1Poluma ɠonagi, yeeɠɛɠalai nii masagiti ta ɗa lii la kɔɔɠɔzuʋɛ, Davide Zoaɓe ta ná-kɔɔɠɔ nu wolaiti teʋeni, ti lo Izelayɛle ɠɔɔɠɔ nuiti kpein tuɠɔ. Ti Amɔn yooi zuɠoloɠoloni, ti ta-laa wolai Laɓa zei kɛlɛ su. Kɛlɛ Davide yɛni Zeeluzalɛme.
2Yeeta kpɔkɔ voloi, Davide wuzeɠeni folo ɲiimɛnii zu, é ɗa ziɛziɛ dooɠo bosuʋɛ, ná ɓɛtɛai ná-masa pɛlɛi ɠɔmaʋɛ. É yɛni miná, é anzanui ta ɠa, é ɗa maagba, gola ʋagai.
3Davide nu leʋeni ga ti anzanui naa ʋolu ɠaazaɠa bo. Ti ɠɛ ma: «Eliame ná-doun anzanui Ɓate-Seeɓa ʋe, Ɠɛte nui Ilii anzai.»
4Davide numaa leʋeni, ti li, ti toli. É ʋaani Davide ʋɔ bɛ, naa la koba. Tɔ ma kpega ɠɛni de nɔ feya ga ɲade fai ɠɛ ná-alugi ɠa ʋoluma. É ɠaleni ma ná-pɛlɛi wu.
5Naa ʋoluma, é kaani ga kogi ɠa ma, é keela leʋe Davide ma, é ɠɛ ma: «Kogi ɠa mà.»
6Davide keela leʋeni Zoaɓe ma ga naa Ɠɛte nui Ilii leʋe ma. Zoaɓe devei veeni naa ya, ga é li masagi ʋɔ bɛ.
7Ilii zeelini Davide ma, naa Zoaɓe ta kɔɔʋɛbɛi maaɠaazaɠabo ma, ta kɔɔi ɠɛʋelei.
8Naa ʋoluma Davide ɠɛni ma: «Li ɗa-ɠoizu, è looɠo.» Kulaai ma masagi ʋɔ bɛ, naa vebɛanii leʋeni ma.
9Kɛlɛ Ilii la ɠɛni kɛɛni, é ʋa li ná-pɛlɛi wu. É laani masagi ná-pɛlɛlaʋɛ, ta maliɠii makɛ nuiti.
10Ti boni Davide ma ga Ilii la liini ná-pɛlɛi wu. Davide tolini, é ɠɛ ma: «Siɛi ɠa è zeɠezu ma, lee vaa zu è la liini ɗa-ɠoizuʋɛ?»
11Ilii gooɠaaʋoteni, é ɠɛ ma: «Minazeɠe kesui, ta Izelayɛle kpein, é ʋɛɛ Zuda ʋa, ta ɲiizu kotaiti bu, kɔɔɠuluɓai Zoaɓe ta ná-salaʋusuiti ta kɔɔ lɔɓɔi ʋa. Nà zoo ɠale, gè naati zɛ miná, gè li nà-pɛlɛi wu, gè laami, gè ɓɔɔle, ta gè la ànzai ɠoba? GALA ka kàazu, eɠɛʋelei è vulua la ga ɠite, gaamazu gè la naama vaa zii ɠɛa eyɛsu pɛ.»
12Davide ɠɛni ma: «Yɛ ʋɛ mɔnɔ za, lina, gè ɓe è ʋa, è li.» Ilii yɛni Zeeluzalɛme naama voloi, ta poluma zobui.
13Davide tolini ga ti daami wo ʋɔɔma pɔ bɛ, é dɔɔi veeni zea, naa yɛ kpɔlezu eyɛsu dɔɔi so. Kɛlɛ kpɔkɔi, Ilii liini mɔnɔ, ti la ta maliɠii makɛ nuiti. É la kɛɛni, é ʋa li ná-pɛlɛi wu.
14Poluma zobui Davide sɛʋɛ ɠɛɛni Zoaɓe ma, é fe Ilii ya ga é lii la.
15Sɛʋɛi naa zu wooi ɠɛni ga nii: «Ilii ʋilɛ ʋelelaʋɛ, ʋɛ kɔɔi ɓɔiɗai ná, wo ɠula ʋolu, wo maaɠooza ba, nii a kɛ ti yeezeeli ma, é za.»
16Zoaɓe ɠɛai ma taai zeizu kɛlɛ su, é Ilii ʋilɛni, ʋɛ ná zogai kpe ti zili nuiti ta-zalaʋusu wolaiti bɛ.
17Niiti ti ɠɛni taai naa zu, naati ti ɠulani, ti kɔɔi vala Zoaɓe ʋa. Ti salaʋusui tanigaa ta ɠuluɓai tanigaa ʋaani Davide ná-kɔɔʋɛbɛi ʋa. Ɠɛte nui Ilii ɠɛni naati saama, ti zaai.
18Zoaɓe wooleʋeni Davide ma, é kɔɔi ɠɛʋelei pɛ suɠula ma.
19Zoaɓe ɠɛni keelai ma, nii é ɠɛni liizu ga wooleʋegi: «Ɗa ɓena ga kɔɔɠɔzuʋɛ vai pɛ bo masagi ma,
20ni a yiiɠaawanana, é è ɠaazaɠa ga: ‹Lee vaa zu wo wola maaɓuɠaai taai ʋa ɠana kɔɔɠɔ ziɛgi zu? Wo la suɠwɛɛ ga nu ɠa zoo yɛsu siɠigi ungaʋɛ, é kilɛgi ʋili?
21Wo-ɠi ka su nɛi ɓaa anzanu ɠa é Yeluɓeesɛte ná-doun zunui Aɓimeelɛke ʋaani Teeɓɛse? É la ɠɛni yɛni siɠigi ungaʋɛ, é kɔtu wolai ʋili ma, é paa? Lee vaa zu wo wola maaɓuɠaai siɠigi ʋa?› Ɗa ɠɛ ma niina: ‹Ɗa-wotiɠɛ nui Ɠɛte nui Ilii ɓalaa saaʋɛ kɔɔi zu.› »
22Keelai liini ga é wooleʋegi wo Davide ma, nii a kɛ nii pɛ Zoaɓe boni ma, é li, é bo Davide ma.
23É ɠɛni Davide ma: «Taai maaɓɛ nuiti ti ɠɛa dɛ ziɛni gi wu, ti ɠulani gi laalɔɠɔma, ti ʋa dɔɓɔi zu, kɛlɛ gi ti laaʋiligɛ, eyɛsu taa ziɠidaʋɛ.
24Názu ɠa kilɛ pili nuiti ti yɛga la siɠigi ungaʋɛ, ti kilɛgiti pili, masagi ɗa-zalaʋusui tanigaa zaaʋɛ, ɗa-wotiɠɛ nui Ɠɛte nui Ilii ɠa naati saama, niiti ti zaai.»
25Davide ɠɛni keelai ma: «Nii ɠa ɗa bo Zoaɓe ma: ‹Mina niima vai zeɠe ga faaɓa. Kɔɔi zuɲaka la ɗa ga ɠula. Ɠaaɓa, è taai zo, è koloɠolo.› Li, è Zoaɓe iɲɔdɔ ga naama wooi.»
26Siɛgi zu Ilii anzai mɛnini da ga sinigi zaa, é naa ná-saa wɔlɔi woni.
27Saa wɔlɔi ma voloiti teʋegai ma, Davide nu leʋeni daaɠomisu, é naa lɛɛni ná-pɛlɛi wu, é ɠɛ ga anzai, é doun zunu zɔlɔɔni bɛ. Kɛlɛ nii Davide kɛɛni, naa wanani Ɠɔoɠɔ GALAGI ma.
