abram ra Bethel apmer akngerrakw-ampeny-warl alhek, rap ampepel ayntenhek apmer Ai-arrangarr. Kalikw-anem artek. Ra apwert ilperr-ilperr ingwer-anem arrernek, Akngey ikwer kwenirremel inkwerelhek.
9Ikwer-penhan ra antekerr-anem alhek, apmer arlpaw-ampeny-warl.
10Apmer arrpanenh Canaan-ampenyel, amern lyapey-angenh-anem ra arenh, aherrety innganem.
11Abram-then Sarai-then Egypt-warl rernem alpek, amern-angketyarr-warl atherrkeny-ampeny-warl. Abram iterremel angkek anew ikwerenh-warl, “Egypt-warl alhenty nga angkwerey atyenh-arrpantey ilelha ingwer-rnemek. Egypt-arenyel inngerr mwerr-angker ngenh arey-ayntenty, ayenharl rernem atwekerr, ngkweng-they angwarekerr.”
14Rernem Egypt ikwer-warl alhek. Egypt-arenyel renh arek ra mwerr-angker innga. Atyetyart ilkwel-rnem Pharoah-an ilek Sarai renh. Artwel-rnem Sarai renh akngek Pharoah-kenh apmer-warl.
16Pharaoh rarl iterrek Sarai ikwer Abram-kenh angkwerikwek-athen, ra Abram renh ingkerrenh anthek, yep-yep-rnem-then, pwelek-rnem-then, tangkey-rnem-then, warrkenh-rnem-then, kamwerl-rnem-then ingkerrenh anthek.
17Atyetyart ilkwa rarl Sarai renh apmwangkwarr ikngwey-ayntek-they, INGKARTel Pharaoh-kenh-rnem arntety ilkwanem anthek.
18Pharaoh-el ingwer ilanthek, Abram renh ikngwetyek, ratherr angkerretyek. Pharaoh ra angkek Abram ikwer-warl, “Ntwa atyeng iley-angenh arraty anew ngkwenh. Kel ineyna apmer nhenh-they alpemel. Apalel anew ngkwenh atha ikngwek.”
20Pharaoh-el ikwerenh-rnem thwenek, Abram renh artengewetyek, ratherr ampwal-rnem ikwer-atherrenh ingkerrenh akngeynetyek, apmer ingwer-warl alpemel.