Text copied!
CopyCompare
Kâte Bible - Amosi

Amosi 7

Help us?
Click on verse(s) to share them!
1Wofuŋ Anutu e maŋko fuac enarerâ wiac kecʒiŋuc nowatume honepo: Kecɋaŋ ʒorakicne i ŋicwofuŋte biŋe bâtâcnepie ʒâhec tucne âke sueme Wofuŋzi mume hâpic fuŋmoc guru sâko fuambiŋ.
2Eme hâpic i jaŋe mâreŋ irec kecɋaŋ i nâmiziehapie honerâ mupo: “O Wofuŋ Anutu, go Jakobore kikefuŋ kiŋjeŋic behe‐jarecmurâ numu‐garekopac. Jaŋe wemocko moc sanaŋkerâ juniŋmu? Jaŋe guru pitic sawa i!”
3Eme Wofuŋ e irec busâqoc manahuc maŋne risieme ʒiŋuc muwec: “Wiac i mi fuazejec.”
4Eme Wofuŋ Anutu e wiac kecʒiŋuc nowatume honepo: Wofuŋ Anutu e okac babazu gie baocte mume ʒoc fuarâ mâreŋmaŋko opâ ʒâkereŋkewec â giegaŋ wiac‐jeŋic forawec i ʒâseŋke‐fârewec wâc.
5Iŋuc fuame honerâ mupo: “O Wofuŋ Anutu, go wiac i behecmurâ numu‐garekopac. Jakobore kikefuŋ jaŋe wemocko sanaŋkerâ juniŋmu? Jaŋe guru pitic sawa i!”
6Eme Wofuŋ e irec busâqoc manahuc maŋne risieme ʒiŋuc muwec: “Wiac i wâc mi fuazejec.” Wofuŋ Anuture dâŋ iŋuc.
7Eme Wofuŋ e wiac kecʒiŋuc nowatume honepo: Wofuŋ e qânâsac dândâŋne bakicne irec fainao domahuc mucsâc moc râeme wahawec.
8Iŋuc erâ Wofuŋzi ʒiŋuc wio‐narewec: “Amosi, go wemo wiac honekomec?” Wiome mupo: “No mucsâc moc honekopac.” Eme Wofuŋzi muwec: “Manakic, no Israe ŋicfâc‐nane jaŋere ŋondeŋko mucsâc moc râekopac; no mocwâc jowaruhuc mi akic‐jopapemu.
9No Isakare nemu bâzi ririkere furu mâreŋ ima bapemu, â Israe ɋâŋfic wiac‐jeŋic hetâtiepemu, ehuc Jeroboam kikefuŋfâcne jaŋe râsi ejarehuc ʒikazi jopapemu.”
10Eme Bete haeonec taha bapa Amazia e Israe ŋic jaŋere ŋicwofuŋ Jeroboamtao dâŋ ʒiŋuc râeme rawec: “Amosi e Israe ŋic ŋondeŋ‐nâŋecko juhuc go râsi egarehuc ŋic maŋbâiŋ ejareekac, eme mâreŋ rune jaŋe dâŋticnere manapie boc ŋemâckeekac.
11Amosi e ʒiŋuc hâcne muekac: ‘Jeroboam e ʒikao hâmoocmu, â râsi jaŋe Israe ŋic mâreŋ‐jeŋickonec rocjoparâ kâpâcwâruo bacjopa raniŋmu.’”
12Erâ Amazia e Amosi ʒiŋuc âzâcnewec: “O porofete, go Juda mâreŋko wiserâ razemec, erâ ira findaŋdâŋ muhuc nânâge bâfuazemec.
13Bete haeo ine porofete dâŋ mocwâc mi muzemec, hae ʒi ŋicwofuŋte furu hae, uucmaŋ‐ticnere furu ufuŋ hâcne.”
14Iŋuc mume Amosi e Amazia dâŋ ʒiŋuc muhuc bâtikiecnewec: “No porofete aricne, â porofete mocte qâjâpec wâc aricne, no lama bulimakao soŋaŋ, erâ jâmbojâc irec gie bahuc juekopac.
15Wofuŋzi ine qowi soŋaŋ gieonec rocnurâ ʒiŋuc nazawec: ‘Go rarâ Israe ŋicgurufâc‐nane findaŋdâŋ jazazemec.’
16“Irec ʒi Wofuŋte dâŋ manac. Go Israere ŋicfâc, Isakare kikefuŋ hâcne, jaŋe porofete dâŋ mi jazapemurâ â uŋ sawaŋ mi ejarepemurâ nazakomec.
17Irec Wofuŋzi kecʒiŋuc mukac: ‘Ŋonâŋgezi haeo boe sau gie bahuc juocmu, â otâ ŋokâfâcge jaŋe ʒikao hâmoniŋmu, erâ mâreŋge i mucsâc fârehuc bâtâc baniŋmu; gahacne ine qâpuc mâreŋko hâmocmu, erâ Israe ŋic jaŋe mâreŋ‐jeŋickonec rocjoparâ kâpâcwâruo bacjopa rajâmbâŋkeniŋmu.’”