Hebreyu 10

1

2

3

4

5

6

7

8

9

10

11

12

13

¹A ya ngamin kiden tinarabaku da ta idi gafu pangurug da ta lintig kiden nga nesurat ni Moses a bakkan ta yen kid ya mangatad ta pagkappyanan da, te kuman kid la na keangarigan nga neunnan na Namaratu ta dumatangen sangaw ta maatubang para na araw. Te maski am namengpiga ya pangiatang da ta kuman na neatang da kiden ta kada darun, a awan haman ta neatad da ta tolay kiden petta matunung kid mina ta Namaratu.

²Te am angarigan ta nagmappyan mina ya nonot da a neimmang da mina ya neatang da kiden. A am kakurugan mina ta kustu ya nekabaggaw na nonot da kiden a aweda mina nanonotan ya liwat da kiden.

³Ammi gafu ta kanayun kid nangatang ta kada darun a yen ya nakanonotan da ta itta para la ya liwat da.

⁴On, te awena mabalin ta daga na baka ikid na kalding ya mangazi ta liwat da kiden.

⁵A yen ta umange ya Anak na Namaratu ta lutakin, te ya nebar na ta dama na en a “Yen ta dinob nak, te bakkan ta kuman na iatang da kiden ya ikayat mu. A neatad mu teyak ya bari na tolay, petta yen ya meatang teko,

⁶te bakkan ta daga na ayam ikid na naapang na bilsag ya ikayat mu.

⁷“A ya inuhohug ken teko, Dyos ku, a ‘Itta yak mantu sin, te kompormi ya pakkwam teyak, a malogonak la ta kuman na linavun da teyak ta surat kiden,’kunku.”

⁸A ya napolu en uhohug na ta isin a bakkan kan ta magmagannud na atang ya ikayat na Namaratu, te maski am yen kid ya neatang da gafu ta lintig na kiden a awena kid nekatalak.

⁹A ya mekaduwa en uhohug na ta “Itta yak mantu sin te kompormi la ya pakkwam teyak,” kunna, a yen ya pakkamun tam ta inawe na Namaratu ya pangatang da ta idi petta intu metali ya pakeatang na Anak na en.

¹⁰A gafu ta malogon i Hesusen ta nepakkwa na Namaratu tentu a napakoma kitanan gafu ta nepangiatang na ta bari na en, a maski am mittan la ya nepangiatang na.

¹¹A ya kuman na tarabaku na padi kiden ta idi a kinanghahaw nangiatang kid, te kanayun pidwan da la ya kuman na neatang da kiden. Ammi awan haman ta naazi na neatang da kiden ta liwat na tolay kiden.

¹²Ammi te Hesusen a mittan la ya nepangiatang na ta bari na a kustun yen addet ta addet. Te tentu en nabalin nangatang a nagtogkok na hapa ta kanawan na Namaratu ewan, te makipagturay hapa tentu.

¹³A itta la ten magaindag addet ta sa naabak ya ngamin kiden katapil na.

¹⁴A gafu ta tatakday la na atang a sa nekaru ni Hesus ya ngamin kiden liwat na ngamin kiden mabaggawan, petta awan pulus ta pakehuyan da addet ta addet.

¹⁵A yen hapa ya dana nepasikkal na Kahalwa na Namaratu gafu ta nepeuhohug na ta aglavunen, te ya uhohug na en a

¹⁶“Sangaw ta maatubang na araw a mamaddayak ta takwan na pakitulag ku ta tolay ku kiden, a iyak hapa la sangaw ya mangipasinap ta lintig ku kiden tekid, te isurat ku ta nonot da, petta malogon kid sangaw mangurug,” kunna.

¹⁷A ya uhohug na en para a “Awek na sangaw nonotan ya liwat da kiden,” kunna ta suraten.

¹⁸A gafu ta sa pinakoman na ya ngamin kiden liwat tam a awenan masapul ta itta para ya meatang nga mangikaru ta liwat tam.

¹⁹A gafu ta nagarut ya daga ni Hesus ta pasi na en a yen mina ya ikatalak tam, kahkahulun, ta sa makasarok kitanan ta pake mangilin na silid nga agyan na Namaratu ta langitewan.

²⁰Te ya zingzingen nga ga-gamit nga nagsalin ta gagangayen kapilya, a napissang na, te yen ya keangarigan na bari ni Hesusen nga napapasi gafu tekitam. Ammi gafu ta natolay hala a nehukat na tekitam ya bagu na angen tam nga katolayan tam hapa.

²¹A gafu ta intu hapa ya kadakalan na padi tam nga magturay ta bali na Namaratu a pake umabikan kitam mantu la ta Namaratu ewan. A awetam pagduwaduwan ya nonot tam, te pake itug tam hud la ya pangikatalak tam tentu, te gafu ta daga na en a pake nabaggawan na ya nonot tam ta tinarabaku tamen, a naulin hapa ya gagangay na bari tam ta nepagzigut tamen.

²³A awetam hapa pagpopoyungan ya nonot tam, am awa pake idulot tam hud la ya pangikatalak tamen nga nebosag tam ta pangurug tamen, te mekatalak hapa ya mangidulot ta nekari na en tekitam.

²⁴A nonotan tam hapa am had kuntam magkapatpaturad, petta awetam taliban ya magkaid-idduk ikid na mappya na tarabaku.

²⁵A awetam la parigan ya gagangay na kadwan nga magabsen ta paggagimmung tam, te mapmappya hud la ta magimpaspasikan kitam, aglalo te maita tam haman ta abikan na ya araw na datang na Dafu tamen.

²⁶Te am naparuba tanan ya kakurugan, otturu pagtalekudan tam a awan na sangaw ta takwan na mangazi ta liwat tam.

²⁷A awan hapa sangaw ta takwan na pakesipatan tam am bakkan la ta kattatalawanen na panglavvu na Namaratu nga mangapang ta katapil na kiden.

²⁸Intu mina nonotan muy ya nakkwa ta nakaliwat kiden ta idi, te am itta ya awan nangurug ta lintig kiden nga ginawat ni Moses ta Namaratu, ikid na itta hapa ya duwa ono tallu na nangipasikkal ta liwat na, a pinapasi da la, aweda nekallak.

²⁹A kontimas mantu ta madmadammat sangaw ya pangpa-gang na Namaratu ta magtalekuden ta Anak na en, te nedadula nan haman ya daga na en nga nangbaggaw tekitam, yaga nagtalekudan na para ya allak na Kahalwa na Namaratu tekitam.

³⁰Te amu tam haman ya nebar na en ta “Iyak sangaw ya mangibalat, a pa-gangan ku sangaw ya makaliwat,” kunna. A kumanen hapa ya inuhohug na ta takday para na surat; “Pa-gangan sangaw na Namaratu ya tolay na kiden nga makaliwat,” kunna.

³¹A kattatalawan mantu ya makasimmu ta pangpa-gang na sitatolay na Dyos.

³²Mappya, kahkahulun, ta nonotan muy ya kasasaad muyen ta gafu na pangurug muy, te tekamuyen nadakaran gafu ta uhohug na Namaratu a nasimmu muy hapa ya addu na zigat. Te namatan kam ta atubang na addu na tolay, a nedadula da kam, yaga tinapil da kam para, ammi masikan kam la nagattam. A ta kadwan a nesipat muy hapa ya bari muy ta kahulun muy kiden nazigatan,

³⁴te nakipagrikna kam hapa ta mangurug kiden nga nabalud gafu ta pangurug da. A naattaman muy hapa setalak ya nepakagubat na kwa muy kiden, te dana amu muy ta itta hala sangaw ya magamid muy ta mapmappya na kwa muy nga awan mawakay.

³⁵A awemuy mantu iwarad ya turad muy, te yen sangaw ya pakasagolyatan muy ta dakal na sagolyat.

³⁶Te mappya ta magattam kitam la petta idulot tam ya ikayat na Namaratu, a maatadan kitam hapa sangaw ta nekari na en tekitam.

³⁷Te ya uhohug na en ta suraten a “Assang la na araw kapye na dumatang na ikatalak tamen nga dumatang, te awan ta talantan na.

³⁸A yen sangaw ya matolay ya ikwentak ta matunung gafu ta pangikatalak na teyak. Ammi am itta ya magtalekud ta nekatalak na en a awek na sangaw pakolangan,” kunna hapa na Namaratu.

³⁹Ammi awek ibar, kahkahulun, ta itta tekitam ya magtalekud ikid na melogot, te ikitam ya mangidulot ta pangikatalak tam petta mekerutan kitam.