Ʒekaria 11

1

2

3

4

5

6

7

8

9

10

11

12

13

14

¹O Lebanoŋ, motâc sâkoge aŋkeoc, eme ʒoczi bâruŋkerâ jâmâzâc jâc wiacge ʒâseŋke‐fârezejec!

²O wetejâc, jâmâzâc qafara‐fârekicne â jâc ʒâŋe biŋehec sipirickekicnere kio owa eniŋ! O Basaŋ mâreŋte boriŋjâc, ŋoŋe kâte wânʒâŋ kifârewecte kio wâuŋa eniŋ!

³Mananiŋ, lama jaŋere kecɋaŋ gie sipirickekicnere soŋaŋ jaŋe kio uu eeŋgopieŋ! Mananiŋ, Jordaŋte jâckâte imackekicnere laioŋ jaŋe owa sâko eeŋgopieŋ!

⁴Wofuŋ Anutu‐nanezi ʒiŋuc mukac: “Lama hehezure biŋe juŋgopieŋ jaŋere soŋaŋ juzemec.

⁵Lama iŋucne furine baeŋgopieŋzi hezuc‐jopahuc kiŋ mi hureeŋgopieŋ, â furi roeŋgopieŋzi ʒiŋuc mueŋgopieŋ: ‘No iŋuc ehuc moneŋ sâkohec ekopacte Wofuŋ muteŋkezo!’ Ehame soŋaŋfâc‐jeŋic jaŋe wâc busâqoc mi mana‐jareeŋgopieŋ.

⁶Irec no wâc mâreŋ ʒirec ŋecjucfâc jaŋere busâqoc mocwâc mi manapemu, Wofuŋ nore dâŋ iŋuc. Manakic, no ŋic ejarepe âgofâc‐jeŋic jaŋere meo â ŋicwofuŋ‐jeŋic ere meo feniŋmu. Ehame jaŋe mâreŋ ima bahapie mejeŋickonec moc mi batarac‐jopapemu.”

⁷No lama furi bapa ŋic jaŋe lama hehezure biŋe bâwosâec‐jopambiŋ irec soŋaŋ jupo. Ehuc gunu jajahec rocjofarâ moc irec ʒâŋe “Aki anonoc” â moc irec ʒâŋe “Maŋ mocjaha erâ juju” iŋuc mucjofapo. Iŋuc erâ lama soŋaŋ jupo.

⁸Ehuc mosa mocjaha irec maŋnao soŋaŋ jahec â moc qâhâmoc‐jopapo. Jaŋe nore takic‐jopame qaisocnupie miriŋ‐nane sâqorewec.

⁹Iŋuc fuame ʒiŋuc mupo: “No ŋoŋere soŋaŋ mocwâc ʒuhuckerâ mi jupemu; irec moc e hâmozo murâ hâmozejec â moc e sifuckezo murâ sifuckezejec, â tiwâne juniŋmu jaŋe jaŋaczia nânâc enʒepieŋ.”

¹⁰Iŋuc murâ gunu‐nane ʒâŋene Aki anonoc i rorâ bazupo, ehuc ŋicne ŋicne jaŋehec ʒâʒâfic epo i hâcne hetâcnepo.

¹¹Ʒâʒâfic i ʒoaŋ ira hâcne hetâcnekicne. Ehame lama furi bapa ŋic honecnumbiŋ jaŋe ʒiŋuc mana tarambiŋ: Keci Wofuŋte dâŋ hâcne.

¹²Eme ʒiŋuc jazapo: “Ŋoŋe manapie sâckekacko gie furi‐nane nareniŋ, arictac eme beheniŋ.” Eme jaŋe gie furi‐nane siliwa moneŋ 30 narembiŋ.

¹³Iŋuc epie Wofuŋzi ʒiŋuc nazawec: “Nore manapie wawahane eha moneŋ garembiŋ i tahare katapao râetec huoc.” Eme no siliwa moneŋ 30 i rorâ Wofuŋte ufuŋko tahare katapao behepe huwec.

¹⁴Eme gunu‐nane moc ʒâŋene “Maŋ mocjaha erâ juju” i bazupo wâc, iŋuc ehuc Juda â Israe qoqomâ juju‐jekic i hetâcnepo.

¹⁵Eme Wofuŋzi ʒiŋuc nazawec: “Go lama soŋaŋ burecnere gunu wiac i mocwâc rozemec.

¹⁶Manakic, no mupe mâreŋ ʒira soŋaŋ moc fuaocmu e lama sipiric‐jopakicne jaŋe hone maiŋ mi ejareocmu, â qac qâsoric ekicne jaŋe wira basac mi ejareocmu, me wic fua‐jarekicne mi bâsomie‐jareocmu â docke betaŋ ekicne jaŋe wâc mi bafic‐jopaocmu. Aricne, e lama wokemaŋ biuc sâkohec nâcjopahuc siec‐jeŋic beheme raocmu.

¹⁷Jei, soŋaŋ‐nane burecnezi lama behec‐jopaekac! Irec ʒikazi meombâŋ‐ticne qazuhuc fâreopec ʒâŋe hândâŋ‐ticne i âke hâpozejec! Meombâŋ‐ticnezi ɋaŋa‐fâreha fâreopec ʒâŋe hândâŋ‐ticne hâpo‐jâmbâŋkezejec!”