ኢብራዌ 10

1

2

3

4

5

6

7

8

9

10

11

12

13

¹ኣዪሲ ጎፔ፥ ሂጌው ያና ሎዖባ ኤሹዋ ፃላላይ ዴዔ፤ ኣው ቱሙ ሌሚሱ ባዋ። ኡባ ዎዴ ላይꬃን ላይꬃን ኢቲ ማላ ያርሹ ያርሼቴ፤ ሄዋ ዲራው፥ ሂጊ ፆሳኮ ሺቂያ ኣሳ ሄ ያርሹዋን ባላይ ባይና ኣሳ ኦꬃናው ኡባካ ዳንዳዬና።

²ፆሳው ጎዪኒያ ኣሳይ ባሬ ናጋራፔ ኡባና ጌዬዳባ ጊዲንቶ፥ ሱሬ ዎዛናን ላዔꬁዋ ናጋራ ቆፔና፤ ቃሲ ያርሺያዋካ ኣጋና።

³ሺን ኣሳይ ላይꬃን ላይꬃን ሄ ያርሹዋን ባሬ ናጋራ ሃሳዬ።

⁴ኣዪሲ ጎፔ፥ ኮሩማ ሱꬃይኔ ዴሻ ሱꬃይ ናጋራ ꬋዪሳናው ኡባካ ዳንዳዬና።

⁵ሄዋ ዲራው፥ ኪሪስቶሲ ሃ ኣላሚያ ያና ሃኒዴ፥ ሃዋዳን ያጌዳ፤ «ኔኒ ያርሹዋኔ ኢሙዋ ኮያቤይካ፤ ሺን ታው ቦላ ጊጊሳዳ።

⁶ኔኒ ፁጊያ ያርሹዋኒኔ ናጋራ ያርሹዋን ኡባካ ናሼታካ።

⁷ታኒ ሄ ዎዴ፥ ‹ፃꬃ ማፃፋን ታባይ ፃፌቴዳዋዳንካ፥ ፆሳው፥ ታኒ ኔኒ ኮዪያዋ ኦꬃናው ያዲ› ያጋዲ» ያጌዳ።

⁸ያርሹ ያርሼታና ማላ፥ ሂጊ ኣዛዚያዋ ጊዶፔኔ፥ ኪሪስቶሲ ኮይሮ፥ «ኔኒ ያርሹዋ፥ ኢሞታ፥ ፁጊያ ያርሹዋኔ ናጋራ ያርሹዋ ኡባካ ኮያቤይካ፤ ሄዋንቱን ናሼታካ» ያጌዳ።

⁹ሄዋፔ ጉዪያን ኪሪስቶሲ፥ «ፆሳው፥ ታኒ ኔኒ ኮዪያዋ ኦꬃናው ያዲ» ያጌዳ። ሄዋ ዲራው፥ ኪሪስቶሲ ላዔንꬁዋ ኤሳናው ኮይሮዋ ꬋዪሴ።

¹⁰ዬሱሲ ኪሪስቶሲ ፆሳይ ኮዬዳዋ ኦꬄዳ ዲራው፥ ባሬ ኣሹዋ ላዔንꬄናን ኢቲ ጌዴ ያርሼዳዋን ኑኒ ኑ ናጋራፔ ጌዪ ኣጌዶ።

¹¹ቄሳቱዋ ኡባቱ ሃቼ ሃቼ ኤቂዴ፥ ባሬ ኦሱዋ ኦꬂኖ፤ ቃሲ ናጋራ ꬋዪሳናው ኡባካ ዳንዳዬና ኢቲ ማላ ያርሹዋ ዛሪ ዛሪዴ ያርሺኖ።

¹²ሺን ኪሪስቶሲ ናጋራ ዲራው፥ ኡባ ዎዴው ጊዴዳ ኢቲ ያርሹዋ ያርሺዴ፥ ፆሳፔ ኡሼቻ ባጋና ኡቲ ኣጌዳ።

¹³ፆሳይ ሲንꬃፔ ኪሪስቶሳ ሞርኬቱዋ ኪሪስቶሳው ጌዲያን ዬꬊያዋ ኦꬃና ጋካናው፥ ያኒ ናጌ።

¹⁴ኣዪሲ ጎፔ፥ ኢ ኢቲ ጌዴ ያርሼዳዋን፥ ናጋራፔ ጌዬዳዋንታ ሜꬊናው ባላይ ባይናዋንታ ኦꬄዳ።

¹⁵ቃሲ ጌሻ ኣያናይ ኑሲ ማርካቲዴ፥ ሃዋዳን ያጌ፤

¹⁶«ታኒ ሄ ጋላሳቱዋፔ ጉዪያን፥ ኡንቱንቱና ጫቄቲያ ጫቁ ሃዋ፡ ታኒ ታ ሂጊያ ኡንቱንቱ ቆፋን ዎꬃና፤ ቃሲ ኡንቱንቱ ዎዛናንካ ፃፋና» ያጌ።

¹⁷ቃሲ ሄዋፔ ጉዬና፥ «ታኒ ኡንቱንቱ ናጋራኔ ኡንቱንቱ ማካላ ኦሱዋ ላዔንꬆ ሃሳዪኬ» ያጌ።

¹⁸ፆሳይ ሄ ናጋራ ኣቶ ጌዳ ዎዴ፥ ናጋራ ꬋዪሳናው ሃዋፔ ሲንꬃው ያርሹዋ ኮሼና።

¹⁹ሲሚ ታናዳን ኣማኒያዋንቶ፥ ኑኒ ዬሱሳ ሱꬃ ባጋና ኡባፔ ኣꬊያ ጌሻ ሳዓ ጌላናው ኑሲ ፃላቴꬃይ ዴዔ።

²⁰ኪሪስቶሲ ኑሲ ኦራꬃ ኦጊያኔ ዴዑዋ ኦጊያ ጋሪዱዋ ባጋና፥ ሄዋ ጉሳይ ባሬ ቦላ ባጋና ዶዬዳ።

²¹ኑሲ ፆሳ ጎሌን ሱንꬄቴዳ ዎልቃማ ቄሳይ ዴዒያ ዲራው፥

²²ኑኒ ሱሬ ዎዛናና፥ ቱሙ ኣማኑዋና፥ ኢታ ዎዛናፔ ጌዬዳ ዎዛናናኔ ቃሲ ፂሎ ሃꬃን ሜጬቴዳ ቦላና ፆሳኮ ሺቆይቴ።

²³ኑሲ ኢማና ጌዳ ፆሳይ ኣማንꬂያ ዲራው፥ ኑኒ ዴማና ጊዴ ናሼቻን ናጊ ኡቴዳዋ ሎይꬂ ኦይቆይቴ።

²⁴ኢቱ ኢቱዋና ዋኒ ሲቄታኔንቶኔ ቃሲ ሎዖ ኦሱዋ ዎቲ ኦꬃኔንቶ፥ ኢቱ ኢቱዋሲ ቆፔቶ።

²⁵ኢቱ ኢቱ ሺቁዋ ዶያ ኡዲዴ ሺቂያዋዳን፥ ኑኒካ ኢቲፔ ሺቂያዋ ኣጎኮ፤ ሺን ጎዳ ጋላሳይ ማታቲያዋ ሂንቴንቱ ቤዒያ ዲራው፥ ኢቱ ኢቱዋ ሜንꬄꬄቶ።

²⁶ኑኒ ቱማቴꬃ ኤራ ኣኪዲጊዴ፥ ኤሪዴ ናጋራ ኦꬂያዋ ጊዶፔ፥ ሃዋፔ ሲንꬃው ናጋራ ꬋዪሲያ ያርሹ ኢቲባይኔ ባዋ።

²⁷ሺን ያሺያ ፒርዳ ናጊያዌኔ ፆሳ ኢፂያ ኡባ ማናው ዎልቃማ ታማይ ዴዔ።

²⁸ሙሴ ሂጌው ኣዛዜቴና ኡራይ፥ ላዑ ኡራይ ዎይ ሄዙ ኡራይ ኣ ቦላ ማርካቶፔ፥ ቃሬቲ ባይናን ሃይቄ።

²⁹ፆሳ ናዓ ካꬌዳ ኡራይ፥ ባሬና ናጋራፔ ጌሼዳ ፆሳ ጫቁዋ ሱꬃ ቱናባዳን ቆፔዳ ኡራይ፥ ቃሲ ኣꬎ ኬካቴꬃ ጌሻ ኣያና ቦሪያ ኡራይ፥ ኣይ ኬና ኢታ ፒርዳ ኣካናው ቤሲንቶኔ ኣኔ ቆፒቴ።

³⁰ኣዪሲ ጎፔ፥ «ታኒ ሃሉዋ ኬሳናኔ ኩሺያ ዛራና» ጌዳዋ ኑኒ ኤሬቶ፤ ቃሲካ፥ «ጎዳይ ባሬ ኣሳ ፒርዳና» ያጌዳ።

³¹ዴዑዋ ፆሳ ኩሺያን ኩንዳናዌ ዳሮ ያሺያዋ።

³²ሂንቴንቱሲ ፆሳ ፖዑ ፖዔዳዋፔ ጉዪያን፥ ሂንቴንቱ ዳሮባን ዋዬቲዴ፥ ዎልቃማ ዋꬌታን ጌንጬዳ ቤኒ ዎዲያ ሃሳዪቴ።

³³ኢቲ ኢቲ ጌዴ ሂንቴንታ ኣሳ ሲንꬃን ቦሬዲኖኔ ፓፃ ካዔዲኖ፤ ቃሲ ሃራ ዎዴ ሄዋዳን ኦꬄዳዋንቱናኔ ኢቲፔ ዴዔዲታ።

³⁴ኣዪሲ ጎፔ፥ ቃሹዋን ዴዒያ ኣሳቱዋሲ ሂንቴንቱ ቃሬቴዲታ፤ ያቲዴ ሂንቴንቱሲ ሜꬊናው ዉሬና ኡባፔ ኣꬊያ ሻሉ ሳሉዋን ዴዒያዋ ሂንቴንቱ ሁጴው ኤሬዳ ዲራው፥ ሂንቴባ ኡባ ኣኪዲጎፔ ሂዶታን ጌንጬዲታ።

³⁵ሄዋ ዲራው፥ ዎልቃማ ዎዪታና ዴዒያ ሂንቴንቱ ፃላቴꬃ ኦሎፒቴ።

³⁶ፆሳይ ኮዪያዋ ኡዲዴ፥ ኢ ሂንቴንቱሲ ኢማና ጌዳዋ ኣካናው ጌንጫና ኮሼ።

³⁷ኣዪሲ ጎፔ፥ ፆሳ ማፃፋይ፥ «ኣማሬዳ ዎዲ ኣቴዳ። ዪያዌ ያናዋ፤ ጋሚዔና።

³⁸ታ ፂሉ ኣማኔቲዴ ዴዓናዋ። ሺን ኦኒኔ ጉዬ ሲሞፔ፥ ታና ናሼቼና» ያጌ።

³⁹ኑኒ ኣማኔቲዴ ኣቴዳዋንቱ ባጋ ጊዲያዋፔ ኣቲን፥ ጉዬ ሲሚዴ ꬋዬዳዋንቱ ባጋ ጊዶኮ።