ኢብራዌ 7

1

2

3

4

5

6

7

8

9

10

11

12

13

¹ሃ ማልኪ-ፄዴቂ፥ ሳሌማ ካቲ፥ ኡባፔ ቦላ ፆሳ ቄሳይ፥ ኣብራሃሞ ካቴቱዋ ዎꬊዴ ኦላፔ ሲሚሺን፥ ኣናና ጋኬቲዴ፥ ኣ ኣንጄዳ።

²ኣብራሃሞ ባሬ ኦሞዴዳ ኡባፔ ኣሲራታ ኬሲዴ፥ ኣው ኢሜዳ፤ ማልኪ-ፄዴቃ ሱንꬃው ኮይሮ ቢሌꬃይ ፂሎቴꬃ ካቲያ ጊያዋ፤ ቃሲ ሳሌማ ካቲያ ኢ ጊዲያ ዲራው፥ ላዔꬆ ቢሌꬃይ ሳሮቴꬃ ካቲያ ጊያዋ።

³ማልኪ-ፄዴቃው ዳያ ዎይ ኣዉ፥ ዎይ ኣው ዛሪያ ፓይዱ ባዋ፤ ቃሲ ኣ ዬሌታው ዶሜꬃይ ዎይ ኣ ሃይቆ ዉርሴꬃይ ባዋ፤ ሺን ፆሳ ናዓ ማላቲዴ፥ ሜꬊናው ቄሳ ጊዴዳ።

⁴ኑ ኣዎቱዋ ካፑ ኣብራሃሞ ኦላን ኦሞዲዴ፥ ኣሄዳዋፔ ኣሲራታ ኢሜዳ ማልኪ-ፄዴቂ ኣይ ኬና ꬎቁ ጊያዌንቶ ቤዒቴ።

⁵ቄሳ ጊዲያ ሌዊያ ዛራቱ ኢስራዔሊያ ኣሳፔ፥ ሄዌኔ ባሬንቱ ጋዴ ኣሳፔ ሃራይ ኣቶ ኡንቱንቱ ኣብራሃሞ ዛሬ ጊዶፔኔ፥ ኣሲራታ ኣካና ማላ፥ ሂጊያን ኣዛዜቴዲኖ።

⁶ማልኪ-ፄዴቂ ሌዊያ ዛሬ ጊዴና፤ ሺን ኣብራሃሞፔ ኣሲራታ ኣኪዴ፥ ፆሳይ ኢማና ጌዳዋ ናጊያ ኣብራሃማ ኣንጄዳ።

⁷ቃሲ ኣንጂያዌ ኣንጄቲያዋፔ ꬎቁ ጊያዌ ፓሉንꬄና።

⁸ኢቲ ባጋና፥ ሃይቂያ ኣሳይ ኣሲራታ ኬሴ፤ ሺን ሃራ ባጋና ቃሲ፥ ሃይቄና ጊዴ ማርካቲያ ኡራይ ኣሲራታ ኬሴ።

⁹ሃዋዳን ሃሳያናው ሃራይ ኣቶ፥ ኣሲራታ ኬሲያ ሌዊካ ኣብራሃሞ ባጋና ኣሲራታ ኢሜዳ።

¹⁰ኣዪሲ ጎፔ፥ ማልኪ-ፄዴቂ ኣብራሃሞና ጋኬቲያ ዎዴ፥ ሌዊ ቢሮ ዬሌቲቤና፤ ሺን ባሬ ዛሪያ ኣብራሃማ ጉልባታን ዴዔ።

¹¹ኢስራዔሊያ ኣሳው ሂጊ ሌዊያ ዜሬꬃቱዋ ቄሴቴꬃ ባጋና ኢሜቴዳ። ሄ ቄሴቴꬃ ኪታይ ባላይ ባይናዋ ጊዶፔ፥ ኣሮናዋ ማላ ጊዴናን ማልኪ-ፄዴቃ ማላ ሃራ ቄሳይ ሱንꬄታናው ኣዪሲ ኮሺ?

¹²ኣዪሲ ጎፔ፥ ቄሴቴꬃይ ላሜቲያ ዎዴ፥ ሂጊካ ቃሲ ላሜታናው ኮሼ።

¹³ሃ ዬዉ ሃሳዬቴዳ ኡራይ ሃራ ዛሪ፤ ኣ ዛሪያፔ ኦኒኔ ያርሺያሳን ቄሳዳን ኦꬂቤና።

¹⁴ኑ ጎዳይ ዪሁዳ ዛሪያፔ ዬዳዌ ኤሬቴዳዋ ጊዲያ ዲራው፥ ሙሴ ቄሳቱዋባ ሃሳዪዴ፥ ሄ ዛሪያባ ኣይኔ ሃሳዪቤና።

¹⁵ማልኪ-ፄዴቃ ማላ ሃራ ቄሳይ ዬዳዋ ጊዲንቶ፥ ሃዌ ኣꬊዴ ኤሬታናዋ።

¹⁶ኢ ኣሳ ሂጊያኒኔ ዎጋን ቄሳ ጊዲቤና፤ ሺን ዉሬና ዴዑዋ ዎልቃን ቄሳ ጊዴዳ።

¹⁷ኣዪሲ ጎፔ፥ ፆሳ ማፃፋይ፥ «ማልኪ-ፄዴቂ ቄሳ ጊዴዳዋዳን፥ ኔኒካ ሜꬊናው ቄሳ ጊዳናዋ» ያጊዴ ማርካቴ።

¹⁸ቤኒ ዴዒያ ሂጊ ላፋኔ ማዴናዋ ጊዲያ ዲራው ኣቴዳ።

¹⁹ኣዪሲ ጎፔ፥ ሙሴ ሂጊ ኣያኔ ባላይ ባይናዋ ኦꬃናው ዳንዳዬና፤ ቃሲ ኑኒ ኣ ባጋና ፆሳኮ ሺቃና ጊዴ ናሼቻን ናጊ ኡቴዳ ኡባፔ ኣꬊያዌ ዬዳ።

²⁰ሄዋ ቦላን ቃሲ ፆሳ ጫቁካ ዴዔ፤ ሃራቱ ቄሳ ጊዴዳ ዎዴ፥ ሄዋ ማላ ጫቁ ባዋ።

²¹ሺን ዬሱሲ ጫቁዋን ቄሳ ጊዴዳ፤ ፆሳይ ኣ፥ «ጎዳይ ጫቄዳ፤ ኢ ባሬ ቆፋ ላሜና። ‹ኔኒ ሜꬊናው ቄሳ ጊዳና› ጌዳ» ያጌዳ።

²²ሄዋ ዲራው፥ ዬሱሲ ኡባፔ ኣꬊያ ጫቆ ዋሴ ጊዴዳ።

²³ካሴ ቄሳቱዋ ፓይዱ ጮራ፤ ኣዪሲ ጎፔ፥ ኡንቱንቱ ኦꬃና ኦሱዋ ሃይቁ ዲጌዳ።

²⁴ሺን ዬሱሲ ሜꬊናው ዴዒያ ዲራው፥ ኣ ቄሴቴꬃይ ላሜቴና።

²⁵ሄዋ ዲራው፥ ኢ ኡንቱንቱ ጊሻታው ጋናታናው ሜꬊናው ዴዒያ ዲራው፥ ፆሳኮ ባሬ ባጋና ዪያዋንታ ኡባቱዋ ኣሻናው ዳንዳዬ።

²⁶ኑሲ ጊጊያ ሃዋ ማላ፥ ቄሳቱዋ ኡባቱዋ ካፑ ዴዓናው ኮሼ፤ ኢ ጌሻ፤ ኣኒ ጌኒኔ ካꬌꬂያባይ ባዋ፤ ናጋራንቻቱዋና ኢ ጋኬቴና፤ ቃሲ ꬎቃ ሳሉዋንካ ኢ ቦንቼቴዳ።

²⁷ሃራ ቄሳቱዋ ኡባቱዋ ካፓቱዋዳን፥ ኢ ኮይሮ ባሬ ሁጴ ናጋራሲ ያርሺዴ፥ ቃሲ ጉዬፔ ኣሳ ናጋራሲ ሃቼ ሃቼ ያርሻናው ኮሼና፤ ኢ ባሬና ያርሼዳ ዎዴ፥ ላዔንꬄናን ኢቲ ጌዴ ያርሼዳ።

²⁸ኣዪሲ ጎፔ፥ ሙሴ ሂጊ ዳቡራንቻ ኣሳ ቄሳቱዋ ኡባቱዋ ካፑዋ ኡዲዴ ሱንꬄ፤ ሺን ፆሳይ ኢማና ጊዴ ጫቄዳ ሂጊያፔ ጉዬ ዬዳ ቃላይ ሜꬊናው ባላይ ባይናዋ፥ ፆሳ ናዓ ሱንꬄ።