1Pues entonces uley e Moisés jax inteꞌ checsuyaj tuaꞌ lo que quetpa tuaꞌ uche e Cristo, y majax bꞌan taca numuy tunor era. Y tamar era motor que war achamesna inteꞌ arac tama inteꞌ inteꞌ año bꞌan cocha ucꞌani tuaꞌ achena tama uley e Moisés, pero ma tzꞌacar uchꞌichꞌer e aracꞌobꞌ era tuaꞌ ucorpes tin e war ani uyusre tuaꞌ axanobꞌ tama ubꞌir e Dios tama e tiempo yajaꞌ.
2Porque jay uchꞌichꞌer e sian aracꞌobꞌ era tzꞌacar nic ani tuaꞌ acorpesian, machix ixto ani war achamesna otronteꞌ arac tama inteꞌ inteꞌ año. Porque jay tzꞌacar nic ani e chꞌich era tuaꞌ aloqꞌuesna inyajrer tunor e mabꞌambꞌanir, machix ixto ani war unatobꞌ e gente tama uyalmobꞌ que ayanto lo que abꞌetuobꞌ tut e Dios umen que ayanto umabꞌambꞌanirobꞌ.
3Pero lo que war anumuy tama tunor e aracꞌobꞌ xeꞌ chamesnobꞌ era jax taca war acꞌampa tuaꞌ acꞌajpesna tama inteꞌ inteꞌ año que ayanto lo que abꞌetuobꞌto e gente era tut e Dios.
4Porque ma cocha erer ulocse e mabꞌambꞌanir uchꞌichꞌer incojt wacax o uchꞌichꞌer incojt chivo.
5Y tamar era conda e Cristo tari tara tor e rum ojron taca e Dios y che: Machix cꞌani awira uchamesnar e sian wacax, y tamar era ixiet awajqꞌuen nicuerpo bꞌan cocha inteꞌ winic tuaꞌ uyubꞌien insutpa inwajcꞌu nibꞌa tuaꞌ inchamesna tuaꞌ intoyi tunor e mabꞌambꞌanir tuaꞌ e gente.
6Y machi ixto war itzay awira que war apurutna e sian aracꞌobꞌ y nien que war achamesna e sian aracꞌobꞌ tuaꞌ aloqꞌuesna ani e mabꞌambꞌanir.
7Y tamar era cꞌani inwaret, Nidiosiret, que: “Nen tarien tuaꞌ inche bꞌan cocha net acꞌani, bꞌan cocha chꞌar tzꞌijbꞌabꞌir tamaren tama uyojroner e Dios”, che Cawinquirar Jesucristo.
8Pues bꞌajxan war che tunor era que Cadiosir machi atzay uwira y nien machi ixto war ucꞌani tuaꞌ apurutna tunor e sian aracꞌobꞌ era, y nien machi ixto war ucꞌani tuaꞌ achamesnobꞌ e sian aracꞌobꞌ tuaꞌ aloqꞌuesna ani e mabꞌambꞌanir, motor que bꞌan arobꞌnobꞌ e gente tama e onian tiempo tuaꞌ uchiobꞌ tama uley e Moisés.
9Y de allí ojron Cawinquirar Jesucristo y che: “Nen tarien tuaꞌ inche bꞌan cocha net acꞌani, Nidiosiret”, che Cawinquirar. Pues war che era que Cadiosir cꞌapa uchoqui tunor ucꞌampibꞌir uchꞌichꞌer e sian aracꞌobꞌ xeꞌ chamesnobꞌ tama e onian tiempo, y que era war uturbꞌa uchamer e Jesucristo tama ulugar tunor era tuaꞌ axin utoyi tunor e mabꞌambꞌanir coner.
10Y era umen que bꞌan ucꞌani Cadiosir ixin uchion caquetpa erach tacar uchamer e Jesucristo conda ixin uyajcꞌu ubꞌa tuaꞌ acꞌapa utoyi tunor e mabꞌambꞌanir inyajrer.
11Pues tunor tin e aquetpa inteꞌ sacerdote tama e Israel war uchamsiobꞌ cora aracꞌobꞌ ajqꞌuin ajqꞌuin, pero uchꞌichꞌer e aracꞌobꞌ era ma cocha erer ulocse e mabꞌambꞌanir tuaꞌ e gente.
12Pero e Jesucristo ixin uyajcꞌu ubꞌa tuaꞌ achamesna tuaꞌ acꞌapa utoyi tunor e mabꞌambꞌanir inyajrer, y tamar era machi ixto tuaꞌ asutpa achamesna otronyajr. Y conda cꞌapa uche tunor era ixin tut e qꞌuin tuaꞌ aturuan tama uturtar tama unojcꞌabꞌ Catata Dios tuaꞌ acꞌotori.
13Y yajaꞌ taca tuaꞌ aquetpa este que aturbꞌana yebꞌar utajn uyoc tunor tin e war aqꞌuijna uwirobꞌ ut e Jesús.
14Y jaxir cꞌapa ucorpeson tunoron xeꞌ warto ustana cawirnar axin umen taca que ixin uyajcꞌu ubꞌa inyajr taca tuaꞌ achamesna tamaron.
15Pues bꞌan ubꞌan uyareon Unawalir e Dios tama uyojroner e Dios tiaꞌ che que:
16Pues lo que cꞌani inche tama e pacto lo que cꞌani inche taca e gente tuaꞌ e Israel tama e tiempo xeꞌ watar jax era; che Cawinquirar Dios, Cꞌani inturbꞌa niley tama ujorobꞌ, y cꞌani intzꞌijbꞌa tunor era tama uyalmobꞌ ubꞌan, che Unawalir e Dios.
17Y ojron Unawalir e Dios otronyajr y che: Y machi ixto tuaꞌ incꞌajpes umabꞌambꞌanirobꞌ otronyajr, che Unawalir e Dios.
18Entonces conda quetpa satbꞌir tunor e mabꞌambꞌanir, machix ixto ucꞌani tuaꞌ achamesna más inteꞌ arac tuaꞌ asutpa aloqꞌuesna más e mabꞌambꞌanir, cocha ustabꞌirix inyajrer tunor era umen e Cristo.
19Pues entonces niwermanuox, cocha war cacꞌupseyan meyra tama uchꞌichꞌer e Jesús, non erer cochoy tama e lugar xeꞌ más erach tiaꞌ turu Catata Dios.
20Y jax Cawinquirar Jesucristo xeꞌ ixin upasi e bꞌir xeꞌ galan ticoit xeꞌ ma ani tucꞌa, y xeꞌ jax xeꞌ erer uyajcꞌon e cuxtar xeꞌ machi tuaꞌ acꞌapa. Y e bꞌir era oꞌchoy axin tama e lugar xeꞌ más erach lo que ayan tut e qꞌuin, y e bꞌir era jax lo que cꞌapa upasi Cawinquirar conda wejrtzꞌa e cortina lo que chꞌur tama e templo tama e chinam Jerusalem conda ixin chamay.
21Pues Cawinquirar Jesucristo jax e sacerdote xeꞌ más nojta y jaxir war acꞌotori tujor tunor umaxtac e Dios.
22Y cocha war cacꞌupseyan meyra tama uchꞌichꞌer e Cristo cocha era cꞌoticon tuyejtzꞌer Catata Dios taca cawalma xeꞌ incꞌun y taca inteꞌ cꞌupesiaj tama e Dios xeꞌ qꞌuecꞌo. Pues e Dios ixin utzijtzru cawalma taca uchꞌichꞌer e Cristo este que machix ixto war canata tama cawalma jay warto cabꞌeto taca e Dios, y jaxir ixin upoquion taca uchꞌichꞌer bꞌan cocha jay uyates ani tunor cacuerpo taca e jaꞌ xeꞌ charan ut.
23Y tamar era caqꞌuecꞌojsic cabꞌa tuaꞌ caxin cachꞌami tunor lo que war cacojco tuaꞌ cajcꞌuna umen e Dios, porque Cadiosir xeꞌ ixin uyareon que bꞌan tuaꞌ uche, cꞌani axin uyajcꞌon tunor era watar e día.
24Y casicbꞌanic cocha tuaꞌ cayajta utobꞌ e inmojr tuaꞌ asutpobꞌ uyajta ut más e inmojr ubꞌan, y casicbꞌanic cocha tuaꞌ abꞌoro lo que war cache xeꞌ imbꞌutz tut e inmojr tuaꞌ asutpa uchiobꞌ más lo que imbꞌutz tut e inmojr ubꞌan.
25Ira iwacta tuaꞌ ixcꞌotoy tama inteꞌ servicio conda war umorojse ubꞌobꞌ e inmojr, porque ayan tin e bꞌan war uchiobꞌ y machi cꞌani cache bꞌan cocha war uchiobꞌ jaxirobꞌ. Sino que cacꞌunlesic cabꞌa inteꞌ intion más y más coner cocha chequer que watarix e día conda cꞌani asutpa watar Cawinquirar Jesucristo otronyajr.
26Pues non xeꞌ war canata lo que ayan xeꞌ erach tama Cawinquirar Jesucristo, jay caxin cache e mabꞌambꞌanir umen taca que non war cacꞌani este que caxin cawacta inyajrer tunor lo que ayan tama Cawinquirar, entonces mix majchi más tuaꞌ ulocse camabꞌambꞌanir otronyajr, porque jax taca Cawinquirar Jesucristo xeꞌ ixin chamay tamaron tuaꞌ ulocse camabꞌambꞌanir.
27Entonces tut tin e ixin uchiobꞌ cocha era intaca aquetpa tuaꞌ ucojcobꞌ e nuxi jatzꞌuar lo que watar tuaꞌ e Dios conda jaxir axin aqꞌuijna inyajrer taca tunor tin e ixin qꞌuijnobꞌ uwirobꞌ ut e Dios este que axin uchoqui tunorobꞌ tama e cꞌajc inyajrer.
28Pues tama e onian tiempo tin e ixin uxejbꞌe ut uley e Moisés este que machi cꞌani acꞌupseyan tut, jay irna tunor era umen chateꞌ o uxteꞌ winicobꞌ, y jay jaxirobꞌ ixin utuchꞌiobꞌ, entonces inteꞌ era quetpa tuaꞌ achamesna bꞌan taca y mamajchi tuaꞌ uyajta ut tamar era.
29Pues bꞌijnunic cobꞌa más nuxi jatzꞌuar tuaꞌ uchꞌamiobꞌ tin e axin uqꞌuijnes Uyunen e Dios bꞌan cocha jay war ani utecru ut jaxir yebꞌar utajn uyoc, y xeꞌ axin uyare que matucꞌa ucꞌampibꞌir uchꞌichꞌer e Jesucristo lo que wechcꞌa umener tuaꞌ uyustes e pacto lo que uche tuaꞌ caquetpa erach tut e Dios coner. Y bꞌijnunic cobꞌa más nuxi jatzꞌuar tuaꞌ uchꞌamiobꞌ tin e axin uqꞌuijnes Unawalir e Dios xeꞌ war uchecsu ucꞌunersiaj e Dios tut tunor e gente tara tor e rum. Bꞌijnunic cobꞌa nuxi jatzꞌuar tuaꞌ uchꞌamiobꞌ tin e war uchiobꞌ cocha era.
30Pues canata que ojron e Dios y che tama uyojroner que: “Jax nen xeꞌ tuaꞌ insuti uyeror tunor tin e axin uche e mabꞌambꞌanir upater otronteꞌ”, che e Dios. Y chꞌar tzꞌijbꞌabꞌir otronyajr que jaxir ojron y che: “Y jax Cawinquirar Dios xeꞌ tuaꞌ uchꞌujcu uwira tucꞌa war cache inteꞌ intion, y tin e war uche lo que mabꞌambꞌan cꞌani ajajtzꞌa meyra umener.” Bꞌan che e Dios tama uyojroner.
31Meyra tuaꞌ unumse ubꞌa tin e axin uyacta ubꞌir e Dios conda axin ajajpna umener tin e ma tiaꞌ tuaꞌ achamay.
32Pues entonces nox xeꞌ war ibꞌijnu tuaꞌ ani iwacta ubꞌir e Cristo, ira inajpes tamar lo que cay inumse ibꞌa conda wartocto ixcano tama ujanchꞌaquenar e Cristo. Cꞌajpesic que motor que cay inumse ibꞌa nojta tama e tiempo yajaꞌ, pero iwacta numuy bꞌan taca. Y majax bꞌan ani iche jay war ani ibꞌijnu tuaꞌ iwacta ubꞌir e Cristo tama e tiempo yajaꞌ.
33Y nox ayan conda cay inumse ibꞌa umen que cay utzeniox e gente, y ayan conda cay uwatzꞌiox, y ayan conda quetpox tzajtaca iut umen que war iwira que war unumse ubꞌobꞌ e inmojr ajcꞌupesiajobꞌ tama Cawinquirar bꞌan cocha era ubꞌan.
34Y nox cay uqꞌuiox tama iwalma conda iwira tin e turobꞌ tama e cárcel umen taca que war acꞌupseyanobꞌ tama e Cristo, y nox tzayox meyra tama Cadiosir tama e tiempo yajaꞌ este que tzayox motor que war iwira aloqꞌuesna tunor lo que ayan ani tibꞌa umen taca que war ixcꞌupseyan tama e Cristo, cocha nox war inata que más ayan tibꞌa xeꞌ machi tuaꞌ acꞌapa que cꞌani ichꞌami conda ixixin ixcꞌotoy tut e qꞌuin.
35Ira isati icꞌupesiaj tama Cawinquirar era porque Cadiosir tuaꞌ axin uchojbꞌesox meyra jay machi ixixin iwacta ubꞌir e Cristo.
36Pero nox ucꞌani tuaꞌ icojco bꞌan taca tuaꞌ uyubꞌiox iche tunor lo que war ucꞌani Cadiosir, porque tamar era ixixin ichꞌami tunor lo que Cadiosir cꞌapa uyareon que bꞌan tuaꞌ uyajcꞌon.
37Porque chꞌar tzꞌijbꞌabꞌir tama uyojroner e Dios tamar Cawinquirar Jesucristo tiaꞌ che que: Pues jaxir tuaꞌ asutpa watar rajxa era cocha jaxir jax xeꞌ quetpa tuaꞌ watar y machi tuaꞌ eixna watar.
38Tin e cꞌani aquetpa erach uwirnar taniut, che e Dios, ucꞌani tuaꞌ acꞌupseyan tamaren tuaꞌ atacarna nimener, y de allí axin uchꞌami e cuxtar xeꞌ machi tuaꞌ acꞌapa. Pero tin e axin uyacta nibꞌir, che e Dios, machi ixto tuaꞌ intzay inwira, che e Dios tama uyojroner.
39Pero non machi war casutpa ticapat tuaꞌ cawacta ubꞌir e Dios tuaꞌ casatpa, sino que non war cacojco cabꞌa tamar cacꞌupesiaj tama e Dios y tamar era war cacorpes cacuxtar axin tacar utacarsiaj e Dios.
