Text copied!
CopyCompare
Luritja Bible - Yipuru wangkapayiku

Yipuru wangkapayiku 10

Help us?
Click on verse(s) to share them!
1Katutjalu irriṯi Muutjanya nintiṉu tjaatji kaliki palula tjana tjawirrilyi tjuuḻatjarrangku mirri pungkula kutjantjaku. Tjana yalatji pungkula kutjalpayi Katutjanya tjanampa kalypa nyinanytjaku. Katutjalu kuliṉu, “Ngula Yiitjunya tjawirrilyi nguwanpa mirrirrinytjala yaṉangu tjuṯa ngayuku kalyparriku, kuya tjanampa paluru waṉinytjala.” Muutjalungarri kutu yiiya kutjupa kutjupangka tjawirrilyi pungkula kutjalpayi Katutjaku. Yalatji tjana rawangku pungkula wiya Katutjaku kalyparringkupayi. Yalatji Muutjaku luwuwana tjana nyinarra wiya Katutjaku kalyparringu.
2Tjinguru yaṉangu tjuṯangkuya tjawirrilyi pungkula Katutjaku kalyparringkula nyinanyingka, tuḻkuku mayutju tjuṯangku piyuku tjawirrilyi pungkula kutjantjawiyangkuya wantimara. Yaṉangu paluru tjana tjukarurru kutu nyinamara. Paluru tjana tjawirrilyi pungkula wiya Katutjaku tjukarurru nyinarra kalyparringu.
3Tuḻkuku mayutju tjuṯangkuya kuka tjawirrilyi kutu pungkula kutjalpayi tjanampa yaṉangu tjuṯaku, yiiya tjuṯa. Yaṉangu tjuṯangku yalatji kutu kulilpayi, “Nganaṉa kuya palyara piyuku kuka tjawirrilyi Katutjaku katinytjaku, pungkula kutjantjaku.”
4Kuka tjawirrilyi tuḻkuku mayutju tjuṯangku pungkula kutjantjala Katutjalu wiya yaṉangu tjuṯaku kuya waṉipayi. Yalatji pulukakuṉu ngurrka, nanikutakuṉu ngurrkaṯarra yintinyingka, nyakula Katutjalu wiya tjanampa kuya waṉipayi.
5Yiitju Kurayitjalu manta ngaakutu ngalya yankula yalatji watjaṉu, “Katutja, nyuntu wiya yunytjurrinyi tjana tjawirrilyi ngalya katirra nyuntupa pungkula kutjantjaku. Yaṉangungku kuya palyara kuka tjawirrilyi nyuntupa katinytjaku wiya nyuntu yunyparringkupayi. Yalatji kulira nyuntu ngayunya mantakutu wantirriyaṉu tjawirrilyi nguwanpa waralyngaranytjaku.”
7Palulanguru Yiitju Kurayitjalu piyuku watjaṉu, “Katutja. Nyuntupa wangka yurruntitjawana ngayulu ngaranyi tjukarurrungku palyalkitja.”
8Muutjaku luwu ngaranyi yaṉangu tjuṯangku kuya palyara kuka tjawirrilyi Katutjaku katinytjaku. Wangka panyapa Yiitjulu watjaṉu, “Katutjanya wiya unytjurringanyi yaṉangu tjuṯangku palumpa kuka tjawirrilyi rawangku katinytjaku.”
9Wangka panyapa watjara Yiitju Kurayitjalu kuliṉingi yalatji, “Yaṉangu tjuṯangku wiya kuka tjawirrilyi kutu pungkula kutjantjaku. Kuwarri ngayulu ngaranyi tjawirrilyi nguwanpa mirrirringkula Katutjaku waarrka palyalkitja, yaṉangu tjuṯaku kuya waṉikitja.”
10Yiitju Kurayitjanya tjawirrilyi nguwanpa watiyangka mirrirringkula yaṉangu uwankarrakulampa kuya waṉingu. Yalatji paluru Katutjaku waarrka palyaṉu. Wiya paluru kanarringkula piyuku tjawirrilyi nguwanpa mirrirringu, wiya. Kutjungara paluru tjawirrilyi nguwanpalampa mirrirringu yaṉangu yuwankarraku kuya waṉikitja.
11Tuḻkuku mayutju paluru tjana Katutjaku kuka tjawirrilyi kutu pungkula kutjalpayi yiiya tjuṯangka. Yalatji paluru tjana pungkula kutjantjala Katutjalu wiya yaṉangu tjuṯaku kuya waṉipayi.
12Kanya Yiitju Kurayitjanya kuyalampa waṉikitja kutjungara mirrirringu. Yalatji mirrirringkula paluru Katutjala tjungu kutu kuwarri nyinanyi. Yaṉangu ngaṉṯitja tjuṯakuṯarra paluru kuya tjanampa mirrirringkula waṉingu.
13Ngurra palula paluru kutu paṯara nyinanyi Katutjalu palumpa yunytjuwiya tjuṯa tjananya pungkula wantirriyantjaku. Yiitjunyalpi mayutju tiṉa tjanampa nyinaku.
14Kala, Yiitju Kurayitjanya tjawirrilyi nguwanpa mirrirringkula yaṉangu tjuṯaku kuya waṉingu, Katutjakuya kalypa nyinanytjaku.
15Wangka palunya nguwanpa Katutjaku kurrunpangku tjakultjunu nganaṉa kulintjaku. Palumpa kurrunpangku yalatji Katutjakuṉu watjaṉu,
16“Ngayulu Katutjalu tjananya yalatji yaṉṯayaṉṯalkitjangku watjalku. Ngayulu tjananya nintilku tjana pinangku ngayuku wangka kutu kulintjaku. Piipangka wakaṉutja nganaṉa tjuṯangara riitarringkula ninti nyinanyi. Palunya nguwanpa ngayuluṉa tjananya tjuṯangara nintilku luwu ngayukuṉuwanaya tjukarurru nyinanytjaku. Ngula ngayulu Katutjalu yaṉangu tjuṯa yaṉṯayaṉṯalkitjangku watjalku. Ngayulu tjananya nintilku tjana pinangku ngayuku wangka kutu kulintjaku.
17Paluru tjana kuya palyantjala ngayulu kuya tjanampa waṉiku. Ngayulu tjananya kaangkinytjingku yaṉṯayaṉṯanmalpa.”
18Yalatji, Katutjalu nganampa kuya waṉipayi, Yiitjunya tjawirrilyi nguwanpa mirrirringutjangka. Wiya nganaṉa kuka tjawirrilyi kutu tjaatjikutu Katutjaku katinytjaku, pungkula kutjantjaku, wiya.
19Ngayuku walytja tjuṯa, wangka ngaatjanyaya kulila! Irriṯi tuḻkuku mayutjungku tiitji pulukakuṉu ngurrkatjarra kalikingka yunngu katirra kanyilpayi, Katutjala ila. Yiitjunya nganaṉala ila ngaranyi paluru watiyangka tjawirrilyi nguwanpa ngurrka yintirra mirrirringu. Nganaṉa palya Katutjaku kalyparringkula palumpa nguḻuwiyala nyinanyi. Paluru nganaṉala ila ngaranyi. Yuwa, Yiitjuku wangka nganaṉa kulira walytjarringkula kana kutulpila nyinaku.

21Yilta Katutjaku ngurrangka tuḻkuku mayutju tiṉa nganampa Yiitjunya nyinanyi. Ngurra palula paluru mayutju tiṉa nyinanyi.
22Palumpa wangka nganaṉa kulira walytjarringkula Katutjaku tjukarurru nyinanytjaku. Paluru nganampa kuya waṉirra tjukarurru palyaṉu.
23Nganaṉa kutu Yiitjuku wangkawana tjukarurru nyinanytjaku. Katutjalu nganaṉanya yaṉṯayaṉṯalkitjangku watjara ilta nganaṉanya paluru kanyilku palumpa ngurrangka.
24Yiitjuku walytja tjuṯangku puṯu kulintjala nganaṉa purinypa tjanala wangkanytjaku, tjana kulira yunypalpi Yiitjuku nyinanytjaku. Nganaṉa kutjupa tjuṯaku tjukarurrungku palyantjaku. Nganaṉa tjanala nintira yunypa palyantjaku pukuḻmankunytjaku tjana kutjupa tjuṯaku tjukarurrungku palyantjaku.
25Nganaṉa kutu tjungurrinytjaku, Katutjanya puḻkawaṉikitja. Kutjupa tjuṯa wiyaya tjaatjingka tjungurringkupayi. Nganaṉa purinypa tjanala wangkanytjaku, tjana kulira tjaatjingka piyuku tjungurringkunytjaku. Kutjupa tjuṯangkaṯarra nganaṉa tjanala purinypa wangkanytjaku, tjana kutu Yiitjuku tjukarurrulpi nyinanytjaku, paluru tjinguru kuwarri mantakutu piyuku ngalyankunytjala.
26Yaṉangungku Yiitjukuṉu wangka kulira tjukarurru kutu nyinanytjaku, wiya paluru tjukarurru nyinarra munupinarringkulalpi kuya kutu palyara nyinanytjaku, wiya. Yiitjuku wangka paluru wantirra kuya kutu palyantjala Katutjalu wiya kuya palumpa waṉiku, wiya.
27Kuya waṉinytjawiyangka yaṉangu paluru Katutjaku nguḻunguḻu nyinamalpa. Kuutawutjungka Katutjalu palunya watjara warukutu wantirriyalku. Katutjaku yunytjuwiya nyinapayi tjuṯa, uwankarra tjananya paluru watjara warukutu wantirriyalku.
28Yirriṯi yaṉangungku Muutjaku wangka kutu kulira wantirra nyinanyingka, yaṉangu kutjupa tjuṯangkuya aḻṯuruwiyangku palunya mirrintankupayi. Paluru kuutawutjungka ngaranyingka yaṉangu kutjarrangku, tjinguru tjirripalangku kurungku nyakula tjakultjunkupayi, paluru Muutjaku wangka kulilwiyangku kuya palyaṉutjangka. Tjana alatji tjakultjunutjangka palunyaya witira katirra mirrintankupayi.
29Yaṉangu palunya nguwanpa Katutjaku katjakuṉu wangka kulira kutu wantinytjala ngula Katutjalu kuutawutjungka yaṉangu palunya yaalytjinku? Yaṉangu paluru nintingku kuliṉingi Yiitjunya palumpa kuya waṉikitja watiyangka waralyngarala ngurrka yintingutjangka. Yalatji tjawirrilyi nguwanpa mirrirringanyingka yaṉangu tjuṯa Katutjaku kalyparringkupayi. Yalatji Katutjaku kurrunpangkuṯarra yilta kuliṉi. Yalatji nganaṉa kulira palumpa walytjarringkula tjukarurru kutu nyinanyi. Yaṉangu paluru wangka palunya kulira wantipayi, Katutjalu palunya puntura kuru watjara warukutu wantirriyalku.
30Nganaṉa kuliṉi Katutjaku wangka yurruntitja yalatji, “Yaṉangungku kuya palyantjala, ngayuluṉa ngaparrtjingku palunya pungkuku.” Katutjalu piyuku yalatji watjaṉu, “Ngayulu mayutjungku tjananya yaṉangu tjuṯa kuutamilara watjalku, ngayuku walytja tjuṯaṯarra.”
31Katutjanya ilta nyinanyi. Yaṉangu yalatji kutu kuya palyantjala Katutjalu ilta palunya warukutu wantirriyalku. Nganaṉa palumpa nguḻurringkula tjukarurru kutu nyinanytjaku.
32Wangka ngaatjanyaya kulila! Irriṯi nyurrangarri Katutjaku wangka Yiitjunyatjarra kulira palumpa walytjarringu. Kutjupa tjuṯangku nyurrangarrinya panypuranganyingka kutunyurra tjukarurru nyinangi.
33Yaṉangu tjuṯangka kurungka kutjupa tjuṯangku nyurrangarrinya panypurangkula pungangi. Yiitjuku walytja kutjupa tjuṯa paluru tjana panypurangkula punganyingka nyurrangarri yankula tjanala tjungu aalpa ngarapayi.
34Yiitjuku walytja kutjupa tjuṯa tjana witira tjiilangka tjarrpatjunu, puritjina nyinanytjaku. Puritjina tjana nyinanyingka nyurrangarri yaḻṯururringkula yankula tjananya maḻpangku kanyilpayi. Tjikipaka tjuṯangku yankula nyurrangarrimpa waaḻa kilytjuntankula yulytja tjulyara katinyingka, palya kutunyurra nyinangi, yalatji kulira, “Yulytja manta ngurrara mungutja. Nganaṉa palya Yiitjuku walytja nyinanyi, ngula palumpa ngurrangka kana kutu nyinamalpa.”
35Nyurrangarri kutu nguḻuwiya nyinanytjaku. Yalatji nyurrangarri tjukarurru nyinanytjala Katutjalu yunyparringkula ngula nyurrangarrimpa tjukarurru palyalku.
36Katutjaku nyurrangarri kutu tjukarurru nyinanytjaku. Yalatji kutunyurra nyinanytjala Katutjanya nyurrangarrimpa yunypa nyinaku. Paluru watjara ilta nyurrangarrinya kana kutu nyinatjunku.
37Palunya nguwanpa Katutjaku wangka irriṯi tjunutja ngarrinyi yalatji, “Rawawiya nyinarra mayutju Kurayitjanya yilta piyuku ngalya yankuku, wiya paluru rawa nyinarra ngalya yanku.
38Yaṉangu palumpa walytjarringkula kana kutu nyinaku. Katutjanya yaṉangu palumpa yunypa nyinaku. Tjinguru yaṉangu kutjupa palumpa walytjarringkula munupinarringkula palumpa wangka wantikulpi. Yalatji munupinarringkula wantinytjala Katutjanya wiya palumpa yunypa nyinaku.”

39Munupinarringkula wantipayi tjuṯa nguwanpa wiya nganaṉa nyinanyi. Nganaṉa kutu palumpa wangka kulira nyinamalpa, paluru piyuku mantakutu ngalya yankula nganaṉanya mantjira katinytjaku.