1Laugagayo Mose unai se laoma wa meta ginauli namwanamwadi se laolaoma ne tautaudi mo, nige mamohoidiyao. Unai ede kaitalasam kesekesegadi tamowai se ginaginauliꞌuyoidi bolimai badobado, na udiyedi taba nige gonowana taukaihelahui ne se hedudulaidi.
2Ena taba laugagayo wa tamowai se hedudulaidi kabo gonowana kaitalasam wa se kaiyawasi. Matawuwuna ena taba kaitalasam kesega mo unai taukaihelahui wa se aꞌako, kabo nige gonowana yodi yababa se nuwatuꞌuyoidi.
3Na tenem kaitalasamdi ne meta baꞌaya kabahenuhenuwaisinidi bolimai badobado,
4matawuwuna bulumakau yo gouti hakiyadi kwasinadi nige gonowana baꞌaya se haigabae.
5Tenem unai huyana Keliso ye dobima tanoubu ta unai meta ye wane, “Kaitalasam yo kainauya nige ku henuwadi, na yau taugu ta ku kabinonohai yogu.
6Kainauya gabugabudi yo baꞌaya kabahededegigilina kainauyadi nuwam nige se henamwa.
7Na kabo ya wane, ‘Yaubada, yau ede te, doha buka unai se kuliyako, ya laoma kowa yom nuwatu bena ya ginauli.’”
8Bagubaguna Keliso ye hedede ye wane, “Kaitalasam yo kainauya meta siya kaitalasam gabugabudi yo kaitalasam baꞌaya hesabadi nige ku henuwadi yo nige nuwam se henamwadi.” (Iyamo laugagayo ye hedede bena se ginaulidi.)
9Na ye hededeꞌuyo ye wane, “Yau ede te, ya laoma kowa yom nuwatu bena ya ginauli.” Teina hedehedede ta udiyedi talam bagubagunana wa ye tolehesuwala na helabuina ye haiyama.
10Na Yaubada yona nuwatu unai ye tolehesuwalada yona tamowai, Yesu Keliso tauna kaitalasamna kesegana wa debanawai.
11Talam bagubagunana wa unai mayadai kesega kesega taukaitalasam maudoidi yodi paisowa se ginaginaulidi. Kaitalasam kesekesegadi se moseidi Yaubada unai na nige gonowana udiyedi baꞌaya se haigabaeidi.
12Na teina taukaitalasam saesaena ta baꞌaya kaitalasamna ma kesega mo ye ginauli, na mulina ne unai ye sae Yaubada nimatuutuuna unai ye tuli.
13Temenai ye nayanaya ye lau ee kana siga kana waiunu Yaubada ye toledi kaena kadi duku.
14Matawuwuna tenem kaitalasam kesega ne unai kaiteyadi ye tolehesuwaladi siya Yaubada yona tamowai ne meta ye haidi na ye tolehedudulaimamohoiyeidi ye lau nige kana siga.
15Yaluwa tabuna teina ta hinage ye hemasalahayako kalidawai. Doha bagubagunawai ye wane,
16“Guiyau ye hedede ye wane, ‘Teina talam ta kabo ya ginauli Isalaela tamowaidi udiyedi, tenem huya ne mulinawai. Yau yogu laugagayo kabo ya toledi kuludi ne udiyedi yo ya kulidi nuwadi ne udiyedi.’”
17Na kabo ye hededeꞌuyo ye wane, “Yodi baꞌaya yo laulau yabayababadi meta yau taba nige ya nuwatuꞌuyoidi.”
18Na huyana Yaubada baꞌaya ye hededegigilidi meta tamowai nige gonowana kaitalasam hekadi se ginauliꞌuyoidi.
19Kehaguwao, Yesu kwasinana debanawai ta nuwabayao na ta lusae galewa teha tabukalikalilina ne unai.
20Yesu teina keda hauhauna ta ye sokeyako kita hesabada yo gonowana unai kabo mauli ye leyama kalidawai. Woyo tapulisina ne iya ede Yesu tauna, unai kabo gonowana ta lau Yaubada unai.
21Yo hinage yoda taukaitalasam saesaena iya Yaubada yona tamowai taukitahetetedi.
22Tenem nuwatu maudoidi ta debadiyena taba kwa laoma ta sigi ta lau Yaubada unai ma nuwamamohoida yo ma sunumada. Matawuwuna yoda nuwatu yabayababadi Keliso kwasinana unai ye lausibusibuyeidiko na ye heꞌaꞌada, yo tauda waila aꞌana unai ye deulidiko.
23Taba ta tolobayao na Yaubada yona hededehesunuma ta hededehemasalahadi tamowai udiyedi ta bena ta kabihekahini, matawuwuna Yaubada saha ye hededehesunuma kalidawai wa kabo ye hemamohoiyei.
24Na bena ta nuwanuwatu kabo idohagi na ta haihebahebayaoꞌuyoida gadosisi yo laulau namwanamwadi udiyedi.
25Tabu yoda tapwalolo koikoigogodi ta miyasuwalaedi doha tamowai hekadi yodi miyamiya ne. Bena yoda sunuma unai ta haihebahebayaoꞌuyoida, matawuwuna kabina ta kata meta yoda Guiyau yona uyoma mayadaina ye hanahanauma.
26Ena kita Yaubada yona hedehedede mamohoina ne kabina ta kata na sola baꞌaya unai ta miyamiya, meta nige kaitalasam hesauꞌuyo kabo baꞌaya ne ye haigabaeidi,
27na ma matamatausida hekasa mayadaina yo Yaubada kana waiunu kabaheyababadi kaiwana kalakalasina ta nayanayaidi.
28Ena tamowai hesau Mose yona laugagayo ye laukwatakwataei na tamowai labui o haiyona se kita yo se hemamohoiyei, kabo se unuheboita, nige gonowana se katekamkamnaei.
29Yomi nuwatu idohagi? Ena tamowai hesau Yaubada Natuna nige ye hekasisiyei yo talam kwasinana wa ye hai doha ginauligaibu, yo nige ye mode meta teina kwasina ta kabo yona yababa ye deuligabaedi Yaubada matanawai, yo Yaluwa iya ginauli namwanamwadi ye kainauyaida ye hededeheyababa meta kabo kamkamna sahasahana ye hai?
30Tauhedehededena kabina ta katako, ye hedede ye wane, “Yau kabo ya haigum, yo hekamkamna meta yau ya ginauli,” yo ye hededeꞌuyo ye wane, “Guiyau kabo yona tamowai ye hekasadi.”
31Unai ginauli nuwamatamatausikalilina ede hekamkamna Yaubada Maumaulina nimana unai kabo tamowai se hai ne.
32Na huya bagubagunana unai Keliso wasana kwa hai wa kwa nuwanuwatui. Tenem huyana ne unai kamkamna lakilakina kwa hekalo, na iyamo yomi sunuma unai kwa tolobayao.
33Huya hekadiyo tamowai komiu Yesu tausunumaena se haigomiu na boda matadiwai se hededeheyababagomiu yo se hekamkamnagomiu, yo huya hekadiyo kamkamna kesekesegadi tauhaidi wa kwa saguidi.
34Kami kahao numatutugudu unai se toledi wa kwa katekamkamnaedi, yo huyana yomi gogo se haidi wa meta kwa gwauyala, matawuwuna kabina kwa kata meta yomi gogo namwanamwadi yo miyamiyatahitahidi siya ede galewa ne unai.
35Unai tabu yomi sunuma kwa gabaei. Kainauyana lakilakina kabo Yaubada unai kwa hai.
36Yomi sunuma unai taba kwa tolobayao, yo huyana Yaubada yona nuwatu kwa ginaulihegehedi sigana unai, saha ye hededehesunuma wa kabo kwa hai.
37Na huyakubwakubwa mo “taulaoma ne kabo ye lagema na taba nige ye pahili.
38Na yogu tamowai dudulaina sunuma unai kabo ye miya; na ena ye mulisigisigi yau taba nige nuwagu ye namwa kalinawai.”
39Na kita meta nige taumulisigisigi tamowaidiyao. Ena tamowai hesau ye mulisigisigi Yaubada kabo ye heyababa. Na kita meta tausunuma tamowaidiyao, mauli nige kana siga tauhaidi.
