Ezequiel 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Bab-Jehová anga sogded:

²“Dule-machi, Tiro-e-reyga be soge: Bab-Jehová-Bela-Gangued-Nikadi weyob sogye: ‘Be-gwagegi na be san-dummarba-itogedba sogsagusad: Ani an bab-dummadye. Muu-billiganbali bab-dummagan-e-rey-gangi an siiye. Ar bab-dummadyob na be ito-inigwele, ar bedi bab-dummad-sulid. ¡Unnila be dule gued!

³¿Ar Danielʼba bur be binsaed-ibedsi? ¿Ar ibmar-dukuar-mamaid be bela wissi?

⁴Be-binsaed-nika-guedba, be-ibmar-nue-wisidba, ibmar-nuegan bukidar be nikad. Be-ulugwagine or-bukidar, mani-bukidar be sabosad.

⁵Mani-onogedgi-arbaedi, be nue-wisid, a-ulale, mani-ibedga be gunonikid. Bukidar be-ibmar-nuegan-nikadba san-dummarba be imaked.’

⁶”A-ulale, ani Bab-Jehová-Bela-Gangued-Nikadi weyob soged: ‘Emide, bab-dummadyobi na be nue-ibmar-wisi imaked.

⁷A-ulale, dulemar-ainebarmalad begi duurmakdagega an imakoed. Dulemar-yar-baid-baidgi-bukwamalad-bur-isganamar an begi barmidagoed. We-dulemala, es-suidgi be-ogilogoed, be-yeerdakleged, be-nue-binsaed-nikad obelogoed, degi, be-nug-dummarba-nikad oichomaloed.

⁸Napa-yaba be-balimetemaloed, muu-billigine, sabsur be burgoed.

⁹Dulemar-be-oburgwemaloed-asabin, ¿amba be sogoe: Ani an Bab-Dummadye? Ar dulemar-be-gindakmaladga bab-dummadga be guosulid, unnila be dule gued.

¹⁰Dulemar-ainebarmalad sabsur-be-imakmaloed, dulemar-aku-an-dakedyob be burgoed. Ar ani Bab-Jehová-Bela-Gangued-Nikadi, weyob soged.’ ”

¹¹Bab-Jehová anga sogded:

¹²“Dule-machi, Tiro-e-reyga wile-itoged-namaklegedgi be namake, ega be soge, Bab-Jehová-Bela-Gangued-Nikadi weyob sogye: ‘Innikigwad-e-wilubga be guenad, nue-binsaed-nikadae be guenad, yeerdaklege be guenad.

¹³Bab-Dummad-nainu-Edénʼye-nugadgi, be galagwensuli-akwamar uniryeerdaklemalad, a yeerdaklemalad-nai gudii gusanad: Akwa-Cornerinaʼye-nugad, akwa-Topacioʼye-nugad, akwa-arad-Jaspeʼye-nugad, akwa-Crisólitoʼye-nugad, akwa-Beriloʼye-nugad, akwa-Óniceʼye-nugad, akwa-Zafiroʼye-nugad, akwa-Carbuncloʼye-nugad, akwa-Esmeraldaʼye-nugad, degine, ormar. We-akwa-nuegan-nai be aibirdii gusanad. Be-dukargi-nagued, be-sakwagi-nagued, degi, be-uaduki-nagued bela orgi soblesadbiid. Be-obinnilesad-akale, we-ormar bega guagwar-dakles bukwa gusad.

¹⁴Baliwitur-querubinʼga an be-nug-imaksad, Emar-bendakedga be gwisgusad. Bab-Dummad-yar-islidikidgi an be-ogwichisad. A-yargi be gudii gusanad, soo-akwamar-birgi be nanadii gusanad.

¹⁵Be-obinnilesad-iba-akale, geb isgued be-ulubgi-nai daklenonikidse, be-daedi innikigwadbiinad.

¹⁶Be ibmar-manigi-uked-bukidar-nikadba, sabsur-emar-imakde gusad, degi, isgudegusad. A-ulale, Bab-Dummad-yargi ibmar-isganayob an be-onosad. Be, baliwitur-querubin-guedi, degi, dulemar-bendakedi, soo-akwamar-abargi bar gudii an be-imaksasulid.

¹⁷Be-yeerdakleged-ulale, be san-dummarba imaksad. Be-nug-dummarba-nikad-ulale, be-binsaed-nikadaed be oichosad. A-ulale, napnegse an be-balimeted, degi, reymar-asabin-bingegu-gwichi an be-imaksad.

¹⁸Bela-bela be-isgusad-ulale, be-mani-onogedgi-isgusad-ulale, be-bab-dummadse-goled-negmar be oichosad. A-ulale, an be-abargi soo ogasad, adi, bela be-ogumaksad. Bela dulemar-yeer-be-dakmalad-wagab an napagi be-balimeted, geb burubi-sii an be-imaksad.

¹⁹Bela dulemar-yar-baid-baidgi-bukwamalad-magar-be-dakmaladi, be-dakarmalale, dobgus bukusdamalad. Ar bato be bela-bela bergus siid, bar be daklegosulid.’ ”

²⁰Bab-Jehová anga sogded:

²¹“Dule-machi, Sidón-neggwebursik be atake, egi ibmar-guoed iduakwaa be soge.

²²Bab-Jehová-Bela-Gangued-Nikadi weyob sogye, ega be soge: ‘Sidón-neggwebur, an begi yolegega an wegi gwichi, an be-abargi nug-dummarbaa guoed. Igar-maidba an sabsur-be-odurdakalile, degi, an-isligwaled an begi oyoalile, wisgumaloed, ani an Bab-Jehová gue.

²³” ’Uelleged-dummad an begi barmidagoed, be-igarba ablis suurmakmai guoed. Es-suidgi girgulenanaid-ulale, be-igarba dulemar-nailikgusmalad burgwemai gumaloed. Degidbali, wisgumaloed, ani an Bab-Jehová gue.

²⁴” ’Dulemar-e-yar-dikarba-bukwamaladse Israel-dulemar bar isdar-daklegosulid. Israel-dulemar, we-isdar-dakleged esgoro-swichwigwadgi maklesadyob nunmaked-itomalad, bar itogosulid. Degi, ikogi sikaa-gusayob-itoleged, bar itogosulid. Degidbali wisgumaloed, ani an Bab-Jehová-Bela-Gangued-Nikadi, gue.’ ”

²⁵Bab-Jehová-Bela-Gangued-Nikadi weyob soged: “Ar Israel-dulemar yar-baid-baidse-oaisakiles-gusmalad, an gannar danar-oambikusale, an-isligwaled, dulemar-yar-baid-baidgi-bukwamalad-wagab an ega oyogoed. Geb degine, Israel-dulemar na e-yargi gudii gumaloed. We-yardi, an-mai-Jacobʼga an uksa gusad.

²⁶A-yargine, dobgued-sate gudimaloed, negmar sobmaloed, uvaʼmar digmaloed, ar ade, dulemar-e-yar-dikarba-bukwamalad, Israel-dulemar-isdar-dakdimalad, igar-maidba an sabsur-odurdakoed. Wisgumaloed, ani an e-Bab-Dummad-Jehová gue.”