ኢብራዌ 11

1

2

3

4

5

6

7

8

9

10

11

12

13

¹ኣማኑዋ ጊያዌ፥ ዴማና ጊዴ ናሼቻን ናጊ ኡቴዳባይ ኣማንꬂያዋኔ ቤዓናው ዳንዳዬናባ ኤሪሲያዋ።

²ፆሳይ ቤኒ ጪማ ኣሳው ማርካታዌ፥ ኡንቱንቱ ኣማኔዳዋና።

³ሳሉኔ ሳዓይኔ ፆሳ ቃላን ሜꬌቴዳዋ ኣማኑዋን ኑኒ ኤሬቶ፤ ሄዋ ዲራው፥ ቤቲያባይ ቤቴናባፔ ሜꬌቴዳ።

⁴ኣቤል ቃዔላዋፔ ኣꬊያ ያርሹዋ ፆሳው ያርሼዳዌ ኣማኑዋና። ፆሳይ ኣ ኢሙዋባ ማርካቲዴ፥ ኢ ፂሉዋ ጊዴዳዋካ ማርካቴዳ፤ ኣቤል ሃራይ ኣቶ ሃዪቄዳሺንካ፥ ባሬ ኣማኑዋን ሃዒ ጋካናው ሃሳዬ።

⁵ሄኖኪ ሃይቄናን ሳሉዋ ቤዳዌ ኣማኑዋና፤ ፆሳይ ኣፌዳ ዲራው፥ ኦኒኔ ኣ ቤዓናው ዳንዳዪቤና። ፆሳ ማፃፋይ፥ «ሄኖኪ ሳሉዋ ባናፔ ካሴ ፆሳ ናሼቼዳ» ያጌ።

⁶ኣማኑ ባይናን ኦኒኔ ፆሳ ናሼቻናው ዳንዳዬና፤ ኣዪሲ ጎፔ፥ ፆሳኮ ዪያ ኦኒኔ ፆሳይ ዴዒያዋኔ ባሬና ኮዪያዋንቶ ዎይታ ኢሚያዋ ኣማናናው ኮሼ።

⁷ኖሄ ቤዓናው ዳንዳዬና ሲንꬃፔ ሃናናባው ፆሳይ፥ «ኔና ናጋ» ጊና፥ ፆሳው ያዪዴ፥ ባሬናኔ ባሬ ሶይ ኣሳ ኣሻናው ማርካቢያ ሜꬌዳዌ ኣማኑዋና፤ ያቲዴ ሄዋን ሃ ሳዓ ቦላ ፒርዲዴ፥ ኣማኑዋን ቤቲያ ፂሎቴꬃካ ፆሳፔ ኣኬዳ።

⁸ኣብራሃሞ ላታናዳን፥ ፆሳይ ባሬው ኢማና ጌዳ ጋዲያ ባና ማላ፥ ፆሳይ ባሬና ፄሴዳ ዎዴ፥ ኣዛዜቴዳዌ ኣማኑዋና፤ ኢ ባሬ ጋዲያፔ ኬሲዴ ቢያ ዎዴ፥ ሃቃ ቢንቶኔ ኤሬናን ኬሴዳ።

⁹ኣብራሃሞ ፆሳይ ባሬው ኢማና ጌዳ ጋዲያን ሃራ ቢታ ኣሳዳን ዴዔዳዌ ኣማኑዋና፤ ፆሳይ ሄ ኢማና ጌዳዋ ባሬናና ኢቲፔ ላታና ዪሳቃናኔ ያዪቆባና ዱንካኒያን ዴዔዳ።

¹⁰ኣዪሲ ጎፔ፥ ኣብራሃሞ ፆሳይ ሎዖ ባሱዋን ቆፒዴ ኬፄዳ ካታማ ናጌ።

¹¹ሳራ ባሬ ሁጴው ሃራይ ኣቶ ኤጫዴካ፥ ኢማና ጌዳ ፆሳይ ኣማኔቴዳዋ ጊዴዳዋ ኤሬዳ ዲራው፥ ናዓ ሻሃራናው ዎልቃ ዴሜዳዌ ኣማኑዋና።

¹²ሄዋ ዲራው፥ ሃይቄዳ ኣሳ ማላቲያ ኢቲ ቢታኒያፔ ሳሉዋን ዴዒያ ፆሊንቲያ ኬና፥ ኣባ ጋፃን ዴዒያ ፓይዱ ባይና ሻፊያ ኬና ዛሬቱ ዬሌቴዲኖ።

¹³ሄ ኣሳቱ ኡባቱ ኣማኑዋን ሃይቄዲኖ፤ ባሬንቶ ፆሳይ ኢማና ጌዳዋካ ኣኪቤይኪኖ፤ ሺን ሃኩዋን ሄዋ ቤዒዴ፥ ሳሮቴዲኖ። ቃሲ ኡንቱንቱ ሳዓን ኢማꬃኔ ዬዴሪሴቲዴ ኬሴዳ ኣሳቱዋ ጊዴዳዋ ኤሬዲኖ።

¹⁴ኣዪሲ ጎፔ፥ ሄዋዳን ጊያ ኣሳቱ ባሬንቱ ሁጴ ጋዲያ ኮዪያዋ ኤሪሲኖ።

¹⁵ኡንቱንቱ ሄ ዬጊዴ ኬሴዳ ጋዲያ ሲማናው ቆፔዳዋ ጊዲንቶ፥ ጉዬ ሲሚያ ካጫ ዴሜናን ኣጊኪኖ፤ ሺን

¹⁶ኡንቱንቱ ሄዋ ኣጊዴ፥ ሎዒያ ጋዲያ ላሞቲኖ፤ ሄዌ ሳሉዋ ጋዲያ። ሄዋ ዲራው፥ ፆሳይ ኡንቱንቱ ፆሳ ጌቴታናው ዬላቴና። ኣዪሲ ጎፔ፥ ኢ ኡንቱንቶ ካታማ ጊጊሲ ዎꬄዳ።

¹⁷ኣብራሃሞ ዪሳቃ ያርሻኔንቶ ዎይ ያርሼኔንቶ፥ ፆሳይ ኤራናው ፆሞሴዳ ዎዴ፥ ኣብራሃሞ ኣማኑዋን ኣ ያርሼዳ። ፆሳይ ኣብራሃማ፥ «ኔ ዛሪ ዪሳቃ ባጋና ፄሴታናዋ» ጌዳሺንካ፥ ኣብራሃሞ ባሬ ናዓ ዪሳቃ ያርሻናው ጊጌዳ።

¹⁹ኣብራሃሞ ፆሳይ ዪሳቃ ሃራይ ኣቶ፥ ሃይቁዋፔካ ፓꬃናው ዳንዳዪያዋ ኤሬዳ፤ ሄዋ ዲራው፥ ሃይቁዋፔ ጉዬ ኣ ዛሪዴ ኣኬዳ።

²⁰ዪሳቂ ሲንꬃፔ ሃናናባው ያዪቆባኔ ኤሳ ኣንጄዳዌ ኣማኑዋና።

²¹ያዪቆቢ ሃይቃና ሃኒዴ፥ ዮሴፎ ናና ሁጲያን ሁጲያን ኣንጄዳዌኔ ጋቲማን ጉፌቲዴ፥ ፆሳው ጎዪኔዳዌ ኣማኑዋና።

²²ዮሴፎ ሃይቃናው ማቲዴ፥ ኢስራዔሊያ ኣሳይ ጊብፄፔ ኬሳናዋ ሃሳዬዳዌኔ ባሬ ሜቄꬃ ኦꬃናባ ኡንቱንታ ኣዛዜዳዌ ኣማኑዋና።

²³ሙሴ ዬሌቴዳዋፔ ጉዪያን፥ ኣዉኔ ኣታ ማላ ሎዖ ናዓ ጊዴዳዋ ቤዒዴ፥ ሄዙ ኣጌና ቆሴዳዌ ኣማኑዋና፤ ኡንቱንቱ ካቲያ ኣዋጆካ ያዪቤይኪኖ።

²⁴ሙሴ ዲጬዳዋፔ ጉዪያን፥ ጊብፄ ካቲያ ናቲ ናዓ ጌቴታናዋ ኢፄዳዌ ኣማኑዋና።

²⁵ናጋራን ሙሴ ጉꬃ ዎዲያ ናሼታናዋፔ፥ ፆሳ ኣሳና ዋዬታናዋ ዶሬዳ።

²⁶ዎዴፔ ዴማና ዎይታ ኢ ቲሺ ኡዲዴ ፄሎ ዲራው፥ ጊብፄ ጋዲያ ሻሉዋ ኡባፔ ኪሪስቶሳ ዲራው ቦሬቲያዌ ዳሮ ኣꬊያ ዱሬቴꬃ ጊዴዳዋ ቆፔዳ።

²⁷ካቲያ ሃንቆ ሙሴ ያዬናን፥ ጊብፄ ጋዲያፔ ኬሴዳዌ ኣማኑዋና፤ ኣዪሲ ጎፔ፥ ቤቴና ፆሳ ቤዔዳዋዳን፥ ጌንጪዴ ሲንꬃው ቤዳ።

²⁸ሃይቁዋ ኪታንቻይ ኢስራዔሊያ ኣሳው ባይራ ናና ቦቼናዳን፥ ሙሴ ፓሲጋ ቦንቼዳዌኔ ጉባኒያን ሱꬃ ጫጫፊሴዳዌ ኣማኑዋና።

²⁹ኢስራዔሊያ ኣሳይ ሜላ ቢታን ሃሜቲያዋዳን፥ ዞዖ ኣባ ፒኔዳዌ ኣማኑዋና፤ ሺን ጊብፄ ኣሳቱ ፓጬው ጌሊሺን፥ ሃꬃይ ኡንቱንታ ሚቲ ኣጌዳ።

³⁰ኢስራዔሊያ ኣሳይ ኢያርኮ ጊያ ካታማ ሹቻ ዲርሳ ላፑ ጋላሳ ዩዪ ዩዪ ኣꬎዋፔ ጉዪያን፥ ሄ ሹቻ ዲርሳይ ኩንዴዳዌ ኣማኑዋና።

³¹ጫራታ ራዓባ ዬዉዋ ቆሪያዋንታ ሎይꬃ ሞኬዳ ዲራው፥ ፆሳው ኣዛዜቴናን ኢፄዳ ኣሳና ሃይቄናን ኣቴዳዌ ኣማኑዋና።

³²ሲሚ ሃራባ ጉጃዴ ኣያ ኦዶ? ጌዶናባ፥ ባራቃባ፥ ሳሚሶናባ፥ ዮፍታሄባ፥ ዳዊቴባኔ ሳሜላባ፥ ቃሲ ናባቱዋባ ኦዳናው ታው ዎዲ ጊዴና።

³³ኡንቱንቱ ካቲያ ኡባና ኦሌቲዴ ፆኔዳዌኔ ፂሎባ ኦꬄዳዌ ኣማኑዋና፤ ያቲዴ ፆሳይ ኢማና ጌዳዋ ኣኬዲኖ፤ ጋሞቱዋ ዶናካ ጎርዴዲኖ።

³⁴ዎልቃማ ታማ ቶዪሴዲኖ፤ ኩሳ ማሻፔ ኣቴዲኖ፤ ኡንቱንቱ ዳቡራንቻ፤ ሺን ሚኔዲኖ፤ ቃሲ ኦላን ሚኒዴ፥ ሃራ ጋዲያ ኦላ ኣሳ ዬዴርሴዲኖ።

³⁵ማጫዋንቱ ባሬንቱ ሃይቄዳዋንታ ሃይቁዋፔ ዴንዲና ኣኬዲኖ። ቃሲ ሃራንቱ ቃሹዋፔ ቢሌታናዋ ኢፂዴ፥ ኬኪያ ዴዖ ሃይቁዋፔ ዴንዳናው፥ ኡጋቲዴ ሃይቄዲኖ።

³⁶ሃራቱዋ ቦላ ኣሳይ ቂሊጪ ካዔዳ፤ ሊሱዋን ሾጬቴዲኖኔ ሳንꬃላታን ቃሼቲዴ፥ ቃሾ ጎሊያ ጌሌዲኖ።

³⁷ሹቻን ጫዴቴዲኖ፤ ማጋዚያን ላዑ ኬሲዴ ጳልቄቴዲኖ፤ ፓጬቴዲኖ፤ ማሻን ሃይቄዲኖ፤ ኡንቱንቶ ኡባባይካ ꬋዪና፥ ዋዬቲዴ ቱጋቲዴ፥ ዶርሳ ጫላኔ ዴሻ ጫላ ማዪዴ ዩዬዲኖ።

³⁸ኡንቱንቱሲ ሃ ኣላሚ ጊጌናን ኢፂና፥ ዎራን፥ ዴሪያን፥ ጎንጎሉዋ ጊዶኒኔ ኦላ ጊዱዋን ዩዬዲኖ።

³⁹ፆሳይ ኡንቱንቱ ኣማኑዋ ማርካቶፔካ፥ ሄዋንቱ ኡባቱ ኢ፥ ኢማና ጌዳዋ ኣኪቤይኪኖ።

⁴⁰ፆሳይ ኑሲ ኢቲ ሎዖ ቆፋ ቆፒ ዎꬄዳ ዲራው፥ ኡንቱንቱ ኑኒ ባይናን ባላይ ባይናዋንታ ጊዲኪኖ።