1O Agripa i watungi tan o Pol lena, “A mulaot ui sur un wasiso talapor una kum etakun un ui.” Ra o Pol i kodos a lamano ra i turpasi sur in wasiso bati ut lena,
2“King Agripa, a gas doko sur an tur umatam ra an wasiso bat iau una kum utna rop ra a taro Juda det takun iau nami.
3Uni ui a tene mananos tagun a kum ngasino anun a taro Juda, ma tagun a kum utna kai ra det ser wasiso to i. I mo ra a saring ui sur un kis wowowon ma un longoro iau.
4“A taro Juda rop det tasman anung a ngas na nilaun, turpasi utmakai ra a natlik, ra a kis una nung a tamon, ma sapat utkai o Jerusalem.
5Det tasman iau tagun numugu, ma ra det nemi, det ut det in wasiso talapor un iau lena a muri ut a ngasino anun a kum Parisi. Met ara kabotaro tagun a taro Juda ra met mur sot rop pas a kum Warkurai tagun anumet a lotu.
6Ra uniri a tur una warkurai, uni a kis langlang nama nurnur sur a liliman ra o God i pam tari torom a kum tumtubu met tagun numugu.
7Anumet a noino ma aru kabotaro, det kis langlang nama nurnur sur din pam sot pas a liliman ra torom det, ra det ser lotu torom o God una kum mirum ma a waspi rop. King, a taro Juda det takun iau, uni a nurnur ut una liliman ra.
8Sur asau ra mot ri mot nuki lena o God ken pet lar pasi sur in ukatutur melet a kum minat?
9“Iau kai numugu, a nuki ut lena i wakak sur an lar rop a kum kisapi sur an turbat a risan o Iesu, a te Nasaret.
10A pam a pinapam ri sapat o Jerusalem. A wan nama warkurai anun a kum lamlabino tene etabor torom o God, ma a uruk a susut na tene nurnur una karabus. Ra din um doko det, iau kai, a mulaot sur det in mat.
11A susut na dino a ruk una kum rumu na lotu sur an ukadik det, ma a ser ungongos det sur det in wasiso laulau un o Iesu. A ser kankan dekdek torom det, ra a ser wan una ramano kum tamon gisen, sur an sio pas det ma an ukadik det.
12“Una nung ara inawan melet una nung a pinapam ra, a wan utong o Damaskus, nama warkurai anun a kum lamlabino tene etabor torom o God nama nimulaot anundeti.
13King, una labino suan, ra a wan una kisapi, a tama pas a tarai na talapor tagisapat una langit. I sisio doko tan a talapor ina in nusuan, ma i sisio talilis pas iau tomo nam det ra met wan tomo.
14Ra met rop met sa puku pirso una piso, a longoro in nalngan ara i wasiso torom iau nama wasiso Ibru lena, ‘Sol, Sol, sur asau ra u ser ban laulau iau? Ui ut u um pas ui nama kum ukadik ra u pami un iau.’
15Ra a tingi lena, ‘Labino, osi ui?’ Ma i balu iau lena, ‘Iau o Iesu, ra u ser ban laulau iau.
16Un katutur ma un tur. A wanpat torom ui, uni a sa pilok pas ui, sur un pam anung a pinapam ma un wasiso talapor una kum utna ra u sa tama tari un iau, ma una kum utna kai ra an ese i tam.
17Ma an ulaun ui gusun a kabotaro anum, ma gusun a taro kai ra awu sur a taro Juda, ra an tulu ui torom det.
18Un utamtama det sur det in tupukus gusun a dumirum sur a talapor, ma gusun a dekdekin o Satan sur o God, sur din unus ru anundet a kum sakino petutna. Det in nurnur un iau, ma una nundet a nurnur, det in kis tomo nam det ra o God i sa pilok pas det sur anun a taro.’
19“King Agripa, ka rosumur gusun a tamtama ra tagisapat una langit.
20A warawai mugu torom a taro tong o Damaskus, ma numur sapat o Jerusalem ma una kum tamon una papor Judia rop, ra numur torom det kai ra awu sur a taro Juda. A warawai lena, det in nukpukus, ma det in tupukus torom o God, ma det in pam a kum pinapam, sur in ese i lena det sa nukpukus.
21Iri a kibino ra a taro Juda det pam ukai pas iau ubalan in noworo ina rumu na etabor, ma det nemi sur det in um doko iau.
22Ikut, tuk uniri, o God i warut iau, ra a tur nin umatam ra a wasiso talapor torom a taro oros kut, ma a kum lamlabino kai. Ka watung tu matok na utna, a wasiso kut una utna ra o Moses ma a kum poropet det sa watung tari ra in nanpat.
23Det sa watung tari lena o Karisito in mat, ma i a mugano musano ra in laun melet gusun a minat, ma in wasiso puaso una talapor torom a taro Juda ma torom a taro gisen kai.”
24Ra kura utmakai i wasiso batbati, o Pestus i kukuk dekdek toromi lena, “Pol, u sa longlong. Anum a labino etowo i sa ban longlong pas ui.”
25O Pol i watungi lena, “Pestus, ui a labino, ka longlong. Anung a wasiso i lingmulus ma i pitar a kukuraino.
26A king i tasmani ut a kum utna ri, ra a langolango sur an wasiso uni. Uni a tasmani lena katu utna i parau umatano ma una nun a longlongoro, uni awu sur di pam eno i.
27A King Agripa, pepetlai, u nurnur una wasiso anun a kum poropet? A tasmani lena u nurnur.”
28Ra o Agripa i ting o Pol lena, “Pepetlai, u nuki lena un tu kukur du bung kut, un pukus pas iau, sur an nanpat a te Karisito?”
29O Pol i balu i lena, “Ra tu nat na du bunglik o tu walos na du bung, an wararing torom o God sur ui. Awu sur sur ui kut, sur mot rop kai ra mot longoro iau uniri, sur mot in nanpat a kum te Karisito elar nam iau, ikut gong di ker mot nama sen.”
30Ra a king i tur, o Pestus ma o Benaisi, ma det kai ra det kis tomo.
31Det pirso, ra det wasiso etalai lena, “A musano ri ke pam tu sakino utna ra din um doko i uni, o in karabus uni.”
32Ma o Agripa i watungi tan o Pestus lena, “Ra gunuk a musano ri ken sasaring sur a Sisa in warkurai i, i wakak kut sur din palos ru i.”
