Iburu 10

1

2

3

4

5

6

7

8

9

10

11

12

13

¹Ro Mosisido akae ije fume ire maeje fu rade ruakuveno ijadufuo kavene ije nijasue. E ije bu zinone ni besu ijene juaevasia besubesu ijia ifaejevo. Rove zinone ije fu e ije bu akae isuiko ijadufuo rotire ijia karivo ije karauniamo baki.

²Ro e ije bu Godi baname isoevo ije ise buone ije bune mukoreigia sokuva ije bube una ise buone ijadufuo jaeveke. Ijadufuo maeje bune mukoreigia soevo ijadufuo zinone buone bu ifaejevo ije bu isuibe ijia aredufuo.

³Ro e ije bu juaevasia besubesu zinone bu ifaejevo ijia giana vierafega buje bu ise revo. Rove mave-kau ro fanu binobino ijiebuo kavuane ije fu izege ise ije sokuma baki.

⁵Ro maza ije Kuraesi fu iko ume igia ruakuveno ijia fu vua be Godi ijiege kuarae. Fu kua, A fanuve ijiakiro ire binobino ijia zinone ifaejevo ije aka ijuonemo. Ro a vierafe naka vajae none ige a amaerima ijia abena ise ijadufuo zinone ifaejeke.

⁶Ro fanuve foteke bu fata ijia zinone ifaejevo ijiakina ire gue bu ise buone sokuae ifaejevo ije buka naebe mani. Ijadufuo aka naebe oemadame.

⁷Ijadufuo Godi na igifurekido nare irere a kuariega na redufuo a reke. Ro vua ijadufuo ije ane noesina kuaemo bune buki akae ijia isoe.

⁸Amure ije Kuraesi fu kuae, A ire binobino bu zinone ifaejevo ijiakiro fanuve ije bu fata ijia zinone ifaejevo ije a oemaremo baki. Ro kuke a fanu gue bu ise buone sokuae zinone ifaejevo ije aka ijuonemo ro a oemaremo bakino kuae. Ro vua ije Kuraesi fu kuaema ije bu isuibe Mosisido akae ijia nuvena ijiege zinone ifaejei.

⁹Ro Kuraesi fu kuke kuae, Na igifurekido nare irere a kuariemo ije rekono kuae. Ijadufuo Godi fu vame isuiko ije bu izege zinone ifaejevo ije fu abe bio nijae. Areme fu Kuraesi abena zinone ifaejena vame iviaeko ije zinuivena amaeri.

¹⁰Jesu Kuraesire Godi irere fu vierafema ijene rei. Ijadufuo e boeje noeje none Kuraesire vajae fuone fu abena kaginu zinone ifaejema ijia fune ise nuvuone ije mukoreigia soejuomo none una maturaena e akae rei.

¹¹Ro e ije zinone ifaejevo ije bu maza besubesu ire ni besu ijiaru kukuma Godi zinone ifaejavo. Rove zinone ije bu ifaejavo ije fu ise buone bu reva Godi fu kena isekafiakuveno ije soejiamo baki.

¹²Ro fune Kuraesido vajae ije fu abena kaginu nuvuefuo zinone ifaejema ijare e boeje ijiebuo ise bu reva ije fune okurae. Areme fune saove ijia Godido umui maeneke ijia fuosiki fine.

¹³Fu Godiki ijia fido rade e ani fuone boeje bu rotire fuone ijia vaga fu samuagiake.

¹⁴Jesu fu vajae fuone kaginu abena zinone ifaejema ijia fune e ije bu fu ma vierafevo ijiebuo oe ije soejiame. Fune ijiege dasumiakinu karauniamo ijadufuo bu maza boeje Godido nidua ijia e maturaena karinoeve.

¹⁵Ro kuke Kavene Akae ije fudua vua ije fu maga fune abena marei. Ijadufuo amure fu buki akae ije bu isuibe isoeva ijia ijiege kuae, Na vua ije e none ijena kuaena avenamike. Ro maza abekuma na akae none abena nigofo buone ijia nijaekina bu mukoreigia vierafeke. Ro kuke na abena oe buone ijia isoekina bu mukoreigia ije iriniakono kuae.

¹⁷Ro Kavene Akae fu kuke una kuae, Na ise buone bu reva ije nabe una vierafekono kuae.

¹⁸Ijadufuo e ijiebuo ise ije fune Godire giana arei. Ijadufuo iviama nobe una ire binobino ijia kena Godi zinone ifaejadufuo.

¹⁹Ijadufuo uviarafano iviama no Godido sanaema ijia karinoedufuo ije fu erare vafuokuma baki. Ro kuke fune Jesure kavuane fuone fu nuvuefuo usiaema ijia fune vame nuvuone amaeri. Fune Jesure e zinone ifaejemo igege rena ugone ije asina Are Ka Ma Akae ijia aruna vae. Ijadufuo fune fure vame nuvuone amaerima ijadufuo iviama noka oemarekinu Godido nidua ijia vadufuo.

²¹Jesu fuka ma e ireobo nuvuone zinone ifaejemo fu Godido e ije samuagiamo. Ijadufuo noka ma vierafe areme oe maturaena Godi ivuake ijia vake. No izege no do mukore ijia vajae nuvuone ruoriaga fu maraduomo ijiege ise nuvuone fune Jesure kavuane fuone ijia soejue. Ijadufuo noka ma vierafero jaebirena Godido nidua ije vake.

²³Ro noka vua maeje no ma vierafekinu ro abe e kuarianoevo ije mukoreigia faradiana giriesake. Ijadufuo maeje no ma vierafega Godi fuka vua ije fu kuaema ije rekiro samuae.

²⁴Ro kuke noka vame izege no nuvuone oetuanamikinu ejafanamina ma renoejo ije nuvue nijaenamidufuo ije vierafeke.

²⁵Ro nobe vame ije no afuina besu E Ireobo ijadufuo baname isoevo ije e gue bu areva ijiege areke. Ro noka nuvuone ejafanamikuva fuka maredo no ijiege redufuo. Ijadufuo maeje no vierafe E Ireobo maza ije fu una ruadufuo ije fune ivuareme.

²⁶No Jesudo vua maeje none fie. Ijadufuo no vame fuone no ijia arena mumaza una ise renoekuva Godi fu una ire be irere ijare abena zinone ifaejega fu ise nuvuone sojuokuma baki.

²⁷Ro noka jumekinu Godi izege fu rade ise nuvuone no renoevo ije kena mazie guokuveno ije samuake. Ijadufuo maeje Godi fuka izege fu e ani fuone ije kena miane naeno ijia isekafiadufuo ijiege fu no kame miane ije fu maza boeje naeno ijia isekafuodufuo.

²⁸Isuibe Mosisido akae ije fu kua erare fu Mosisido akae ije fu ijuonena abe tuasega e inokiro ro inokubeke bu gaeva ije bube fuone oefiane abena ga areke ro buka kanaga fu baroneno kuae.

²⁹Ijadufuo vame besu ijiege eranebe bu Jesu Godido Fari ije abe buzeivo ije Godi fuka kame vame ise ijia isekafiake. Ro kuke eranebe bu Jesudo kavuane ije fu e ijiebuo ise ije sokiro usiaena vame iviaeko ije abena marema ije dabe una ire omise igege vierafevo ije Godire kame isekafiake. Ro kuke fu e ije bu Kavene Akae ije fu ma rejiamo ijadufuo vua ise kuaevo ije Godi fuka kame vame ma ise ijia isekafiaga bu ireobo isejavaedufuo.

³⁰No vierafe Godire e ije kame iseniseigia isekafiake. Ijadufuo maeje fune Godire korufuo buki akae ijia kuae, Na kono una e ije bu ise revo ije vegue ise rejiake. Ro na una vegue ise buone ijadufuo isekafiakono kuae. Ro kuke fu una buki kafare be ijia ijiege kuae, E Ireobo ijare e fuone ijiebuo ise ije kena mazie giakono kuae.

³¹Ijadufuo erafano, Godi e daroki ije fu no kame ijiege isekafuodufuo ije fuka ma omise.

³²Ro nine ude izege ja karinoeva ije vierafefo. Amure ije ja Kuraesido vua fieva ije jaka vame binobino ijia isejavae rove ja naebe mamoe.

³³Ja maza ijia jaka samadukua jaevekinu ro jaeje buka e ije Godi ma vierafevo baki ijiebe ja arafiriakinu kame isekafiae. Ro maza gue ja e gue bu vame besu ijiege nibijavo jaka una e ijiebuo oefiane abekinu ifejiae. Ro kuke jaka e ije bu dibure karijo ijiebuo oefiane abekinu ifejiae. Ro maza bino e Godi ma vierafevo baki bu sinuome jone gue kamazia vako ije jaka uria oemareve. Ijadufuo maeje jane kojo ma vierafega Kavene Akae ijadufuo sinuome maeje ije bu saove ijia naove. Ijadufuo ja rade kena oemarekinu kari vakiro ja ije vierafei.

³⁵Ijadufuo jade jone izege ja ma vierafevo ijia mamoevo ro nika giriesafo. Ijadufuo maeje ja ijiege rena vakuva Godi fu ijadufuo una vegue vame ma bino jone reke.

³⁶Ijadufuo janika oe vafaena mumaza Godi ma vierafefo. Ja ijiege Godi irere fu vierafema ije renoekuva ja ire ije Godi fu kiaema ije kedufuo.

³⁷Ijadufuo maeje Godi fune isuibe e ije fu kuamoga fu ruaema ije fuefuo fu ijiege kuae, Fu maza aokube ijia una ruake ro fube saroeke.

³⁸Ro e none maturaeva ije bu ma vierafena karivake. Ro e gue eranebe bu una na ijuegafiekuva nabe buone oemarekono kuae.

³⁹Rove noeje no e ije bu jumena buone bu ma vierafevo ije arevoga Godi fu kena isekafiaema ijieki baki. Ro noeje noka Godi ma vierafevo ijadufuo fu no karaunuome.