1Eme mocwâc ʒâŋe fipe feme mi keretac 4 jaŋe tiki jajahec ŋondeŋ‐jekicko fuarâ warepie honec‐jopazepac i! Tiki jajahec ine honec‐jofape aeŋ bâbâroŋ iŋucne ŋepic.
2Keretac bâbâni fuawec irec becâsic jaŋe bâbâroŋ â ere râpeo fuawec irec becâsic jaŋe gâgâpâc.
3Eme irec faicnao keretac moc fuawec irec becâsic jaŋe qaŋqaŋ â keretac tatarane fuawec irec becâsic jaŋe qâqâreŋ.
4Eme aŋelo nohec dâŋ ewec e ʒiŋuc muhuc wiocnepo: “Bomboŋ‐nane, wiac ʒi jaŋere fuŋne weniŋuc?”
5Mupe ʒiŋuc nazawec: “Jaŋe sambâŋkonec mâŋâŋ 4, erâ ʒi mâreŋ sâko mâreŋ irec Wofuŋ kiŋaŋ qacnembiŋzi mâreŋ sâcke‐fâreniŋmu.
6Keretac becâsic gâgâpâcheczi faic mâreŋkopec rahame keretac becâsic qaŋqaŋheczi ʒoaŋ huhunaopec raocmu; â keretac becâsic qâqâreŋheczi juwic mâreŋkopec rahame keretac becâsic bâbâroŋheczi ʒoaŋ wewefunaopec raocmu.”
7Eme jaŋe fua‐fârerâ mâreŋte fuŋne hone manac eniŋte ʒoɋac embiŋ. Irec aŋelozi muwec: “Ajoc, ra mâreŋ fotâcneniŋ!” Eme jaŋe ra mâreŋ fotâcnembiŋ.
8Ehame ʒiŋuc muhuc wira‐narewec: “Manakic, faic mâreŋkopec raŋgopieŋzi gie bahapie maŋnane taraocmu.”
9Eme Wofuŋte dâŋ norao ʒiŋuc fuawec:
10“Helidai, Tobia â Jedaja Babe mâreŋkonec risie warembiŋ jaŋeraonec taha wiac rorâ Zefaniare ŋokâ Josia ere ficko bafezemec.
11Go jaŋeraonec siliwa â gol rohuc hendiŋ moc ba akic erâ taha bapa sâko Josua, Jozadacte ŋokâ ere qizecko hetec huzejec.
12Ehuc âzâcnezemec: ‘Anutu Tâpiri Ɋuŋɋasaŋ Wofuŋ e kecʒiŋuc mukac: “Manakic, ŋic moc ʒâŋene Oso gitecne e soka sanaŋ erâ Wofuŋte ufuŋ baocmu.
13Eki hâcne Wofuŋte ufuŋ barâ ŋicwofuŋ iŋucne ʒâŋe biŋehec juocmu, ehuc eri ŋeŋe‐ticnao ŋehuc guriŋ bapa gie baocmu. Ehame taha bapa moc ere ŋeŋe‐ticnere maŋfuŋko domame jahe maŋ mocjaha erâ junicmu.” ’
14Eme hendiŋ i Helidai, Tobia, Jedaja â Zefaniare ŋokâ Josia jaŋere manasuhuc juniŋte Wofuŋte ufuŋko hepie ŋezejec.
15“Eme taicko jueŋgopieŋzi ware fisirâ bafic‐ŋopahapie Wofuŋte ufuŋ banʒepieŋ. Ehame ŋoŋe nore ʒiŋuc mana taraniŋmu: Anutu Tâpiri Ɋuŋɋasaŋ Wofuŋ eki nâŋerao sorewec. Ŋoŋe Wofuŋ Anutu‐ŋeŋicte dâŋ aafec faio mana rereŋ eniŋmuo iŋuc hâcne fuaocmu.”
