Ʒekaria 3

1

2

3

4

5

6

7

8

9

10

11

12

13

14

¹Wiac i tarame Wofuŋzi taha bapa sâko Josua nowatume honepo. E Wofuŋte aŋelo ere maio domaha Sataŋzi dâŋko râeocte fâre‐ticnaopec domawec.

²Wofuŋte aŋelozi ine Sataŋ ʒiŋuc âzâcnewec: “Sataŋ, Wofuŋzi dâŋ mugareoc, jâmbomac, Wofuŋ e Jerusalem hae bâwosâeweczi dâŋ mugareoc. Josua e ʒoctucne moc ʒockonec rokicne irec sâc i!”

³Eme Josua e aŋelore maio ŋaqi wâwânâŋnehec ro domawec.

⁴Eme aŋelozi kiŋaŋŋic mamai domambiŋ jaŋe ʒiŋuc jazawec: “Ŋoŋe ŋaqi‐ticne wâwânâŋnehec i heunuckecneniŋ.” Josua e jahacne ine ʒiŋuc âzâcnewec: “Manakic, no kiŋtofage behepo irec hombaŋ ŋaqi hegarepe huocmu.”

⁵Iŋuc murâ muwec: “Qizecnao duʒora ɋaɋacne hecnepie huoc.” Eme Wofuŋte aŋelozi maŋfuŋnao domahame duʒora â ŋaqi ɋaɋacne hecnepie huwec.

⁶Eme Wofuŋte aŋelozi Josua dâŋ kecʒiŋuc mutâcnecnewec:

⁷“Anutu Tâpiri Ɋuŋɋasaŋ Wofuŋ e ʒiŋuc mukac: Go nore kike hata bâjâpehuc kiŋaŋ biaŋne qanarecmuo ine ficnanere micne juhuc hae ʒoŋa‐nane soŋaŋkezemec. Ehame domaŋgopieŋ ʒi jaŋere ŋondeŋko jucmurâ mana‐garepemu.

⁸O taha bapa sâko Josua, go â âgofâcge maigao ŋeŋgopieŋ ŋoŋe wiac fuaocmu irec hata qaqasune juŋgopieŋzi mananiŋ: No oso gitec‐nane, kiŋaŋŋic hâcne, e mupe wareocmu.

⁹Manaŋgopieŋ, qânâ moc fainao ʒâŋe hândâŋ hawari 7 hekicne i Josua gore maio hepo ŋekac. Eme qânâ ira hâcne dâŋ moc heutuckepe foocmu, ehame ʒoaŋ mocjahao mâreŋ ʒirec kiŋtofa bârâriepemu, Anutu Tâpiri Ɋuŋɋasaŋ Wofuŋ ere dâŋ iŋuc.

¹⁰Eme ŋoŋe ʒoaŋ ira hâcne âgofâc‐ŋeŋic hefârec‐jopapie warerâ waiŋ qizec â nemuja jâcfuŋ‐ŋeŋicko waha ŋeniŋmu, Anutu Tâpiri Ɋuŋɋasaŋ Wofuŋ ere dâŋ iŋuc.”