Text copied!
CopyCompare
Buka Hope - Ekeliziasiti

Ekeliziasiti 11

Help us?
Click on verse(s) to share them!
1Sari mua vuvua si mu holuholu ni pa popoa seu, meke pa totoso si kote vagia goi laena.
2Mu lelete veko pa zuapa babe vesu vasidi, ura lopu ta gilana totoso sa kote raza sa tinasuna.
3Pana siṉi na kolo sari na lei, si zoropo la pa pepeso sa ruku. Be hoqa la pa kali mataona sa huda baba pa kali gedena, si pa vasina pu hoqa la sa, si vasina tugo si kote eko si sa.
4Asa pu kopu eko nia sa givusu si lopu kote lelete, meke asa pu doṉo viliti sari na lei si lopu kote pakepakete.
5Gua mo sapu lopu tumae nia goi sa siraṉa tanisa givusu, babe vea meke podaka sa koburu pa tiana sa tinana, si lopu tumae nia tugo goi sa tinavete te Tamasa, Asa pu taveti sari doduru likakalae.
6Mu lelete pana munumunu, meke pana veluvelu si mu lopu noso, ura lopu gilania goi sapu kiko veguguana si kote toa, babe doduru mo si kote leadi beto.
7Kalalasa si variva qetu, meke valeana ia sa mata pude dogoria sa rimata.
8Be soku sari vuaheni toani sa tie, si mani koa qetuqetu nana koari doduru. Ba mani gilania sapu sari rane huporodi si koadia, ura na kote sokudi. Doduru pu korapa mae si loke laedi.
9Mu qetu, agoi na tie vaqura, sipu korapa vaqura mua, meke mani va qetu igo sa bulomu koari na mua totoso vaqura. Lulia sa hiniva tanisa bulomu meke be sa si dogori sari matamu, ba mu gilania sapu doduru hire si kote ta pitu ni goi koe Tamasa.
10Gua ke, saripu talotaṉa sisigiti ni goi si mu rizui pa bulomu meke sari tinasuna pa tinimu si mu oki pani, ura sa tie vaqura meke sa ṉiniraṉira si lopu kote koa hola.