Ebraio 10

1

2

3

4

5

6

7

8

9

10

11

12

13

¹Tago ra tinata na varkurai i kap ika ra malur i ra lavur bo na magit ba na ga vana rikai, ma vakir a dovot na malalar i ra lavur magit, ma pa na vatakodo vakakit diat dia tadav ia ma nam ra lavur varporong dia ga tul tar diat vatikai ta ra kilakilala.

²Gala dia ga pait valar pa ia, gala pa da tul tar mule diat, tago ra umana tena lotu, ba di tar vakopono vagomgom diat, a nuknuk i diat pa na takun mule diat ma ra varpiam.

³Ta nam ra lavur varporong di nuk pa mule ra varpiam ta ra kilakilala.

⁴Tago pa i topa ra gapu i ra bulumakau ma ra me upi na tak vue ra varpiam.

⁵Kari ba i vana uti ta go ra rakarakan a gunagunan, i biti dari: “A varporong ma ra vartabar pa u ga mainge, Ma u tar vaninare ta pakagu;

⁶A vartabar di tun ia ma ra varporong ure ra varpiam, u, pa u ga gugu tana;

⁷Ma iau ga biti: Gire, iau tar pot (di tar tutumu ure iau ta ra pinipin na buk) Upi ina pait ot pa kaum mamainga, God.”

⁸Da i ga tatike lua: A varporong ma ra vartabar, ma ra vartabar di tun tar ia ma ra varporong ure ra varpiam pa u ga mainge, ma pa u gugu tana (nina di tul tar diat upi na da ra tinata na varkurai),

⁹ma i ga biti: Gire, iau tar pot upi ina pait ot pa kaum mamainga. I tak vue ra luaina, upi na vatur vadekdek ra vauruana.

¹⁰Ma di tar vagomgom dat ta go ra mamainga, ure ra paka i Iesu Kristo nina di ga vakopono tul tar ia.

¹¹Ma diat par ra umana tena tinabar dia tur ma dia papalum ra bungbung, ma dia tultul tar milate ra kopono varporong, nam i mama pun vue ra varpiam.

¹²Ma nina, ba i tar tul tar ra kopono varporong upi na tur tukum ure ra varpiam, i ga ki ta ra lime tuna God;

¹³ma papa ta nam ra bung i ungung pa ia ba da vung kana lavur ebar upi a ruarua na kauna.

¹⁴Tago ta ra kopono vartabar i tar mal ot vatukum pa diat, dia tar vagomgom vakakit diat.

¹⁵Ma ra Takodo na Tulungen bula i ve vadovot dat, tago i tar biti lua:

¹⁶“Go ra kunubu iau ma diat, avet a pait ia, Ba i tar par nam ra lavur bung, ra Luluai i biti: Ina poe kaugu vartuluai ta ra bala i diat, Ma ina tumu tar diat ta ra nuknuk i diat”; ma go bula namur:

¹⁷“Ma kadia varpiam ma kadia mangamangana milmilikuan ina nuk vue muka.”

¹⁸Ma ona di tar pun vue nam ra lavur magit, pa ta varporong mulai ure ra varpiam.

¹⁹Kari a tara na turagu, tago da rurung upi ra niruk ta ra pakana pal i tabu vurakit ure ra gapu i Iesu,

²⁰ta ra nga, a kalamana ma a launa, nina i tar mal ot pa ia ure dat, ta ra mal na rurua kutu, ia nam ra palapakana iat;

²¹ma tago kadat a tena tinabar ngala ure ra kuba i God;

²²dat a kakari maravai ma ra dovot na bala i dat ma ra ngala na nurnur, ba di tar pipikirai tar ta ra bala i dat ma i langalanga ta ra kaina varkurai na bala, ma ba di tar puk ra paka i dat ma ra barabara na tava;

²³ma dat a vatur vadekdek vake ra tinata na kini nunur ma koko ra nidadadar; tago nina i vatading tar ia i tar dovot;

²⁴upi dat a nuknuk vargiliane pa dat, upi dat a vangangap dat ta ra varmari ma ra bo na papalum;

²⁵ma koko dat a vung vue kada kivung da ra mangamangana kai ta umana, upi dat a varvargat vargil muka; ma dat a ongor tana, tago da gire i tia maravai ra bung.

²⁶Ma ona da ga tar vatur vake ra minatoto ta ra dovotina, ma dat a gugu upi ra varpiam, pa ta mulai ra varporong ure ra varpiam,

²⁷ia kaka ra kini na bunurut upi ra varkurai, ma ra karangap na iap, nina ba na vaimur vue ra umana ebar.

²⁸Nina i ga piam ra vartuluai kai Moses, i virua ta ra tinata kai ra urua ba a utul a tena vartakun, ma pa da mari ia.

²⁹Ava ra nuknuk i vavat? Pa na manga ngala vang ra balbali tadav nina i ruarua taun ra Natu i God ma ra kauna, ma i nuk ia ba ra gap ure ra vamading a magit vakuku, nina di ga tar vagomgom ia me, ma i vul vatagiliman ra Tulungea i ra varmari?

³⁰Tago da tar nunure nina i ga biti: “Kaugu ka ra varobo, iau kaka ina babali.” Ma dari bula: “Ra Luluai na kure ra taraina.”

³¹la ra magit na bunurut tuna ba da tul tar dat ta ra lima i ra launa God.

³²Ma avat a nuknuk pa ra umana bung lua, nina di ga tar vakapa avat i tana, ma i tup avat i tana ra ngala na vinarubu ma ra lavur kinadik;

³³tikai, tago di ga vaki tar avat upi a magit na ginigira ure ra lavur varvul ma ra varvakadik; ma ta ra tikai, tago ava ga bartalaina ma diat dia ga damana.

³⁴Ma ava ga mari diat, di ga vi diat, ma ava ga gugu ba di ga ra vue kavava tabarikik, tago ava ga nunure ba kavava ta enana tabarikik i manga boina ma na tur tukum.

³⁵Koko avat a vue kavava nurnur, tago na ngala tana ra vapuak.

³⁶I topa avat ra kini vovovon, upi, ba ona ava tar pait ra mamainga kai God, avat a vatur vake ra vamading.

³⁷“Tago a ik ika boko, Ma nina ba na vana rikai na pot muka, ma pa na vavuan.

³⁸Ma ra tena takodo na laun ta ra nurnur; Ma ona na talil mulai, a tulungeagu pa na mainge.”

³⁹Ma dat, pa da vardada ma diat, dia talil mulai ma di virua; da vardada ka ma diat, dia nurnur upi ra varvalaun ure ra tulungea i diat.