Text copied!
CopyCompare
A Nitana Vure - Vinara

Vinara 13

Help us?
Click on verse(s) to share them!
1E Moses i ta tabu i ta maea, “Na tahuna a propet o a bakovi tara i lohoka ni tuveve polo a vurena viri, ge valai ge rata a nivakasiri,
2ge ngaru ni rata ioe go ramai a vure ranga i uka ma o kavurike muga, pali a nivakasiri ge bele
3naha ni longo maia. E BAKOVI DAGI a Vure ne mua i toni ioe kunana, ge matai ioe o ngaru hatekea na hatemu lobo, na niluhoi vomu lobo, o i uka.
4Mu togoa e BAKOVI DAGI, mu ramai ia kunana. Mu longototoa a ngavana, mu ramai a maka vinara vona, mu leho vona, mu pesi tora ni ramaia.
5Pali mu rabalaki e huriki a propet turane huriki ri tuveve polo a vurena viri, na tahuna ri taki mua mu gu longotaro a nitane BAKOVI DAGI a Vure, ra i bole tala mua o Egipto na tahuna mua a vorakato. Re huriki a bakovi maea ria a bakovi hale, ri ngaru ni turari tala mua na dala e BAKOVI DAGI i ngaru mua mu gu ramaia. Mu rabalaki e huriki a bakovi hale maea na mailo ne mua.
6“Na tahuna e turamu, e tumu, e girihimu ra o ngaru hatekea, e turamu tara i voko ioe, i ngaru ioe go kavurike a vure ranga, naha ni longototo, a vuhuna ioe turane huriki a gare vomu hosi, i uka ma mu kavurike a vure ranga.
7E huriki a bakovi a ngatavine na tabeke lobo na malala ri kavurike a maka vure ranga. Pali ioe naha ni ngutu ne huriki nga, ra ri made tabukoi o ri made basi vomu.
8A bakovi o a ngatavine i ngaru ni turari mua mu gu vasileki na vure ranga, naha ni longo maia na tahuna ge ta namikamika mai mua. Mu rege talea a nitana. Naha ni dodoa, naha ni tuhoria.
9Mu muga mai ia, mu rabalakia a viri i toni ni turari mua. Mu bole a maka kedo mu padimatea. Muri e huriki ranga ri gi valai ri gi tuhori mua, ri gi padi tabua na kedo.
10Mu voro a maka kedo, mu padia ge mate liu. A vuhuna i ngaru ni turari tala basi mua ne BAKOVI DAGI a Vure ne mua. Mu luhoi mulea a Vure i bole tala mua o Egipto, na tahuna mu leho manga a vorakato vonga.
11Mu rabalaki e huriki ri ngaru ni turari tala mua. Muri e huriki a Israel lobo bara ri longoa a velengana a maki iea, bara ri mangenge, ri matakari kamumu ria, i uka ma ri gi rata tabua a naro hale iea.
12“Na tahuna mu made pali vona a malala e BAKOVI DAGI a Vure ne mua i habia ne mua, bara mu longoa tara ngava i maea,
13‘I ranga huluvonga ne mua ri vakamanga a niluhoi ne huriki ri gi kavurike a vure ranga, i uka ma ri vasileki ne ria hosi.’
14Na tahuna mu longo a maka ngava tavula maea, mu bakai kamumu a vuhuna a ngava. A ngava ge muholi ri ratea a naro i muma hateka iea,
15mu rabalaki re huriki nga turana a maka bulmakau ne ria.
16Mu bole a maka mahala ne ria, mu ru kadolu na kurukuruna tanga. Muri mu rungania a tanga iea turana a maki lobo ri tabuli vona, ge manga a nihabi gutu-vuro na Vure ne mua. Ra tanga iea ni ratapile, ge tabuli mavonga liu, nahea ni gi hae tabu.
17Naha ni bolea tara maki vona a tanga iea, ra ta ni gi rungani na kanono, i maea e BAKOVI DAGI bara i lobo a rongova vona, i dodo mule mua tabu, i rata mua mu bele kupo hateka, i manga a ngava i ta muholi vona ne huriki a gare ne mua hosi.
18E BAKOVI DAGI a Vure ne mua bara i ratea a maki iea na tahuna mu ramai lobo a vinara vona a habi ne mua ngane, mu rata a maka maki ge malamala na matana.”