Acts 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Maranai a ḡota au gera ma a aramanei da tauai au Malta bonabonana.

²Dobuna ravai i nebelelai ma ivii i ai kaua awariai. Garewa atuna i vikarei ma i ubauba, ma taui au gera ai i viviri.

³Ma Paul ai ragorago i ḡuna da ai au tepana i tereterei ma mota ḡaiḡaiawana ai bolana malana i vaia da i opui ma Paul nimana i ani.

⁴Dobuna ravai i ʼnanai da motana Paul au nimana i dawedawe ma i pari-ararava, “Wei ravana lamna tauviraḡena ma eḡa ita monu wate ata god e ririwa da tauna eḡa ina lawana.”

⁵Wate Paul motana i viaikwajiei da ai au menamenana i rauei ma tauna eḡa ita kero.

⁶Rava i vipaipai da Paul nimana ita dodo bo ita peu da ita iraḡe. Wate maranai i vipaipai guratana ma i ʼnanai da tauna anina, taui ai nota i virai ma i riwa da tauna god ḡelauna.

⁷Au gerana a ḡotaḡota - lana au ḡereḡerena lamna dobuna badana Publius ana wapu ḡaeḡaena. Tauna i taravainiai ma i paina-kauelai da aupom tonuḡa

⁸Publius amana i doria manawa ruba ma iniḡuḡura i vaia da i matamatave, Paul i rui inanana aubaina ma urana au tepana i terei ma i raupariei ma i vilawani.

⁹Anina ma rava anatapui doridoriai au bonabona i nei ma i vilawani.

¹⁰Kampa mai Malta maiteni a mae nawaravi tonuḡa. Ma ravai i voagu-kauelai ma maranai ata vomairi, ai ḡoana vaḡai aubaina anatapuna i verelai. Ma waga ḡelauna a gerui lamna mai Alexandria ai waga bodu aubaina kampa i mae. Waga au naona lamna ai god ruaḡa kokoitaui i tai.

¹²Kampa ma a amkuka-nae da au Sairakius a ḡota ma a mae aupom tonuḡa

¹³Kampa da ambori damana au Regium ma maratomna rauanaḡa i wanabauni ma amkuka ma geraei a ruba da maratom ḡela au Puteoli a ḡota.

¹⁴Kerisiana kampa a nelaḡai ma i riwelai da maiteni a mae wiki tagogi. Anina ma a babara-nae da au Rome taon a ḡeta.

¹⁵Kerisiana au Rome riwaiai i vaia da a nenei ma i ḡei da ita nebelelai, ḡelaui i ḡei au taon e ḡoreḡorei Vaḡavaḡai Tonuḡa ai Numa ma ḡelaui i ḡae Apius ana au maket. Maranai Paul wei ravai i ʼnanai, ma i vinuaiai kaua ma God i viegualauei.

¹⁶Maranai au Rome taon a ḡeta taui Paul numa i verei da ainelana i mae ma sorodia i terei da i ʼnana-vaitetei.

¹⁷Ma aupom tonuḡa au murina Jew babadai kampa maemaei i rauḡoreiai ma awarii i babani, “Varevareiu tau eḡa aiwai ata kauana-boai ata rava awarii bo amamata ai tarawatu ata viaigai. Wate au Jerusalem i paniu ma i veredamaneu Rome gavena awarina.

¹⁸Mai Rome i etareiu ma i ḡoei da ita rupeniu aubaina eḡa aiwai apoapoena ata kauei da ina viraḡeniu.

¹⁹Wate Jew babadai wei eḡa ita ḡoei ma lamna aubaina Rome babadai a riwei da tau eḡa ana mae wate ana ḡae au ḡaeḡaena Caesar awarina da ita rauetareiu. Wate lamna eḡa au rava ata viviḡaviei, eḡa.

²⁰Lamna aubaina a ḡoremi weka da tata babani gogona, ma ata riwemi da tau a vipanipani aubaina a vitumaḡana da mai Israel ai tauvilawana wariaḡa i ririwei boiboḡi i nei.”

²¹Taui i paribelei, “Tauai eḡa pepa Judeaei ata vaia bo ai rava riwa ita neiai.

²²Tauai aramanei da ravai anatapui kerisiana boruna e paripari-virevirei. Wate tauai a ḡoei da am nota ana vaia.”

²³Ma taui mara i terei da Paul maiteni ita viboru, ma patara i ḡetai mepa Paul i mamaelana. Ma ubaubanai Paul God ana vigulau jimana i vikarei da waguvarai i vorovei. Moses ana tarawatu ma peroveta nununaii ai au buka i mairi ma i jima. I ḡoei da orai ita taini da Iesu ita vitumaḡanei.

²⁴Ana babaniei ḡelaui orai i taini ma ḡelaui eḡa ita vitumaḡana.

²⁵Ma taui ava babanina i viparipariniḡaiei ma muriai da ita vilamonei Paul wei riwana tagogi i latoni i pa, “Arua Vivivireina riwa kaua Peroveta Isaiah ponanei amamami i riwei i pa:

²⁶Ma nae am rava mai Israel awari da ma riwei, ona nononora wate eḡa ona araramanei ona inanai wate eḡa anona ona aramanei.

²⁷Aubaina wei ravai orai i bado. Taniḡai i gudui, Taui matai i vopotai. Mepa da taui mataiei ita inainana, taniḡaiei ita nononora oraiei ita araramanei, ma ita mae-tavirei awariu ma ata vilawani.

²⁸—Lamna aubaina ona aramanei da God Riwana Aiaina vai-melana aubaina i paritawanei Jentail awarii. Taui ina rautaniḡana.”

³⁰Paul kampa numa i vivimaiei ma i mae madeḡa ruaḡa taputapuna. Ma rava maḡamaḡaui i nenei da i raraugenari ma wei i vinuaiaiei.

³¹Ana tepatorana God ana vigulau ma Iesu Keriso riwana Aiaina i jimei. Ma eḡa aiai ita viḡaei.