ኢብራዌ 9

1

2

3

4

5

6

7

8

9

10

11

12

13

¹ኮይሮ ጫቆ ፆሳው ጎዪኒያ ዎጋይኔ ኣሳይ ኦꬄዳ ጌሻ ጎሊ ዴዔ።

²ኣዪሲ ጎፔ፥ ኮይሮ ዱንካኒ ኤቄዳ፤ ኣ ጊዱዋን ሙቃዳ ዎꬂያዌ፥ ፃራጴዛይኔ ጎዳ ሲንꬃን ዎꬂያ ኡኪꬃይ ዴዔ፤ ሄ ሳዓይ ጌሻሳ ጊዴ ፄሴቴ።

³ላዔንꬆ ጋሪዱዋ ጉዬ ባጋና ኡባፔ ኣꬊያ ጌሻ ሳዓ ጌቴቲያ ዱንካኒ ዴዔ።

⁴ኣ ጊዱዋን ኢፃና ጩዋያናው ዎርቃፔ ኦꬄዳ ሳፂኒኔ ኡባሳና ዎርቃን ሼሼዳ ቃላ ጫቁዋ ታቦታይ ዴዔ። ሄ ቃላ ጫቁዋ ታቦታን ማናይ ዴዒያ ዎርቃ ፃሩ፥ ኣሮና ፃምዓይ ኣጬዳዌኔ ቃሲ ሙሴ ሂጊ ፃፌቴዳ ላዑ ማሴቴዳ ሹቻቱ ዴዒኖ።

⁵ሄ ቃላ ጫቁዋ ታቦታፔ ቦላ ባጋና ኣቶ ጊያ ሳዓ ቁምዒያ ባሬንቱ ቄፊያን ጌንꬂያ ቦንቾ ኪሩቤቱ ዴዒኖ፤ ሺን ሃ ኡባባ ሃዒ ዉርሲ ኦዳናው ዳንዳዮኮ።

⁶ሄዌ ሄዋዳን ጊጊ ዴዒሺን፥ ቄሳቱ ኡባ ዎዴ፥ ባሬንቱ ኦሱዋ ኦꬃናው ኮይሮ ዱንካኒያ ጌሊኖ።

⁷ሺን ቄሳቱዋ ኡባቱዋ ካፑዋ ፃላላይ ላዔንꬆ ዱንካኒያ ላይꬃፔ ኢቲ ጌዴ ጌሊዴ ባሬ ዲራዉኔ ኤሬናን ኣሳይ ኦꬄዳ ናጋራ ዲራው፥ ፆሳው ያርሺያ ሱꬃ ኣኪዴ ጌሌ።

⁸ኮይሮ ዱንካኒ ኤቂ ዴዒሺን፥ ኡባፔ ኣꬊያ ጌሻ ሳዓ ኣፊያ ኦጊ ቢሮ ዶዬቲቤናዋ ጌሻ ኣያናይ ሄዋን ኤሪሴ።

⁹ሄ ዱንካኒ ሃ ዎዴው ሌሚሱዋ፤ ሄዋ ጊያዌ ፆሳው ኢሚያ ኢሙኔ ያርሹ ጎዪኒያዋ ሱሬ ዎዛና ባላይ ባይናዋ ኦꬃናው ዳንዳዪኪኖ።

¹⁰ሄዋንቱ ሙሳባ፥ ኡሻባኔ ዱማ ዱማ ሜቻባ ኦዲያ ካሬ ባጋ ዎጋቱዋ፤ ኡንቱንቱ ኦራፂያ ዎዲ ጋካናው ኦሴቲያ ዎጋቱዋ።

¹¹ሺን ኪሪስቶሲ ሃዋን ዴዒያ ሎዖባው ቄሳቱዋ ኡባቱዋ ካፑዋ ጊዲዴ ዪዲጌዳ። ኢ ጌሊዴ ኦꬂያ ዱንካኒ ኡባፔ ኣꬊያዋኔ ባላይ ባይናዋ፤ ቃሲ ሄ ዱንካኒያ ኣሳይ ኦꬂቤና፤ ሃ ሜꬌቴዳ ሳዓባካ ጊዴና።

¹²ኪሪስቶሲ ኡባፔ ኣꬊያ ጌሻ ሳዓ ጌሊያ ዎዴ፥ ዴሻ ሱꬃኔ ጋሎ ማራ ሱꬃ ኦይቂዴ ጌሊቤና፤ ሺን ባሬ ሱꬃ ኦይቂዴ፥ ኑሲ ሜꬊና ኣቶቴꬃ ኢሚዴ፥ ላዔꬄናን ኢቲ ጌዴ ጌሌዳ።

¹³ቱኔዳ ኣሳ ቦላ ኮሩማ ሱꬃኔ ዴሻ ሱꬃ ጫጫፊዴ፥ ጉዴቴዳ ኡሳቲ ቢዲንꬃ ቆሊና፥ ሄ ኡራ ቱናቴꬃፔ ጌሻናው ዳንዳዮፔ፥

¹⁴ሜꬊና ጌሻ ኣያና ባጋና ባላይ ባይና ያርሹዋዳን፥ ፆሳው ባሬና ኢሜዳ ኪሪስቶሳ ሱꬃይ፥ ኑኒ ዴዑዋ ፆሳው ኦꬃና ማላ፥ ካሴ ኑ ሃይቄዳ ኦሱዋፔ ኑ ሱሬ ዎዛና ዎቲ ጌሻንዴሻ!

¹⁵ሄዋ ዲራው፥ ፆሳይ ፄሴዳዋንቱ ኢ ኢማና ጌዳ ሜꬊና ኣንጁዋ ላታና ማላ፥ ኪሪስቶሲ ኦራꬃ ጫቆ ጋናቴዳ፤ ሄዌ ሃናና ዳንዳዪያዌ፥ ኣሳይ ኮይሮ ጫቁዋፔ ጋርሳን ዴዒዴ ኦꬄዳ ባላ ኣይሌቴꬃፔ ኬሲያ ሃይቁ ዴዒያ ዲራሳ።

¹⁶ኣዪሲ ጎፔ፥ ሃይቂያ ኡራይ ዎይቴዳዌ ዴዖፔ፥ ሄ ኡራይ ሃይቆዌ ኤሬታናው ኮሼ።

¹⁷ኣዪሲ ጎፔ፥ ዎይቴዳ ኡራይ ሃይቄዳ ዎዴ፥ ኢ ዎይቴዳዌ ፖሌቴዳ፤ ሄ ዎይቴዳዌ ፓፃ ዴዒሺን፥ ኣይኔ ፖሌቴና።

¹⁸ሃራይ ኣቶ፥ ኮይሮ ጫቁካ ሱꬃይ ባይናን ኢንጄቲቤናዌ ሃዋሳ።

¹⁹ኣዪሲ ጎፔ፥ ሂጊያን ዴዒያ ኣዛዙዋ ኡባ ሙሴ ኣሳ ኡባው ኦዴዳ፤ ሄዋፔ ጉዪያን፥ ጋሎ ማራ ሱꬃኔ ዴሻ ሱꬃ፥ ሃꬃና፥ ዞዖ ዶርሳ ኢሲኪያናኔ ሂሶጲያ ጊያ ሚꬃ ቦንጪያና ኢቲፔ ኣኪዴ፥ «ሃዌ ሂንቴንታ ፆሳይ ኣዛዜዳ ጫቁዋ ሱꬃ» ያጊዴ፥ ሂጊያ ማፃፋ ቦላኔ ኣሳ ኡባ ቦላ ጫጫፌዳ።

²¹ሄዋዳንካ፥ ዱንካኒያ ቦላኔ ኦꬂያ ሚሻ ኡባ ቦላ ሱꬃ ሙሴ ጫጫፌዳ።

²²ሂጊ ጊያዋዳን፥ ቱሙካ ኣማሬዳዋፔ ኣቲን፥ ኡባባይካ ሱꬃን ጌዬ፤ ሱꬃይ ጉካና ꬋዮፔ፥ ኣቶቴꬃይ ባዋ።

²³ሄዋ ዲራው፥ ሳሉዋን ዴዒያዋንታ ማላቲያዋንቱ ሄ ያርሹዋን ጌያናው ኮሼ፤ ሺን ሳሉዋን ዴዒያዋንቱካ ባሬንቱ ሁጴው ጌያናው ኣꬊያ ያርሹዋ ኡንቱንታ ኮሼ።

²⁴ኣዪሲ ጎፔ፥ ኪሪስቶሲ ቱሙ ጌሻሳን ሌሚሴቲያ ኣሳይ ኦꬄዳ ጌሻሳ ጌሊቤና፤ ሺን ኢ ሃዒ ኑ ጊሻታው ፆሳ ሲንꬃን ቤታናው ያ ሳሉዋ ጌሌዳ።

²⁵ቄሳቱዋ ኡባቱዋ ካፑ ላይꬃን ላይꬃን ባሬ ሱꬃ ጊዴናዋ ኦይቂዴ፥ ጌሻ ሳዓ ጌሊያዋዳን፥ ኪሪስቶሲ ባሬና ኡባዴ ያርሻናው ጌሊቤና።

²⁶ሄዋ ጊዲንቶ፥ ኪሪስቶሲ ሳዓይ ሜꬌቶዴፔ ዶሚዴ ዳሮ ጌዴ ዋዬታናው ኮሼ፤ ሺን ሃዒ ዎዲያ ዉርሴꬃን ናጋራ ꬋዪሳናው ባሬና ያርሺዴ፥ ላዔꬄናን ኢቲ ጌዴ ቤቴዳ።

²⁷ኣሳይ ኡባይ ኢቲ ጌዴ ሃይቃናው ቤሴ፤ ሄዋፔ ጉዪያን ፆሳይ ኣሳ ፒርዳና።

²⁸ሄዋዳንካ፥ ቃሲ ኪሪስቶሲ ዳሮ ኣሳ ናጋራ ꬋዪሳናው ኢቲ ጌዴ ያርሼቴዳ፤ ቃሲ ኢ ባሬና ሎይꬂ ናጊያዋንታ ኣሻናው ቤታናፔ ኣቲን፥ ላዔንꬆ ናጋራ ቶካናው ቤቴና።