Hebreos 10

1

2

3

4

5

6

7

8

9

10

11

12

13

¹Kok xley Moisés sinak xmalë cos buen nii nare kiid. Koktyo sinakpee cos. Por ngo chilody kuuñ buen ley meñ nii xkokon cos lo Dios iz con iz.

²Deelñee nchilo ley nyuuñ bueno meñ, nyokontre kchë nii chokon. Por tsiñee lox nyak nyë xaa nii xkokon cos ko, nyodre xtol xaa.

³Per xaktyee parñee ksaladzy meñ xtol cad iz xkiiñ kchë nii chokon go,

⁴por chilody xcheñ yosy ni xcheñ chiv ktsily tol.

⁵Por ngo, worñee lëë Crist kwlañche lo kislyu, chëb xaa lo Dios: Chaklastyoo xcheñ ma ni chaklastyoo nii tsokon cos lool, sink lëël pxixkwaa xcuerpaa.

⁶Xyody styool nii chek ma kuty lool, ni chety ma par kpily tol.

⁷Tsigo chëpaa: “Lëën syely, Tat Tios, parñee kuuñtsyeyaa nii chakladzyoo. Leñ kitsy nii kë xtiitsoo kë nii singo kuuñtsyeyaa.”

⁸Klo xñee xaa nii xyody styoo Dios nii kety ma ni tsek ma par kpily tol, nikxe nii lëë ley xñabey kak kchë ngo.

⁹Loxsye ngo xñee xaa: “Lëën syely, Tat Tios, parñee kuñaa nii chakladzyoo.” Singo mod lëë Dios ptichee kchë nii chokon aan lëë xaa psaan nii tsokon Crist.

¹⁰Lëë Dios beeñ nyë lëë no porñee lëë Crist beeñtsyey nii chakladzy Dios worñee tu vueltak kwlookon xaa yuub xcuerp xaa.

¹¹Kchë pxosy Israel chool lay ksatyee tse ni xkokon xaa ma ndaly vuelt, nikxe nii xtsildy kchë ngo xtol meñ.

¹²Lëë Crist, yuub xaa kwyokon parñee ktsily xaa xtol meñ kaazhkaa, aan loxsye ngo lëë xaa kwsob kwi Dios nëzli.

¹³Siko sob mbës xaa axte nii kñabey xaa lo kchë xaa nii xlëë lo xaa.

¹⁴Por tu vueltak kwyokon xaa parñee kyak buen kchë meñ nii kwle Dios.

¹⁵Aan lëë Kyalbini Ntson xñee nii nli xtiits Dios tsiñee chëb xaa:

¹⁶Sinrii kak tiits nii ksanaa lo meñ Israel tsiñee lëë tse go tsitsiñ: Leñ styoo meñ kon xtitsaa, ni leñ kik meñ jkëno.

¹⁷Ni tsitsiñtre tse nii ksaladzyaa xtol meñ ni xkyalntseeb meñ.

¹⁸Singo tsigo busy, tsiñee xpily tol, xkiiñtre nii tsokon pe stu cos par kpilyo.

¹⁹Por ngo, beetsy, schilo syëëb no lo pkoog ntson nder confians por cheñ nii pxee Jesucrist.

²⁰No nii syeeñ no nëz kub nii pxaly xaa worñee pchos xaa ladx nii kë leñ ktoo. Misme lëë xaa nak nëz ko.

²¹Lëë Jesús nak xipxosy no. Lëë xaa xñabey lidzy Dios kpaa.

²²Por ngo no nii tyub styoo no kpig no lo Dios ni tyub styoo no kniladzy no, por lëë xaa beeñ nyë styoo no parñee tsodre xtol no, ni lëë xcueerp kaa no kwyadx lo nis nyë.

²³Ksaandy no nii xniladzy no, ni jkandy no kik no, por lëë Dios kuñ cumplir tiits nii psaan xaa lo no.

²⁴No nii kuuñ lsa no lëë no yudar parñee tso kyalwkëstyoo leñ styoo no ni kuuñ no kyalbuen.

²⁵Kuuñtsyeeydy no si chuuñtsyey xaa nii xkaal lsady tsiñee xkaal lsa no, sink kol tsoo kchoobladzy lsa no styoo xcombañer no, por lëë tse nii kuñ Dios kyalxtisy mer tsitsiñ.

²⁶Per deelñee tsiinpee kuuñ no tol, aan xyuumbey no tiitsli, kintre pe cos tsokon par kpily xtol no.

²⁷Xaktyee kyalxtisy ni ki nii ksaay xaa nii xlëë lo Dios xyaan.

²⁸Tsiñee xsaldy tu xaa xley Moisés, aan no chop o tson testigw nii xñee nliw, kintre pere, lëë xaa go chety.

²⁹¿Pe toodyxe tsigo ntseeb castigw nii tedy xaa nii xsyubniy Xiñ Dios ni xpixladzy cheñ nii pxee xaa, ni xko falt lo xKyalbini Dios nii xkëstyoo meñ? Lëë cheñ go xluuy nii lëë xtiits Dios kok cumplir ni lëëw chuuñ nyë meñ.

³⁰Ndon no nii lëë Dios chëb: “Naa xyal ksaksi, ni naa kizh.” Ni lëë gak xaa chëb: “Naa kuñ xkyalxtisy meñ tu kyedzyaa.”

³¹¡Tirak ntseeb kyab ñe ña Tat Tios nii mbañ!

³²Per kol ksaladzy tiemp worñee kal byaabini lo do. Pxekw to kchë kyalnë nii kwteedy to.

³³No lo do kwëntseeb meñ, ni no do kwtiñ meñ leñ kyedzy, ni no gaa to kwtee xkyalnë xaa nii mban kwtedy.

³⁴Pkëstyoo do xaa nii kwyo skiib, ni axte ble do worñee bla meñ nii chap to porñee nan do nii mastre mbëë nii jkaa do leñ kpaa, ni tsitsiñdy tse nii nitylow.

³⁵Ksaandy to xkyalwniladzy to, porque por lëëw lëë do jkaa tu kyalnsaak.

³⁶No nii nguiedzy kak to lo kyalnë parñee kuuñtsyey do nii chakladzy Dios tsiin jkaa do nii kneetsy xaa.

³⁷Por leñ xkitsy xaa xñee: Klyëëdre lëë xaa nii no kiid kiid. Klyëëdre xaa.

³⁸Por kyalwniladzy lëë xaa nii buen kpañ, per deelñee kpikche styoo xaa, kledyaa lo xaa.

³⁹Per nakty no xaa nii xpikche styoo ni xkyëtañ, sink xaa nii xniladzy xtiits Dios ni xaa nii xteelaa xkyalmbañ nak no.