1Wofuŋ e alata fuŋnao domahame honepe ʒiŋuc muwec: “Go bupu wâtuŋ qataratec fic bupunezi waharâ ŋic ŋemac‐jopazejec, eme nâfocne juniŋmu jaŋe ʒikazi qâmiziec‐jopapemu; ehame jaŋeraonec moczi sahac‐ticne ŋezickehuc mi wiseocmu.
2“Jaŋe hâmokicne jaŋere haeo hupie muzac no sifu rocjopazapo, me sambâŋko fepie muzac sifu fârec‐jopape wahanʒapiŋ.
3Jaŋe Karamele tikio ferâ soŋkepie muzac no sifu bâfuac‐joparâ rocjopazapo, me mai‐naneonec wiserâ hâwec fâhâŋnao hurâ soŋkepie muzac no mupe hâwec homazi kicjopazac.
4Me râsifâc‐jeŋic jaŋe jâpec‐jopapie kâpâcwâru ficko rapie muzac no sifu mupe ʒikare nânâ enʒapiŋ; no biaŋkeniŋte mâcne, sipirickeniŋte ʒâŋe ʒârâ honec‐jopakopac.”
5Anutu Tâpiri Ɋuŋɋasaŋ Wofuŋzi mâreŋ bâuwame dockeme ŋecjucfâc‐ticne jaŋe makuc baniŋmu, ehame Nilu opâ sâkozi siwiŋnerâ feku mocwâc fâre wahaekac irec sâc mâreŋzi huhuckerâ feku uruŋkerâ huocmu.
6Mâreŋ fainao mume sambâŋzi uuŋne bawec fokac, â irec fainao erific‐ticne maŋne maŋne râe rawec, erâ hâwec opâne wiracnehuc mume mâreŋte faio qaratiewec fokac, e ʒâŋe‐ticne Wofuŋ hâcne.
7Wofuŋzi dâŋ kecʒiŋuc mukac: “O Israe ŋicbureŋ, no honec‐ŋopape Etiopia ŋic jaŋe iŋucne mi eŋgopieŋ me? No Israe ŋic apafâc‐ŋeŋic jaŋe Aigita mâreŋkonec mi jowac‐jopa warepo me? Me Filisa ŋic jaŋe Kafatori nuckonec, â Siria ŋic jaŋe Kiri mâreŋkonec wâc mi jowac‐jopa warepo me?
8Manaŋgopieŋ, Wofuŋ Anutu e ŋicwofuŋ â ŋicfâc‐ticne jaŋe hehesic bâfuambiŋte ʒâŋe bâbâroŋ honec‐jopahuc ʒiŋuc mukac: No mâreŋkonec bâsirowec‐jopapemu. Mocjaha, Jakobore kikefuŋ jaŋe ine ʒeŋgoma mi bâsirowec‐jopa‐fârepemu.” Wofuŋte dâŋ iŋuc.
9“Manaŋgopieŋ, no ʒiŋuc epemurâ mupaŋkekopac: No Israe ŋic jaŋe ŋicne ŋicne jaŋere ŋondeŋko ba ikisiŋ ejarepemu, i saja sâko ba ikisiŋ ehapie padi fârine mâreŋko mi wahaekac irec sâc ejarepemu.
10Ŋicfâc‐nane jaŋere ŋondeŋko sâqocne bapa jueŋgopieŋ jaŋe ʒikazi nâmiziec‐jopa‐fârezejec, jaŋe dâŋ ʒiŋuc mueŋgopieŋ hâcne: ‘Sisipiriczi nâŋe maic‐nâporâ mi rocnâpoocmu.’
11“No dameŋ ira Dawidire boze tâcne ʒaŋ ekicne i mocwâc heɋârehuc ʒeŋkepemu, â hetâtiekicne i mocwâc bâpiaŋkepemu, eme mârâc jaha ŋewec irec sâc jaha bape ŋeocmu hâcne.
12Eme jaŋe Edomŋic nâfocne mecne, â ŋicne ŋicne ʒâŋe‐nane bajueŋgopieŋ jaŋe mâmâc rauc‐jopanʒepieŋ.” Wofuŋ e wiac i eocmu ere dâŋ iŋuc.
13Wofuŋzi kecʒiŋuc mukac: “Manaŋgopieŋ, dameŋ moc maickeocmu ira qa roro ŋic e gie‐ticne bahuc juhame jaha hesarac ŋiczi fisiocmu, â waiŋ hândâŋne âte pisickehuc juhapie jaha gâcnezi hesarac gie baniŋte fisiniŋmu; ehame tikio waiŋ fusucmarâ foocmu â mâreŋ facne facne ira fârine bocjaha fuaocmu.
14Eme no mupe Israe ŋicgurufâc‐nane jaŋere jujuhâmo mocwâc fua‐jarezejec, eme jaŋe hae‐jeŋic sesucne sesucne heɋârerâ bâpiaŋkehuc maŋnao ŋec juc enʒepieŋ, ehuc waiŋ gie bapie fârine fuame opâne nâhuc junʒepieŋ, â gie wiac gâcne he sarac erâ fârine nâhuc junʒepieŋ wâc.
15Eme no mâreŋ‐jeŋicko sarac‐jopape junʒepieŋ, eme mâreŋ tahac‐jopapo irecnec mocwâc mi unuc‐jopanʒepieŋ.” Wofuŋ Anutu‐ŋeŋiczi iŋuc mukac.
