Dakani jaura Hebräer milini 10

1

2

3

4

5

6

7

8

9

10

11

12

13

¹Ngangau jirijiribani jaurali tanani potuja pungala ngamalkai, tana wokarananto, ja wata malka mudla morlalu munta nganai, jeruja nauja ngandandariai tanalipini poto ngumujeli, tanana kanali kilpawoldra kulno kulpawoldra kulno kulno jinkiai, tana wokarani ngandandariai ngurali mudala;

²Jenia kantji kara, tanali wata mudananto poto ngumu jinkila, ngangau tanali, tana poto ngumu ngankijiribai, pota kulno matja kulirkana, burka madlentji pani ngamalkanani?

³A-ai, tanali madlentji ngundrai kilpawoldra kulnuni kilpawoldra kulnuni.

⁴Ngangau nganti kaluntaia ja naninani ngaperaia kumari ngandandariai madlentji kalingala.

⁵Jendrangundruja Nauja jatai, Nauja mitani wokaranani: “Poto ngumu ja jinkini poto jundru wata ngantjana warai, palku kulno jundru ngakangu ngankingana warai.

⁶Jerkini poto ngumuni ja madlentjandru poto ngumuni jundru wata murlali nganana warai.

⁷Jendranguta ngani jatana wonti: Mai, ngani wokarai, dakani jaurani parai ngakangundru, jinkani jertapaterina, Godajai, ngankala.”

⁸Ngopera Nauja jatana warai: “Poto ngumu ja jinkini poto ngumu ja madlentjandru poto ngumu jidni wata jertapaterina warai, ja tanangu wata murlali nganana warai” (worderu tanali tanana jirijiribani jaurandru matja jinkiai),

⁹Ja karari Nauja jatai: “Mai, ngani wokarai, jertapa terina jinkani, Godajai, ngankala.” Jeruja Nulia ngoperala worarai, ja mandrula terkibana tarai;

¹⁰Nunkanipini jertapaterinani ngaiana kulikiri pantjina wonti Jesuni Christuni palku jinkiterinali pota kulno pota warupotuja,

¹¹Ja Priesta pratjana ditji kulno ditji kulno ngamalkijiribala terkai pota marapu jenilu poto ngumu jinkila, tana ngurali ngandandariai madlentji teribala.

¹²Nulupini windri poto ngumu kulno madlentjandru jinkina wonti, ja ngadani ngurali Godaia ngunarani ngamana ngarina wonti;

¹³Ja milingeru kalkai, nunkani talpala nunkangu tidnani tidnaparani piri jeribaka parai.

¹⁴Ngangau poto ngumu kulnujeli Nulia ngurali talku pirna ngankana wonti, tana kulikiri pantjila nganai.

¹⁵Jeruja Jaola kulikirieli ngaianangu bakana jenia morlalu kurai; Nauja matja ngopera jatana warai:

¹⁶Naupini Testamenta nganai, ninaia ngato tanangu kurala nganai, tanangupini ditjini ngadani, Kapara jatai: Ngato jirijiribani jaura ngakani tanangu ngarani jinkila nganai, ja bakana tanani tjuruni dakala nganai,

¹⁷Ja tanani madlentji ja tjikatjika ngato wata morla ngundrala nganai.

¹⁸Woderi tanani kalingani nganai, naka bakana wata morla poto ngumu madlentjandru,

¹⁹Ngangau ngaiana, ngatata worajai, mankini ngamalkai kulikiri pirnani wirila Jesuni kumarali,

²⁰Ninaia Nulia ngaianangu ngankingana wonti, palto marra ja jepi, kati pirnani palkingala, jenia nganai, palkujeli nunkanali,

²¹Ja Priesta pirna Godaia pungani;

²²Jeruja ngaiana karakararinanto ngara morlalujeli, ja morlalu ngundranaia morlalu ngundranali, ngaraia turibanali burka madlentji panini, ja palkuni matja kulirkana ngapa kulikirieli,

²³Ja ngaiana kalkanaia dikani jaura wonki ngamalkananto wata duljuni, ngangau Nauja talku nganai, Nulia talpadakani jaura jinkina wonti.

²⁴Ja ngaiana bakana najinajibijiribamalinanto ja nurungiribamalinanto ngantjanaia ja ngankana ngumuja,

²⁵Ja ngaiana wata jurborini ngaianani worarananto, palpali jeribaka, a-ai, kurukurubijiribamalinanto, ja jenia morla, ngangau jura ditji karakararinani najiai.

²⁶Ngangau ngaiana jertapaterinali madlentji nganka-nani, ngaiana morlaluja ngujamana matja manina, jeruja wata morla poto ngumu madlentjaia parai,

²⁷A-ai, kalala pirna ja turuja turn ngajingajingana japa pirnali kalkana, nulu tatanietja julkala nganai.

²⁸Kulnujeli Mosini jirijiribani jaura wokaribanani, nau kalumiltjamiltjarina panini palinanto, tinkari ngankanietja mandruni kara parkulani kara.

²⁹Mina kalala morla pirna, jura ngundrai, nulu manila nganai, nulu Godaia Ngatamura tidnali nankai, ja Testamentaia kumari bakujeli ngundrai, nunkanali nau kulikiri pantjina wonti, ja nulu manjulaia Jaola ngirkibanani?

³⁰Ngangau ngaiana ninaia ngujamai, Nauja jatai: “Kalala ngakani poto nganai, ngato kalala jinkila nganai, Kapara jatai.” Ja nakaldra: “Kaparali nunkani kana wolarani kalala jinkila nganai.”

³¹Jenia japa pirna nganai tepia Goda marani purila.

³²Ditji ngoperalani ngundranau, tanangu jura, jura matja tjenmamarina, ketjaketjanaia tirimalinani tataurarina wonti,

³³Buru kulnuni, jura ngirkibanali ja jeninali wondrani malka pantjina wonti; buru kulnuni, jura tanani ngampumara pantjina wonti, tana bakana jeruja ketjaketjana wonti.

³⁴Jura dupudupulani jela ketjaketjana wonti, ja jurani potuja watawatali manini jura mankinali patana wonti, ngangau jura ngujamai, jura poto morla ngumu ja wonki ngamalkai pariwilpani.

³⁵Jurani morlalu ngundrani wata woraranau, ngangau nulu kalala pirna ngamalkai.

³⁶Jura wonki ngamananto, ngangau jura Godaia jertapaterinaia ngankanali talpadakani padakananto.

³⁷Windri wordu, wordu waka morla, ngadani wokarai, Nauja wokarananto, ja wata banbala nganai.

³⁸Kana talku morlalu ngundranandru tepi ngamala nganai; nau ngadatikanani, mungara ngakani wata murlali nganala nganai nunkangu.

³⁹Ngaiana wata tana jeri, tana ngadatikai tintaterinaia, a-ai, tanangu jeri, tanali morlalu ngundrai mungara kulkanaia.