Zakali 11

1

2

3

4

5

6

7

8

9

10

11

12

13

14

¹Liɓan, ɗa-laaiti daalao, abui ʋa é ɗa-sɛdele guluiti gala.

²Sipɛlɛ guluiti, à ɓalakpala ɠoozu, tɔɔzei sɛdelegi loa bu, mazɔlɔɔ gulu maanɛɛnɛgiti ti ʋɔga. À ɓalakpala Ɓasan sɛne guluiti, mazɔlɔɔ goya wolai ɠoloa, nii nu nɔpɛ ge la ɠɛa lɔɔzu ba!

³Nu ɠa baala makɛ nuiti kpala gooi mɛnisu, mazɔlɔɔ tufa lɛtɛi ti ɠɛa wokomaalɛɛzu la naa ɠoloɠologa. Nu ɠa zalaiti sikɔ wooi mɛnisu ɓalaa, mazɔlɔɔ Zuludɛn ma lɔɓɔ ɓiili wolai, ti ɠɛa wokomaalɛɛzu la naa ɠoloa.

⁴Nà-GALAGI, Ɠɔoɠɔ GALAGI ɠɛni ma: «Ɠɛ ga baalagi tɛiti makɛ nui, niiti ti leveai na saai ma.

⁵Tɛigiti ti ti ɠeyazu, ti ɗa ti ʋaa wafuun, ti ʋɔdi nuiti ti ɗa ɠɛ ma: ‹Mamagi ɠa Ɠɔoɠɔ GALAGI ʋɛ, mazɔlɔɔ gè ɓɛtɛa!› Ti makɛ nu ɓɔɠɔiti ti la vɔlɔ ti maawɔinɠaazu.»

⁶Nɔ̀un nà, Ɠɔoɠɔ GALAGI, gòoi ɠaa: «Gè la mɔ zooi nii zu nuɓusɛiti maawɔinɠaa pɛ. Mazɔlɔɔ nà nuiti zɛsu ɓɔɠɔ yeezu, tanigaa ti ɗa ti-waiti suziɠa, gè ti yɛ ta-masagiti zeezu. Ta-masagiti ta zooi ɠoloɠolo, kɛlɛ gè la nu nɔpɛ kula ti ya.»

⁷Gè tɔɔzeini ga baalagi naati makɛga, niiti ti leveai na saai ma, ma un ge da ma mɛɛ ga zɔiti ti maawɔinni baala kpulugi zaama. Gè baala makɛ tukpɔ felegɔ vaaɠɛɛni ɓɔɠɔ ʋɛ. Gè ma mɔungi laasei pɛɛ ga ‹Zaalai,› gè felesiɛi laasei pɛ ga ‹Gilibai.› Gè zɛba gè ɗa ɠaaɓa baalagiti ma.

⁸Alu gilagi laawu, gè makɛ nu saʋagɔiti kpɛɛni. Naa ʋoluma, zìi la ɠɛni lɔɔni baalagiti bu, tiya ɓalaagi wɔ̀inzeɠe ti ma.

⁹Gè ɠɛni baalagiti ma: «Gè la mɔ wo ɠɔnɔkula pɛ! Zɔi é zaazu, naa za! Zɔi ta ɠɛ paazu, naa ɓɔɠɔ yɛ ná, ti paa! Zɔiti ta yɛ vulua, naati ti ɗa ɓɔɠɔ mi yɔɠɔzu.»

¹⁰Gè nà-tukpɔi zoni, nii daa ga ‹Zaalai,› gè galeɠale, naa ɠɛ ga nà-minazeɠegi ɠoloɠologa, nii é ɠɛa gi yɔɠɔzu gá ziiti pɛ.

¹¹Minazeɠegi naa ɠoloɠoloni naama voloi nɔ. Baalagi niiti ti wola maawɔinɗai, ti ɠɛni wɛlɛzu bà, naati ti kwɛɛni ga, Ɠɔoɠɔ GALAGI ɠa é ɓɔɛzu ga niima vaiti maaʋele.

¹²Gè ɠɛni ti ma: «Ni wa kaana ga soloo faa ʋe, a sàlai ve zèa, ɓa wo zɛ ná.» Ti wali ɠae ʋuusaʋagɔi (30) ɠaaluni, ti fe ga sàlai.

¹³Ɠɔoɠɔ GALAGI ɠɛni mà: «Walii é ti ɠaazu ga ma ʋagɔi, naa ʋili ya diɠi lo nui ma, nii ti kaai ga nɔ̀un sɔngɔi.» Gè wali ɠae ʋuusaʋagɔi (30) zeɠeni, gè pili ya diɠi lo nui ma, Ɠɔoɠɔ GALAGI ná-pɛlɛi wu.

¹⁴Naa ʋoluma gè nà-tukpɔi velesiɛi «Gilibai» ɠaleɠaleni, naa ɠɛ ga kɛɛɠɛlounlai ɠoloɠologa Zuda ta Izelayɛle yɔɠɔzu.

¹⁵Ɠɔoɠɔ GALAGI ɠɛni mà: «Ɓɔɠɔ maaɠili niina ga baala makɛ nui ná-sɔɔlaiti, nii é ɠɛɛzu ga ɠimalala nui.

¹⁶Mazɔlɔɔ nà baala makɛ nu ɠila buzeɠezu zooi nii zu, nii é la yiizoolɛa ga baalagiti, ti ɠɛɛzu ti za, é la baala goiti gaiziaa, nii maawanaai é la naa ʋaloa, nii kɛdɛgai é la naa ɠɔnɔkula. Kɔnɔgi ɠa ɠɛ ga togani niiti ti wulɔai naati ma zuaiti, é ɗa ti-ʋolokagiti baliʋali.»

¹⁷Maanɔɠɔ ɠa ɠimalala ʋaala makɛ nui ʋɛ, é ɠɛlɛzu ná-baala kpulugi ʋa! Tɛigi boɠa zɔkpɔi zeei zu vikɛi ɠoloɠolosu, ta é zeezazu ʋele ɠaazuɠɛzɛgi wolo su! Zeei za ma faan, ta zeezazu ʋele ɠaazuɠɛzɛgi za su faan!