Ezekiel 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹U lan e bin m’on e rran ko pul ni dalip ko re duw ni ragag nge ta’reb ni gamad ba kalbus, me non SOMOL ngog.

²Ni ga’ar, “Fak e girdi’, mog ko pilung nu Egypt nge girdi’ rok: Uw fani gel gelngim! Mang e gu ra ta’reb nagem ngay?

³Ga bod e gek’iy ni cedar u Lebanon, Nrib fel’usun nib taglul’ papa’ngin, Nib ke gek’iy nib n’uw nike tun ko manileng.

⁴Bay e ran ni be ilalnag, Ma pi lul’ ni be yan u tan e but’ e be durwi’iy. Yad be tarannag e gin bay fare ke gek’iy riy Ma yad be pi’ e ran be yan nga urngin kaen e gek’iy u lan e loway.

⁵Bochan e rib fel’ rogon ni be fek e ran, Me ilal nge n’uw nib tolang ngak urngin kaen e gek’iy. Ma rib dib’ag papa’ngin mab nun’uw.

⁶Gubin mit e arche’ nrabad ra toyed tafen pifakrad nga papa’ngin, Gamanman ni malboch e rabad ra gargeleged pifakrad nga tanggin. Pi nam nu fayleng e urgifgad ko taglul’ riy.

⁷Rib fel’ ya’an fare ke gek’iy — Ya rib n’uw kaen, ma rib nun’uw papa’ngin. Likngin e ke yan nga’ar kedad ko ran u tan e but’.

⁸Dariy e gek’iy ni cedar u milay rok Got nra ta’reb rogon ngay. Dariy e gek’iy ni fir aramrogon papa’ngin, Ma dariy e gek’iy ni sycamore ni aramrogon pa’ngin. Dariy e gek’iy u milay’ rok Got ni aram fani fel’ ya’an.

⁹Kug ngongliy ni bfel’usun nib yo’or papa’ngin nike gerer. Gubin e gek’iy nu Eden u milay’ rok Got nike awan’ ngay.

¹⁰“Aram e ba’aray e n’en ni be yog SOMOL ni Th’abi Tolang, nganog ngom e n’en ni bayi buch ko fare ke gek’iy nike ga’ ke tun ko manileng. I tugul nge n’uw me ilal e ufanthin rok;

¹¹ma aram mug dabuy mug pag nga pa’ ba tagagiyeg nu bang. Ni nge pi’ ko re ke gek’iy nem puluwon e kireb rok ngak.

¹²Pi milekag nib kireb e leam rorad e ra th’eth’abed nga but’ miyad digey. Papa’ngin nge yochpa’ i tmal’gin e bayi mul nga daken urngin e burey nge loway u lan e nam. Urngin e nam ni ku’ur pired ko taglul’ riy e bay rchuwgad.

¹³Arche’ e bay i yib i toffan ko fare ke gek’iy nike thig ma gamanman ni malboch e bay u ranod u daken papa’ngin.

¹⁴Are chiney i yan ngaram e dakriy ba kaen e gek’iy, ni demturug fani yo’or e ran riy, nrayag ni n’uw nge ta’reb n’umngin ngay bayay ara yan tamal’ingin nge tun ko manileng ni aram fani tolang. Urngin kaen e gek’iy nike riya’ ni nge yim’ ni bod e girdi’, kar riya’gad ni ngar uned ko pi’in ni nge yan nga’ar ko fayleng ko yam’.”

¹⁵Irera’ e n’en ni be yog SOMOL ni Th’abi Tolang ni be ga’ar: “Rofen nem nap’an nra yan fare ke gek’iy ko fayleng ko yam’, e bay gu gagiyegnag e ran u tan e but’ nge tharay ni pow ko meyor ni m’ingan’. Bay gu taleg e lul’ ni dab kug pag e ran ko yoch pa’ i lul’ nge yan. Ni bochan e fare ke gek’iy e ke yim’, ma bay gu lumornag daken e burey nu Lebanon mug gagiyegnag gubin kaen e gek’iy u loway nge mororay.

¹⁶Nap’an ni gu ra yin’ fare ke gek’iy nga’ar ko fayleng ko yam’, ma lingan nra aw nga but’ e ra rur e pi nam riy. Urngin e gek’iy nu Eden nge urngin e gek’iy ni bfel’ rogon e ran riy u Lebanon nike yan ko bin nu ar e fayleng, e ra felan’rad ngak ko mul nike tay.

¹⁷Yad ra un ngak nga’ar ko fare fayleng ko yam’ ni ngar cheaggad ko pi’in kar mulgad. Ma urngin e pi’in ur pired u tan e taglul’ riy e bay ra weargad u gubin e nam.

¹⁸Fare ke gek’iy e aram fare pilung nu Egypt nge urngin e girdi’ rok. Dariy baken e gek’iy u Eden ni aram fani n’uw ni bfel’ ya’an. Ma chiney e ke bod ya’an e gek’iy nu Eden, bayi yan nga’ar ko fare fayleng ko yam’ nge cheag ko pi’in tadenen nge pi’in li’rad ko mael. I Gag e gu be non i Gag SOMOL ni Th’abi Tolang.”