Text copied!
CopyCompare
Bab-Dummad-Garda-Islidikid - 2 Samuel

2 Samuel 17

Help us?
Click on verse(s) to share them!
1Aginbali, Ahitofel, Absalónʼga sogded: —An bedile, miliambe-gakabo (12,000) sordamar-amisaled. Emisbinne emi-mutikidba an David-baleginnadeled.
2David-geggus-gudiidgi, nollo-gudibalidgi, egi baisursunna gwisguledapiled. Ega dobed-dummad-naguega an imaksaled. Degidba, e-sordagan-eba-gudidimalad, dobedba wakitemalaled. Unnila Rey-Davidʼbi an oburgwisaled.
3E-sordamardina an senonikiled. Degii-David-burgwisadbali, bela e-sordamar beba nagudmalaled. Deyob, geb neg-bogidik nagunonikiled.
4Absalón, degi, Israel-dulemar-nug-nikamalad, Ahitofel-ega-binsaed-uksad nabir-itosmalad.
5Absalón sogded: —Arquita-dule-Husaiʼse be anga gornamalo. Anmar itomarmogo, igi sogdamogodibe.
6Husai, Absalónʼse-nonigua, Absalón ega sogded: —Weyob Ahitofel sogsadi, ¿anmar eba ibsao be itomoga? Sulile, be sogmodo.
7Husai, Absalónʼga sogded: —Emisgindi, Ahitofel-e-binsaed-uknaidi innikisulid.
8Geb Husai sogdebalid: —Be wisid, be-bab-David, dule-buledid. Aginbali, e-sordamar-eba-gudimalad deyobmarmogad. Igi sapurbali wiob-ome ei mimmigan-sulesale, urwedii dae, deyob e-sordamar sae itodimalad. Aginbali, be-bab bila-onoged-dulebalid, degisoggu, e-sordaganbali mutik gudii guosulid.
9Inniki an bega soged, akwasailagan-yaba dukus-mairgebed. Bia gudisundibe. Ar e-inse bemargi yolenoniye, dulemar itoarmalale, sogdemaloed: ‘Absalón-sordamar ibitosmarye.’
10Degidbali, sordamar achumigur-nono-wawaadyob niga-gandikmalad, bela sikirmakdemaloed. Ar bela Israel-sordamar wismalad, be-bab dule-buledi, degine, wismarbalid, e-sordagan-eba-gudidimaladi, dule-buleganmarmoga.
11”Degisoggu, an sogmodo, Absalón, bela Israel-sordamar Dan-yar-naidgi-bukwad, degi, Beerseba-neg-naid-ugakaase-bukwad be onmako. Ar sordamar demar-gakaba-ukub-naidyob merguosoggu, be-sunnagwad urwenaega be amar-iduergebed.
12Ar David bia gudioe, agi anmar egi yoledapoed. Igi boo napagi batiardae, deyobi, anmar egi batidapoed. David, degi, bela e-sordagan-eba-gudimalad, wargwensaale dula anmar obegosulid.
13Ar David neggwebur-gandikidse dukunaddibe, bela Israel-sordamar a-neggweburse urdub-nika namaloed. A-urdubgi bulakwaa anmar e-ibe e-galu-matusulid-akwabiid earoed, e-akwamar-seniganse-bakar, diwar-maidse mioed.”
14Absalón, degi, bela Israel-dulemarmala sogdemalad: —Arquita-dule-Husai-e-binsaed, Ahitofel-e-binsaedba bur-nuedid. Ar we-ibmar-gusadi, amba Ahitofel-e-binsaed innikigwad-inigwele, Bab-Jehová, Absalónʼga-boni-onogega Ahitofel-e-binsaed-oburega imaksad.
15A-sorbali, Husai, dule-irwa-Bab-Dummadse-gormalad-Sadocʼga, degi, Abiatarʼga sogded: —Ahitofel weyob Absalónʼga, degi, Israel-girmar-dummaganga binsaed uksad. Andina weyob Absalónʼga an binsaed uksamogad.
16Degisoggu, gwae bemar Davidʼga weyob-sognamalo: ‘Mer-bemar emi-mutik neba-naidgi ambikumaloye, gwae Jordán-diwar obakmaloye. Rey-Davidʼye, deyob be imaksulile, be, degi, be-sordagan-beba-gudimalad oburgwilemaloye.’
17Jonatán, Ahimaasʼbogwa Rogel-dia-siid-naba besmalad, adi, mer Jerusalén-neggweburgi-dogmai dulemarse daklegegar. Degisoggu, amar-owisogega ome-gwensak-maiga-gudiidi, ega gayaburba berbenonidaed, adi, amar-ebogwad Rey-Davidʼse gayaburba sedegar.
18Degi-inigwele, sapingwa-gwensak a-dulemar-daksad, geb Absalónʼga barsokapid. Degisoggu, Jonatán, Ahimaasʼbogwa agi-gunaid gwae nadmalad. Bahurim-neggweburse nonimargua, dule-gwensak-neggi dognonimalad. A-neg-imba-naidgi, dia-siid-yaba dogsamalad.

19Neg-ibed-ome atued amisad, geb, dia-siid-birgi ogichad. A-birgi, ibmar-gwag eosad. Degisoggu, dia sisuliyob daklesad, wisgulessurgusad.
20Absalón-sordamar ome-negse-nonimargua, omese egisdemalad: —¿Bia Ahimaas, Jonatán-ebo nadmala? Ome abin-sogded: —Bato dian obaksamalargebed. Sordamardi amar-ebogwad-aminade gusmalanad, amissurgusmalad. Degisoggu, Jerusalén-neggweburse gannar nonigusmalad.
21Sordamar bela duurmakdemargua, geb Jonatán, Ahimaasʼbogwa dia-yaba-siidgi nosmalad. David-owisogega Davidʼse nade gusmalad, geb ega sogdapmalad: —David gwae be nae. Gwae be Jordán-diwar-obakmalo. Ar Ahitofel, Absalónʼga binsaed-uksad, igi-bemargi gwichiguoe.
22Degisoggu, David, bela sordamar-eba-gudimalad neg-oiboged-idu bela Jordán-diwar obaksamalad.
23Ahitofel, e-binsaedba-Absalón-aibirissuli daksagua, e-moli-uayasuidgi e-neggweburse naded. E-negse mosgua, bela-e-gwenadganga igarmar-uksad-sorbali, na-dukin dukar-gasad. Deyob Ahitofel burgwisad, geb degi, e-bab-neg-uan-maidgi digsamalad.
24David Mahanaim-neggweburse nonigua, Absalónʼdina Israel-sordaganmala sorba Jordán-diwar-obaksamalad.
25Absalón, Joab-anar, sorda-dummadga Amasa-onug-imaksad. Amasaʼde, Israel-dule-Itraʼye-nugad-e-machid. Itraʼde, Abigail nikusadid. Abigailʼde, Nahas-e-sisgwad, Sarvia-e-urbad. Sarviaʼdi, Joab-e-nanad.
26Israel-sordamar, geb Absalónʼmala Galaad-yargi ambikunonimalad.
27David Mahanaim-neggweburse nonigua, agine wemar abingualid: Nahas-machi-Sobi. Sobiʼde, Rabá-neggweburginedid, Rabáʼde, Amón-wagan-e-neggweburad. Amiel-machi-Maquir. Maquirʼde, Lodebar-neggweburginedid, degine, Barzilai, Barzilaiʼde, Rogelim-neggweburginedid, Rogelimʼde, Galaad-yargi siid. Wemar Davidʼse nonimalad.
28A-dulemar Davidʼga we-ibmar senonimalad: Atuedmar, gobednogmar, mete-burwigan, orosgi-dakleged-trigo, orosgisaar-dakleged-cebada, madubur, ob-dibyaled, ingwagii-dakleged-habasʼye-nugad, ingwagii-dakleged-lentejas, ingwagii-dakleged-garbanzos-dibyaled,
29achanis, moli-bebe-nikad-nunis-ollikwagwad, sibad-wawaad-nunis-gwamakaled, degine, moli-bebe-nikad-nunis-gwamakaled. David, e-sordaganmala, we-ibmarmar-gunmalaga ega senonimalad. Ade, binsasmalad: “Sordamar neg-dulesulidganba geggus danimar an insaye, ukudmaada danimar an insaye, mas-gunbi gudanimar an insaye,” ade, deyob binsamalad.