1Moseseme Isaraele wambu dupwa kaeya nao lamaiyuoko karo lao,
2Epapu namba ee kana 120 ingilyamo dokona namba kapa pyuo nakamana mupwa ingyuo kara narolyamo. Dee mende opetae Kamongo dokome namba langyuo, Namba kapa pyuo ipwa Jotane doko yalo paa nare, lapya.
3Nakamana Kamongo Anatu doko baa range wamboko pao yuu dokona wambu palenge dupwa pyao kokwa soo nembaramopa yuu dokona nakama palyuo kararami. Dopa pyuo nakama yuu dokona palirami dokopa Kamongome leyamuli pyuo Josua baa mupwa ingyuo iso karara.
4Kamongo dokome Amo kiŋi kingi Saiyone lengepe Oke lengepe pyao anamasi minyuo dee nakambana yuu pyao kokwa soo piyamo doko suu pyaoko wambu doloma pyara.
5Kamongome yanda pyao rakae selapa lao nyiso porainya renge jeramopa wambu doloma pyao anamasi minyaramiŋi. Nambame wambu doloma kando pipwa lao langiyunuli pyuo pirami ingilyamo.
6Nakama kando poraiyuo karo wambu doloma kandapala pyuku lao paka nalapape. Nakamana Kamongo Anatu baa rangeme nakama pipya role karara. Baame nakama yaki nyuo kaeya nara, Moseseme leya.
7Dokopa Moseseme Josua epena lapala Isaraele wambu peparaena lenge kambu dokona karo baa lamaiyuo, Embame wambu dapwa yuu dokona palyuo kararami lao Kamongome nakamana rora ambasu dupwa kando yuu mairuŋu lao lalu lao lao leyamo dokona lanyuo pare. Emba pako pyuku laa napala kando poraiyuo karape.
8Kamongo baa rangeme emba yaki nyuo kaeya nara. Dokona lao emba kumasi ingyuo pyuku lao pako kara napipi.
9Dokona lao Moseseme Anatunya lowa pii dupwa pyao palyapala Lipae akali purisi ingyuo Kamongona Kana Minyuo Lalu Lao Lenge Pii Palenge Bokote doko rapu pyuo karenge dupwape dee Isaraele wambunya mupwa ingyuo karenge akali dupwape maiya.
10Maipala baame nakama pii lamaiyuo, Ee kana yanda ipingi epo paparamo yaka lao bange kanape yano singi dupwa isingi jii nao kame soo kaena laraminyi yuu gii dokopa wambu dupwame anda kauwa pipala palyuo nenge nenge gii dokopa lowa pii dapwa wambu peparaeme sinya lao yaka lao lamairami.
11Dokona lao lakandenge yuu mendakinya nakamana Kamongo Anatu doko lakandala eparami dokopa Isaraele wambu dupwa kando yaka lao lamairami.
12Dokona wambu peparaeme sepala nakamana Kamongo Anatu doko pako karo banya mawa pii dupwa mondo lao minyuo kararami lao embame enda akali peparaepe nakamana wane wanake peparaepe wambu yuu wakale range embena taone dupwana palaminyi dupwape kee lao nyuo sukusa sukusa piri.
13Dopa pyuo piri dokopa embena para pyao nyerene Anatunya mawa pii see nange dupwame rengya serami ingyara. Dopa pyuo Anatu mupwa lao suu pyao warombo soo karo ipwa Jotane yalo yuu nyuo palya panya pilyaminyi dokona palyuo kararami, leya.
14Dokopa Kamongome Mosese lamaiyuo, Emba yuu gii andarele palyuo kara nare ingilyamo. Dokona embame Josua kee lapala baa komau anda dokona nyuo minyuo ipupi. Dokopa nambame baa dopa pyuo karena lao lamairu, leya. Dokopa Mosese Josuapa komau anda dokona peyambi.
15Peyambi dokopa Kamongo doko kopa rau pipya role pyapeta komau anda kambu dowa dokona epo kareyande nakamba keta paneya.
16Panapala dokopa Kamongo dokome Mosese lamaiyuo lao, Emba repeta kumare ingilyamo. Kumaparene dokopa enakana wambu dupwame namba mona jii napala nambana nakama pipya kana minyuo lalu lao leyamo pii dupwa kamba larami. Nakamame namba kame soo kaepala yuu nyuo palya panya pilyaminyi dokona mee bange anatuŋu lao lakandenge dupwa lakandaramilyamo.
17Dopa piraminyi dokopa nambame nakama kando imbwuapala kyawa yaki nyuo kaeyaronosa koo keta palyuo kwaeyo parami. Randa wakale wakale dupwa epo nakama keta paliramopa nakanjo sepala dokopa namba nakamana Anatu nakama pipya kara nalyane dokona randa nyilyamano lao soo nyerami.
18Dopa pyuo soo nyeraminyipape nyisalana suu pyaa naro ingilyamo. Renge doko nakamame kopetame pyuo mee bange anatuŋu lao lakandenge dupwa mona maiyuo lakandelyaminyi Kamongome Mosese lamaiya.
19Embame dakepa kenane dake pepa pyapala Isaraele wambu nakama mana lamairi. Dokopa kenane dokome nakama pipya nambana usinisi ingyuo yango palyuo pyasi palira.
20Nambame nakama yuu amenge pingi nakamana rakange kyawa dupwa kando mairuŋu lao lalu lao leyo dokona lanyuo paro. Paronopa nakamame nenge nalana suu pyaraminyi dupwa kapa nao mona minyarambu mona nyeramo kararami. Dopa piraminyipape namba mata jepala mee bange anatuŋu lao lakandenge dupwa mona nyuo lakando kararami. Nakamame namba epe kanda nao yaki nyepala nambana mawa pii palenge kamba lao nembarami.
21Randa koo malu mee nakama keta epara. Dopa piramopape kenane para pyao nyerami dupwame pyao kararami dakeme nambana usinisi ingyuo koo piyaminyi dupwa lasaka pira. Nambame yuu mairuŋu lao kaeyasi kandale dokona lanyuo papa naronopape epapu nambame dopa pyuo suu pyao karaminyilyamo lao soo karapunu pilyamo, Anutumi Mosese lamaiya.
22Yuu gii mendaki dokopako Moseseme kenane doko pyao retapala Isaraele wambu dupwa mana lamaiya.
23Mange dokopa dee Anatumi akali Nanena ikinyingi Josua baa lamaiyuo, Paka nao mona porayapala karape. Dopa pyuo embame Isaraele wambu yuu nambame mairuŋu lao kana minyuo lalu lao leyo kande dokona lanyuo pareŋe namba embapa role kararo, leya.
24Dokopa Moseseme Anatunya mawa pii dupwa bukunya piya. Pyao dokopa mendaki mendepe isa nemba naya.
25Pyao otapala dokopa baame Lipae purisi Kamongona Kana Minyuo Lalu Lao Lenge Pii Palenge Bokote doko rapu pyuo karenge akali dupwa lamaiyuo,
26Buku Anatunya mawa pii pyasi palenge dake nyepala Kamongo nakamana Anatunya Kana Minyuo Lalu Lao Lenge Pii Palenge Bokote repeta retarami. Dokome banya wambu dupwa kopetame pisaraminyi lao lasaka pyuo serasa pira.
27Nakama mona kana pokapala kambako lao parami doko silyu. Namba ene kumapa nalyo dakepa Kamongopa kamba lao karaminyi dokona kumaro dokopa angingyuo suku manjo kamba laramilyamo.
28Nakamana rara dupwana akali kyawa iso karaminyi dupwape isingi akali dupwape pii lamairuŋu nambana lenge kambu dokona sukusa sukusa pyuo epena lao nyuo malu palyarami. Nambame yake yuupa dolapo nambana usinisi ingyuo sinya laro.
29Kumaparo dokopa wambu dolomame ama koo angingyuo karo nambame nakama pii mana lamaiyuo dupwa kamba lao nembarami doko silyu. Dopa pyuo yuu gii ene eparamo dupwana Kamongome daa lenge dupwa pyuo kararami dokome baa imbwanyi pyambuo randa nyeramilyamo, leya.
30Enakana Moseseme kenane pii peparae lamaiyamo dokopa Isaraele wambu peparaeme soo kareyami.
