Ezequiel 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Deunni, anmar birgambe-gakagwensakgus gaka nii-warbaagwad-ibagwengus, Babiloniaʼgi-bukwadgine, Bab-Jehová weyob anga sokalid:

²“Dule-machi, Egipto-rey-Faraónʼga, degi, bela e-dulemarga be soge: ‘Be-gandikidyobi, ¿doa guoe?

³Epenne, Asiria-yar Líbano-urwarga gusad. E-anagan yeerdakle gusad, e-gagan muamaksii gusad, matusulidba e-duku mogirse warmaksad.

⁴Diimar Líbano-urwar-dunguega imaksad. Diimar-napa-urba-aryomamaid, e-mas-nuedga gusad. E-malimar-dikarba, e-diwarmar aryomai gusad. E-diwar-e-anagan bela sapi-bamalad-ogsa gusad.

⁵Deyobi, Líbano-urwar sapi-bamaladba, bur bule matusuli gusad. Dii-yaisur egi-aryomaid-gusad-ulale, e-anagan-muamaksiid sugude gusad.

⁶Bela nuumar-gukudimaladi, e-anagangi uumar-urbedii gusmalad. Bela ibmar-durgan-sapurbarmaladi, e-anagan-muamaksiid-urba milenonidamalad. Bela dulemar-yar-baid-baidgi-bukwamaladi, urwar-e-anagan-urba, negsichigwadgi-ambikudii gusmalad.

⁷E-anagan-mullusur-nikadbali, bipisuli daklege gusad, yeerdaklege gusad. Ar diimar-yaisur-aryomaidgi e-malimar yoyoi gusad.

⁸Bab-Dummad-nainugi urwar-bamalad-gwichigusmaladi, wegiid-urwargi-obined, sategusad. Baryawar-sargwensaale, Líbano-urwar-anagan-nikadyob, e-anagan nikasulid. Wag-ulu-sargwensaale, Líbano-urwar-gagan-nikadyob, e-gagan nikasulid. Bab-Dummad-nainugi sapi-sargwensaale, Líbano-urwar-yeerdaklegedyob daklesulid.

⁹Ani an yeerdaklege, we-urwar imaksad, e-anagan-bukidar-nika an imaksad. Bab-Dummad-nainu-Edénʼgi, bela bamalad-sapimar egi nobdamalad.’ ”

¹⁰Degisoggu, Bab-Jehová-Bela-Gangued-Nikadi weyob soged: “Ar sapi matusur dungusad, na deyob-dungu-itogedba e-duku mogirse-warmakedse imaksad.

¹¹A-ulale, an obachad. Yar-baid-e-garganguedga an urmaksad, adi, e-isgusadba sabsur-odurdakegar.

¹²Dulemar-yar-baidsikmalad-bur-isganamar we-sapi sikmaloed, omukus mete namaloed. Yarmargi, nebagangi, e-anagan babatoed, bela e-anagan diwarmargi bibichis melledoed. Dulemar-yar-baid-baidgi-bukwamalad e-anagan-urba-negsichigi-dukudimalad wakite obes namaloed.

¹³E-saila-aimukus-maid-birgi nuumar e-uumar urboed. E-anagan-birgi, ibmar-durgan-ursirmaladi megmaloed.

¹⁴Weyob guoed, adi, diwar-dikarba sapimar-gwigwichid mer bar matusur dunguega, degi, amba sapimar-diigi-ise-oglegar-gwigwichid mer bar e-duku mogirse-moega, deyob guoed. Bela burgwemaloed, bela napa-yaba dogmaloed, degi, dulemar-napa-urba bato burgwar-mamaidse megdapmaloed.”

¹⁵Bab-Jehová-Bela-Gangued-Nikadi weyob soged: “Urwar dulemar-napa-urba-burgwar-mamaidse megidapid-ibagi, napa-urba-demar-naid, bukib-binsaed-ulale, odinguega an imaksad. E-sukamakmaid, degi, e-diwarmar an gasad. Urwar-ulale, an, Líbano-yar-bukib-binsaega imaksad, degi, bela sapimar dinguded.

¹⁶Urwar dulemar-napa-urba-odolemamaidmala, dulemar-burgwar-mamaidse an egwachagu, e-argwachad-binnasur-gochadba, dulemar-yar-baid-baidgi-bukwamalad wawanmakega an imaksad. Edénʼgi bela sapimar gwigwichid, Líbano-yargi sapimar-bur-yeerdakle gwigwichid, bur bule diigi-oglegwismalad, napa-urbali yeer-itosmalad.

¹⁷Bela eba-nanaimalad, e-anagan-urba, negsichigi-dukudimalad, degi, dulemar-es-suidgi-burgwismalad, eba napa-urba dulemar-burgwismamaidse dogsamarmogad.

¹⁸Edénʼgi sapimar-gwigwichid sargwensaale e-yeerdaklegedyob, e-dunguedyob daklesulid. Degi-inigwele, Edén-sapimarba napa-urba dogmogoed. Agi, dulemar-aku-an-dakmalad-abargi, degi, es-suidgi-burgwismaladmala megoed. ”Weyobi, Faraón e-dulemarmala burgoed. Ani an Bab-Jehová-Bela-Gangued-Nikad weyob soged.”