Text copied!
CopyCompare
Wedau Mark - Acts

Acts 4

Help us?
Click on verse(s) to share them!
1Peter ma John rava awari i bababani ma pirisi pulo tauapuina ma tempol taupainii ai bada ma Sadusi ḡelaui i ḡetai.
2Taui amloi i ḡaiḡai kaua Peter ma John awari aubaina taui i viviararamana da God, Iesu iraḡelei i vovaimairini ma wei i viatataiana da God rava anatapui iraḡelei ina vovaimairini.
3Taui Peter ma John i pani ma au i pom aubaina panipani au numana i terei da i mae mara.
4Wate rava maḡamaḡaui riwa i nonori ma i vitumaḡana, ma ai maḡa nelara 5,000 waivine eḡa ita iavi.
5Ma mara i tom ma Jew babadai, dogadogara ma tarawatu babadai au Jerusalem i vitagogiei.
6Ma pirisi ḡeḡetelarana Annas kampa ma Caiaphas, John, Alexander ma pirisi ḡeḡetelarana ana rava maiteni.
7Ma taui Peter ma John i neiei da au naoi i vimairini ma i riwei, “Aiwai rewapananei, ma aiai wavanei wei o kauei?”
8Arua Vivivireina Peter orana i vioai ma taui i riwei, “Rava ai babada ma dogadogara;
9tauai kaua aiaina a kauei gwaḡagwaḡana awarina ma amadodo taumi o vitara-virevirelai, da menanare tauna i lawananei.
10Ma wei ona aramana-kauei, da taumi ma mai Israel anatapui, da Iesu Keriso Nasaretei o tuparatui, Wate God tauna iraḡelei i vovaimairini ma tauna wavanei wei orotona au naomi lawalawaina e maimairi.
11Taumi tauvoa nai ḡaimana o geduaiei, wate wei gaimana lamna numa ogona, numa ana tapuna e vovojijini.
12—Lamna aubaina Iesu ainelana ina vilawanita. Ma God eḡa aiai ḡelauna au dobu rewapana ita verei da ina vilawana.”
13Ma taui Peter ma John ai tepatora inanai ma maranai i aramanei da taui eḡa girugirumai, ma i baei. Ma i aramanei da taui Iesu ana tauvotaḡotaḡo.
14Ma wate i ʼnanai oroto i vivilawania Peter ma John maiteni i maimairi, lamna maranai taui gamoi i pota.
15Anina ma Peter ma John i riwei da boru gabuna i opu-tawanei, ma taui ava i vitarairavira vivira.
16Taui i vitaraviravira-viravira i pa, “Aiwai tana kauei wei nelarai awari? Rava anatapui au Jerusalem i aramanei da taui kaua babai i kaukauei, lamna eḡa tana boviei.
17Wate tana viḡaei da wei kauai eḡa ina tua rava ḡelaui awari, ma riwa bagibaginei tana viḡaei da eḡa aiai awarina Iesu wavanei ina raugugula.”
18Anina ma taui i ḡorei da i rui me, ma riwa bagibaginei i viḡaei da eḡa aiai awarina Iesu wavanei ina raugugula bo ina viararamana.

19Wate Peter ma John taui i paribelei, “Taumi ami nota aiwai. Tauai God ana voteletelei bo taumi?
20Tauai aiwai a inainanaia ma a nononoria babanina eḡa ana voterei.”
21Wei Orotona i vivilawani lamna gwaḡagwaḡana ma ana madeḡa 40. Lamna aubaina rava anatapui God i vovoepaepai, ma babada eḡa ita aramanei menanare Peter ma John ina kovoḡanei. Ma i parivairovorovo-melei ma i paritawanei da i nae.
23Peter ma John i nae me ai rava awari ma pirisi ḡaeḡaei ma dogadogara aiwai i ririweia taui i vieḡei.
24Maranai tauvitumaḡana wei riwana i nonori, taui anatapui i raupari gogona God awarina: Bada tam ai gulau, Tam mara, dobu, boga ma anatapuna au orana maemaei taukaueina.
25Tam Arua Vivivireinei am taunola, amaiai David gamonei u babani ma u riwa,
26Ma dobu ai gulagulau i vokaukaua ma babada ḡaeḡaei ḡelaui maiteni i vitagogiei da
27Anina riwa kaua. Wei kauai weka au Jerusalem i tupua, Herod ma Pontius Pilate, Jentail ma mai Israel maiteni i vitagogiei, da am taunola vivivireina Iesu u bulobuloia i viḡaviei.
28Ma tam am rewapanei ma am ḡoanei am oga menanare u tarataranei marina nanare i tupua.
29Bada, nai ravai ai parivai-rovorovo au uram ma am taunola ma vovai-virewapani da ana tepatorai riwam ina raugugulei.
30Uram ma viloloi da ma vilawana ma kaua babai ma mataira ḡaeḡaei ma kauei, am taunola Vivivireina Iesu wavanei.
31Ma pari au murina, taui mepa i vivitagogiei gabuna i vigu. Ma Arua Vivivireina anatapui orai i vioai. Ma ana tepatorai God riwana i raugugulei.
32Tauvitumaḡana anatapui ai nota ma orai tagogi. Ma ai purapura tagogi ma eḡa aiwai ita nuanei.
33Ma Apasol ana tepatorai ma rewapanai Bada Iesu ana iraḡe, ma ana vomairi me i raugugulei. Ma God ana viaiaina ḡaeḡaena taui anatapui awari i peu.
34Ma taui au orai eḡa aiai aiwai ita voladaḡei aubaina, ai rava ḡelaui ai doa bo ai numa i gimagimarei ma manena i neneiai Apasol awari i tereterei, ma aiai da aiwai i vovoladaḡei nanare i vovoagui.
36Me Joseph, tauna Levi ana damei, au Saipras i tupua, ma Apasol tauna i ḡoreḡorei Barnabas, wei wavana anona lamna tauduḡu.
37Tauna ana doa i gimarei, ma manena i neiai da Apasol awari i terei.